މާތްﷲއަށް ޝުކުރުކުރުމަކީ އިސްލާމީ ޝިޢާރެއް: ހުކުރު ޚުޠުބާ

މާތްﷲއަށް ޝުކުރުކުރުމަކީ އިސްލާމީ ޝިޢާރެއް ކަމަށާއި ޙަޤީޤަތުގައި ޝުކުރަކީ ﷲގެ ފަޟުލުވަންތަ ކަމަށާއި ދީލަތިވަންތަކަމަށް ހިތުގެއަޑިން އިޢުތިރާފްވެ، ދުލުން އެކަން ތަރުޖަމާކޮށް ހަށިގަނޑުގެ އެންމެހާ ގުނަވަންތަކުން އެކަން ފާޅުކުރުން ކަމަށް ހުކުރު ޚުޠުބާގައި ބުނެފިއެވެ.

މިއަދުގެ ހުކުރު ޚުޠުބާ ’ނިޢުމަތަށް ޝުކުރު ކުރުން‘ މި މަޢުލޫއަށް ޚާއްޞަކޮށްފައިވާ އިރު، އެއްވެސް ގުނަވަނެއް މާތްﷲ ރުހިވޮޑުނުގަންނަވާކަމެއް ކުރުމުގައި ބޭނުން ނުކުރުމަށް ވަނީ ގޮވާލާފައެވެ. އަދި މާތްﷲގެ ނިޢުމަތަކީ އުޑާއި ބިމުންނާއި އެދެމެދުގައިވާހާ ތަންތަނުން ނެރެދެއްވާ ތަކެތި ކަމަށްވެސް ވަނީ ބުނެފައެވެ.

އިޝްތިހާރު

މާތްﷲ އަޅުގަނޑުމެންނަށް ދެއްވާފައިވާ ނިޢުމަތްތަކުގެ ތެރޭގައި ހަށިގަނޑުގެ ދުޅަހެޔޮކަމާއި ސިއްޙަތާއި ޢާފިޔަތުވާކަމަށް ޚުުޠުބާގައި ބުނެފައިވާއިރު، ކީރިތި ރަސޫލާގެ ޙަދީޘްފުޅުން ދަލީލުދައްކަމުން ޚުޠުބާގައި ބުނީ ’ ތިޔަބައިމީހުން ޢާފިޔަތު ދެއްވުމަށް ﷲއަށް ދަންނަވާށެވެ. ފަހެ، ޢާފިޔަތަށްވުރެ ރަނގަޅުކަމެއް ﷲގެ އަޅަކަށް ދެއްވިގެން ނުވެތެވެ.‘ ކަމަށެވެ.

މީގެ އިތުރުން ޚުޠުބާގައި ސިއްޙަތާއި ޢާފިޔަތަކީ އެކަންކަމާމެދު ގިނަބަޔަކު ފަރުވާ ކުޑަކުރާ ކަންކަން ކަމަށްވެސް ވަނީ ބުނެފައެވެ.

މާތްﷲ އަންގަވާފައިވާގޮތުގެމަތިން އެކަލާނގެ ރަސޫލާގެ މައްޗަށް ޞަލަވާތް ކިޔެވުމަށް އަޅުގަނޑުމެންްނަށް އަމުރުކުރައްވާފައިވާ ކަމަށްވެސް ޚުޠުބާގައި ވަނީ ބުނެފައެވެ.