މަޚްލޫފް ރާއްޖެ ވަޑައިގެންފި
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރ އަޙްމަދު މަޚްލޫފް ބޭސްފަރުވާއަށް އިންޑިއާއަށް ކުރެއްވި ދަތުރުފުޅަށްފަހު މިރޭ މާލެ ވަޑައިގެންފިއެވެ.
ޖަލުގައި ހުކުމް ތަންފީޒު ކުރައްވަމުން ގެންދަވާ މަޚްލޫފް ބޭސް ފަރުވާއަށް އިންޑިއާ އަށް ވަޑައިގަތުމަށް މޯލްޑިވްސް ކަރެކްޝަނަލް ސަރވިސް އިން މަހްލޫފަށް 10 ދުވަހުގެ މުއްދަތެއް ދިނުމުން މަޚްލޫފް އިންޑިއާއަށް ފުރާވަޑައިގެންފައިވަނީ މި ޑިސެމްބަރ މަހުގެ 11 ވަނަ ދުވަހުއެވެ.
ހަމުގެ މައްސަލައެއްގައި ބޭސްފަރުވާއަށް އިންޑިއާއަށް ވަޑައިގަތުމަށް ފަހު، މަޚްލޫފް ރާއްޖެ ވަޑައިގެން އިރު މަޚްލޫފްގެ ޢާއިލާއާއި އެހެން ބައެއް މީހުން އެއަރޕޯޓަށް ވަނީ ގޮސްފައެވެ.
ފުލުހުންގެ ވާޖިބަށް ހުރަސް އެޅުމުގެ ދެ ދައުވާއެއް ޘާބިތުވެ 10 މަހާއި 24 ދުވަހަށް މަޚްލޫފް ޖަލަށް ލާފައިވަނީ މިދިޔަ ޖުލައި މަހުގެ ތެރޭގައެވެ. މި ދެ ހުކުމް ހައިކޯޓުގައި އިސްތިޢުނާފު ކޮށްފައިވީ ނަމަވެސް މިމައްސަލަތަކުގެ އަޑުއެހުމެއް އަދިނުބާއްވައެވެ.