އަފްޣާނިސްތާންގެ ބިންހެލުމުގައި މަރުވި މީހުންގެ އަދަދު 2200 އިން މައްޗަށް
އަފްޣާނިސްތާންއަށް އައި ބާރުގަދަ ބިންހެލުމުގެ ސަބަބުން މަރުވި މީހުންގެ އަދަދު 2200 އިން މަތިވެފައިވާ ކަމަށް އެޤައުމުގެ ރަސްމީ މީޑިއާއިން ބުނެފި އެވެ.
ފާއިތުވި އާދީއްތަ ދުވަހު އެޤައުމުގ ފަރުބަދަމަތީ ހިސާބުތަކަށް އައި 6 މެގްނިޓުއުޑްގެ ބިންހެލުމުގެ ސަބަބުން ވެއްޓުނު އިމާރާތްތަކުގެ ދަށުވެ މަރުވި މީހުންގެ ހަށިގަނޑުތައް، އިމާރާތްތައް ދަށުން ނެގުމާއި، އަދި ދިރިހުރި މީހަކު ހުރިތޯ ބަލައި އިމާރާތްތައް ދަށުން މީހުން ސަލާމަތް ކުރުމުގެ މަސައްކަތް ސަލާމަތީ ބާރުތަކުންނާއި ރެސްކިއު ވޯކަރުން ދަނީ ކުރަމުންނެވެ. ބިންހެލުން އައުމުން 1400 މީހުން މަރުވިކަމަށް ލަފާކުރެވިފައިވިނަމަވެސް، މިއަދަދު އިތުރުވެ، މިއަދާއި ހަމައަށް 2205 އަށް އަރާފައިވާކަމަށް ސިއްޙީ ވުޒާރާއާއި ހަވާލާދީ އެޤައުމުގެ މީޑިއާއިން ވަނީ ބުނެފަ އެވެ.
މީހުން ސަލާމަތް ކުރުމަށް މަސައްކަތްކުރާ ފަރާތްތަކުން ބުނެފައިވަނީ ”ބިންހެލުމުގެ ސަބަބުން ގެދޮރު ހަލާކުވެ ހާލުގައި ޖެހިފައިވާ މީހުންނަށް ޓެންޓުތައް ޤާއިމް ކޮށްދެމުންދާ ކަމަށާއި، އަނިޔާ ވެފައިވާ 3640 އެއްހާ މީހުންނަށް ބޭސްފަރުވާ ކުރުމުގެ ކަންތައް ވެސް ކުރަމުންދާ“ ކަމަށެވެ.
އާދީއްތަ ދުވަހު އައި 6 މެގްނިޓިއުޑްގެ ބިންހެލުމުގެ އިތުރުން އަންގާރަ ދުވަހު 5.5 މެގްނިޓިއުޑްގެ އިތުރު ބިންހެލުމެއް ވެސް ހަމަ އެސަރަހައްދަށް ވަނީ އައިސްފައެވެ. ބިންހެލުންތަކުގައި މަރުވި މީހުންގެ އަދަދު، ހާއްސަކޮށް ބިންހެލުމުގެ އަސަރު އެންމެ ބޮޑަށް ކޮށްފައިވާ ކުނާރު ޕްރޮވިންސްގައި، އިތުރުވާނެ ކަމަށް ޔުނައިޓެޑް ނޭޝަންސްއިން އަންދާޒާ ކޮށްފައިވާ ކަމަށް ތާލިބާން ސަރުކާރުގެ މީޑިއާއިން ވަނީ ހާމަކޮށްފަ އެވެ.
މިބިންހެލުމުގެ ސަބަބުން 6700 އަށްވުރެ ގިނަ ގެ ވަނީ ބިމާއި ހަމަވެފައެވެ. އަދި ސުންނާފަތި ވެފައިވާ އިމާރާތްތަކުގެ ދަށުން ދިރިހުރި މީހުން ފެނޭތޯ ކަމާބެހޭ ފަރާތްތަކުންނާއި އާއިލާތަކުން ދަނީ ކެނޑިނޭޅި މަސައްކަތް ކުރަމުންނެވެ.
މިލިޔުން ކިޔާލުމުން
