ހިޔާ ލިސްޓުން އުނިކުރި އެންމެންނަށް ފްލެޓް ދޭނަން: މުޢިއްޒު

2018ވަނަ އަހަރު އިޢުލާންކުރި ހިޔާ މަޝްރޫޢުގެ ފްލެޓް ލިސްޓުގައި ހިމެނި، ނަމަވެސް މި ސަރުކާރުން ލިސްޓުތައް އުވާލާ އުނިކުރި ހުރިހާ މީހުންނަށް، އެންމެ އަވަަހަށް ޤާއިމުކުރާ ސޯޝަލް ހައުސިން މަޝްރުޢެއްގައި ފްލެޓް ދެއްވާނެ ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވެއްޖެއެވެ.

މުޢިއްޒު މިހެން ވިދާޅުވީ، އެމަނިކުފާނުގެ މެނިފެސްޓޯ އިޢުލާންކޮށްދެއްވައި ދެއްކެވި ވާހަކައިގައެވެ.

އިޝްތިހާރު

މުޢިއްޒު ވިދާޅުވީ މެނިފެސްޓޯގައި އެންމެ މުހިންމު އަދި އެންމެ ބޮޑު މަސައްކަތެއްގެ ގޮތުގައި ހިމަނުއްވާފައިވަނީ ގެދޮރުވެރިކަމާއި، އާބަނައިޒޭޝަންކަމަށެވެ. މުޖުތަމަޢުގައި ހުރި ކޮންމެ މައްސަލައެއްވެސް ގުޅި ނިމިގެން އަންނަނީ، ބޯހިޔާވަހިކަމުގެ މައްސަލައާއި ކަމަށް ވިދާޅުވިއެވެ. އެހެންކަމުން މުޅި ރާއްޖޭގައި ހުރި މައްސަލަތަކުގެ އެންމެ ބޮޑު ހައްލަކަށް ވާނީ ރައްޔިތުން ގެދޮރުވެރިކުރުވުން ކަމަށް މުޢިއްޒު ވިދާޅުވިއެވެ.

”ޤާނޫނުން ލިބިދޭ ބޯހިޔާވަހިކަމުގެ ޙައްގުގެދަށުން، އަމިއްލަ ބޯހިޔާވަހިކަން ނެތް އެއްވެސް ރައްޔިތެއް ނެތްކަން ކަށަވަރުކުރާން“

މުޢިއްޒު ވިދާޅުވިއެވެ.

މުޢިއްޒު ވިދާޅުވީ މި ސަރުކާރުގެ ގޯތި ލިސްޓުގައި ތިބި މީހުންނަށްވެސް، ލިސްޓު އުވާނުލާ ގޯތި ލިބޭނެކަން ކަށަވަރުކުރައްވާނެކަމަށެވެ. އަދި މީގެތެރެއިން ބިން ލިބި ގޯތި އެޅޭނެ މާލީ ތަނަވަސްކަން ނެތް މީހުންނަށް، އެމަނިކުފާނުގެ ސަރުކާރުގައި ޚާއްސަ ސްކީމެއްގެ ތެރެއިން ގޯތި އެޅޭނެ ގޮތް ހަމަޖައްސަވާދެއްވާނެ ކަމަށް ވިދާޅުވެއެވެ.