އެޗްޕީއޭ ގެ ގައިޑްލައިނާ އެއްގޮތަށް ގެސްޓްހައުސްތަކުން ޢަމަލު ކުރުމަށް ގޭމް އިން އިލްތިމާސްކޮށްފި
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކަނޑައަޅާފައިވާ ގައިޑްލައިންތަކާ އެއްގޮތަށް ޢަމަލު ކުރުމަށް ގެސްޓްހައުސް އެސޯސިއޭޝަން އޮފް މޯލްޑިވްސް (ގޭމް) އިން ދު އިލްތިމާސް ކޮށްފި އެވެ.
ގޭމް އިން މިގޮތަށް އިލްތިމާސްކޮށްފައި މިވަނީ އެޗްޕީއޭ ގެ ގައިޑްލައިނާ ޚިލާފުވެގެން ތިން ގެސްޓްހައުސްއެއްގެ ލައިސަންސް ހިފަހައްޓާފައިވަނިކޮށެވެ.
ގޭމްއިން ނެރުނު ބަޔާނެއްގައި ބުނީ ދެކުނު އޭޝިއާގެ ގިނަ ގައުމުތަކުގައި ކޮވިޑުގެ ހާލަތު ގޯސްވުމާއެކު އެ ސަރަހައްދުން ފަތުރުވެރިން އައުން މަނާކޮށްފައި ބޭއްވުމަށްފަހު މިމަހުގެ 30 ވަނަ ދުވަހުން ފެށިގެން އެ ހުއްދަ ދޭން ސަރުކާރުން ނިންމާފައިވަނިކޮށް، އޭގެ ކުރިން އެ ސަރަހައްދުގެ ފަތުރުވެރިންތަކަކަށް މާލެ ސަރަހައްދުގައި ހުރި ގެސްޓްހައުސްތަކަކުން ޚިދުމަތް ދިންކަން ހާމަވެފައިވާ ކަމަށެވެ.
ގަވައިދާ ޚިލާފުވި ގެސްޓްހައުސްތަކަށް ފިޔަވަޅު އެޅުމުން އެކަމަށް ގޭމް އިން ވަނީ މަރުހަބާ ކިޔާފަ އެވެ. އަދި ގެސްޓްހައުސްތަކުން އަމަލުކުރި ގޮތް އެންމެ ހަރުކަށި އިބާރާތުން ކުށްވެރިކުރާ ކަމަށް ވެސް ވަނީ ބުނެފަ އެވެ.
ހުރިހާ ގެސްޓްހައުސްތަކުން ވެސް އެޗްޕީއޭއިން ކަނޑައަޅާފައިވާ ގައިޑްލައިނާ އެއްގޮތަށް އަމަލުކުރުމަށާއި ގެސްޓްހައުސްތަކުގެ ހުރިހާ މުވައްޒަފުން ވެކްސިން ފުރިހަމަ ކުރުމަށް ވެސް ގޭމް އިން ވަނީ އިލްތިމާސް ކޮށްފަ އެވެ.
— Guesthouse Association of Maldives (@gammaldives) July 18, 2021
ދެކުނު އޭޝިއާގެ ފަތުރުވެރިންނަށް ގަވައިދާ ޚިލާފަށް ޚިދުމަތްދިން ތިން ގެސްޓްހައުސްއެއް ސަސްޕެންޑްކޮށްފައިވާ އިރު، ސައްހަ ނޫން ހޮޓެލް ބުކިންގތަކެއް ހިފައިގެން ރާއްޖޭގެ ބޯޑަރުން އެތެރެވާން އުޅުނު 248 ޓޫރިސްޓަކު ވެސް ވަނީ ދާދި ފަހުން ހުއްޓުވާފަ އެވެ.
މިލިޔުން ކިޔާލުމުން
