އިންޑިޔާގައި ކޮވިޑް ޖެހުނު މީހުންގެ ޢަދަދު 24 މިލިއަނަށް
އިންޑިޔާގައި ފެނުނު ކޮވިޑް 19 ގެ އާ ވޭރިއަންޓް މުޅި ދުނިޔެއަށް ފެތުރެމުން ދާއިރު، އެޤައުމުގައި ކޮވިޑް ޖެހިފައިވާ މީހުންގެ ޢަދަދު މިހާރު ވަނީ 24 މިލިއަނަށްވުރެ މައްޗަށް އަރާފައި ކަމަށް ރެކޯޑުތަކުން ދައްކައިފިއެވެ. މިއަދު އާންމުކުރި ރެކޯޑުތަކުން ދައްކާ ގޮތުގައި، މިއަދު އެކަނިވެސް ކޮވިޑް19 ގެ ސަބަބުން 4000 މީހުން ވަނީ މަރުވެފައެވެ. އަދި އިތުރު 343،144 މީހުން ވަނީ ފައްސިވެފައެވެ.
ދުނިޔޭގެ ސިއްޙަތު ޖަމިއްޔާގެ ސިއްޙީ މާހިރެއް ބުނެފައިވާ ގޮތުގައި، އިންޑިޔާގައި އައު ވޭރިއެންޓް ހަލުވިކަމާއެކު ފެތުރުމުގެ އިތުރުން، ދުނިޔޭގެ އެހެން ޤައުމުތަކުގައި ވެސް މި ވޭރިއެންޓް ފެތުރެމުންދާ ކަމަށެވެ. އޭގެތެރޭގައި ކެނެޑާ، އެމެރިކާ، އިނގިރޭސި ވިލާތް އަދި އާޖެންޓީނާ ހިމެނެއެވެ.
އިންޑިޔާގެ އާ ވޭރިއެންޓް ޖެހިފައިވާ މީހުންގެ ތެރޭގައި ހިމެނެނީ ފާއިތުވި ދުވަސްތަކުގައި އިންޑިޔާއަށް ދަތުރުކޮށްފައިވާ ފަތުރުވެރިން ކަމަށް ވެސް ސިއްޙަތު ޖަމިއްޔާއިން ބުނެފައިވެއެވެ.
އިނގިރޭސިވިލާތުގެ ސިއްޙަތާއި ބެހޭ ވުޒާރާއިން ބުނެފައި ވަނީ، ކޮވިޑް19 ގެ މި އައު ވޭރިއެންޓް ވަރަށް ފަސޭހައިން އަދި ވަރަށް ހަލުވި ކަމާއެކު ފެތުރޭ ކަމަށާއި، ފާއިތުވި ހަފްތާގައި ކޮވިޑް19 ފެތުރުނު މިންވަރު ދެގުނައަށް އިތުރު ވެފައިވާ ކަމަށެވެ. އަދި ފާއިތުވި ހަފްތާގައި އައު ވޭރިއަންޓްގެ 1313 ކޭސް ފެނިފައިވާ ކަމަށްވެސް އެ ވުޒާރާއިން ބުނެފައިވެއެވެ.
އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ބުނެފައިވަނީ، ކޮވިޑް19 ވަރަށް ބާރަށް ފެތުރެމުންދާ ކަމަށާއި އަދި އެކަމާމެދު ހާސްވެފައިވާ ކަމަށެވެ. އަދި ބަލި ކޮންޓްރޯލް ކުރުމަށް ކުރެވިދާނެ ކަންތައްތަކާއި ބެހޭގޮތުން މަޝްވަރާ ކުރުމަށް ބައްދަލުވުންތައް ބާއްވާނެ ކަމަށާއި، އެއްވެސް ކަމެއް ނުބަލައި ދޫކޮށްނުލާނެ ކަމަށްވެސް ބުނެފައިވެއެވެ.
ރެކޯޑުތައް ދައްކާ ގޮތުން އިންޑިޔާގައި ކޮވިޑް19 ޖެހުނު މީހުންގެ ޢަދަދު 24 މިލިއަނަށް އަރާފައިވާއިރު، ފާއިތުވި އަހަރު ކޮވިޑް19 ފެތުރެން ފެށިފަހުން އެޤައުމުގައި 262،316 މީހުން މިބަލީގައި މަރުވެފަވެއެވެ. ރެކޯޑު ތަކުން މި ޢަދަދު ދެއްކި ނަމަވެސް އަސްލު ޢަދަދު މިއަށްވުރެ 5-10 ގުނަ އިތުރު ވެދާނެ ކަމަށާއި، ބައެއް ހިސާބުތަކުގައި ޓެސްޓު ކުރެވޭނެ ގޮތެއް ނެތުމުން ފައްސިވި މީހުންގެ ޢަދަދާއި މިބަލީގައި މަރުވި މީހުންގެ ޢަދަދު އެންމެ ފުރިހަމައަށް ބެލެހެއްޓިފައި ނުވާ ކަމަށްވެސް ރެކޯޑުގައި ވަނީ ބުނެފައެވެ.
އިންޑިޔާގައި ކޮވިޑް19 ކޭސްތައް އިތުރުވުމުން ހޮސްޕިޓަލްތައް ފުރި، އޮކްސިޖަން ލިބުމުގެ ދަތިކަމުން ކޮންމެ ދުވަހަކު އެތައް ބަޔަކުދަނީ މިބަލީގައި ދުނިޔެ ދޫކުރަމުންނެވެ.
މިލިޔުން ކިޔާލުމުން
