ސުޕަ ލީގުގައި ބައިވެރިވި ކުލަބުތަކަށް ވަރުގަދަ އަދަބުތަކެއް ދީފި
ޔޫރަޕުގެ ނަން މަޝްހޫރު ކުލަބުތެއް ގުޅިގެން ދާދިފަހުން އުފެއްދި ޔޫރަޕިއަން ސުޕަ ލީގުގައި ވާދަކުރަން ނިންމި 12 ކުލަބުގެ ތެރެއިން 7 ކުލަބަކަށް ޔޫރަޕުގެ ފުޓުބޯޅަައިގެ މައި އިދާރާ ޔުއެފާއިން ބޮޑެތި އަދަބުތަކެއް ދީފިއެވެ.
ނިމިގެން ދިޔަ އޭޕްރީލް މަހުގެ 18 ވަނަ ދުވަހު ފައުންޑާ 12 ކުލަބަކާއެކު އިއުލާންކުރި މި ލީގުގައި ހިމެނުނީ އިނގިރޭސި ޕްރިމިއާ ލީގުގެ ހަ ކުލަބަކާއި، ސްޕެނިޝް ލީގުގެ ތިން ކުލަބަކާއި، އިޓާލިއަން ލީގުގެ ތިން ކުލަބެކެވެ.
އެގޮތުން ސުޕަލީގުގައި ބައިވެރިވި އިނގިރޭސި ހަ ކުލަބަކީ މެންޗެސްޓާ ޔުނައިޓެޑާއި، ލިވަޕޫލާއި، ޗެލްސީ އާއި، މެންޗެސްޓާ ސިޓީ އާއި، އާސެނަލް އަދި ޓޮޓެންހަމް އެވެ. ސްޕެނިޝް ލީގުން ބައިވެރިވި ތިން ޓީމަކީ ރެއާލް މެޑްރިޑާއި، ބާސެލޯނާ އަދި އެތުލެޓިކޯ މެޑްރިޑެވެ. އިޓާލިއަން ލީގުން ބައިވެރިވެފައިވަނީ އިންޓަ މިލާނާއި، އޭސީ މިލާން އަދި ޔުވެންޓަސްއެވެ.
ސުޕަ ލީގުގައި ބައިވެރިވި ހުރިހާ ކުލަބުތަކަށް ބޮޑެތި އަދަބުތަކެއް އަންނާނެ ކަމަށް މީގެ ކުރިން ބެލެވުނު ނަމަވެސް، ހުކުރު ދުވަހުގެރޭ ޔުއެފާއިން ވަނީ އެ ލީގުން ވަކިވި ކުލަބުތައް ސަސްޕެންޑްކުރުމުގެ ބަދަލުގައި، ޖޫރިމަނާކުރަން ނިންމާފައެވެ.
އެގޮތުން ސުޕަ ލީގުން ވަކިވި ކުލަބުތަކުން 15 މިލިޔަން ޕައުންޑް އެއްކޮށް ޔުއެފާގެ ގްރާސްރޫޓް ޕްރޮގްރާމަށް ފަންޑުކުރަން އެންގުމާއި، އެއް ސީޒަން ވަންދެން އެ ކުލަބުތަކަށް ލިބޭ ފައިސާގެ ފަސް އިންސައްތަ ޔުއެފާއަށް ނެގުމުގެ އިތުރުން، ކުރިއަށް އޮތްތަނުގައި ސުޕަ ލީގު ފަދަ ޔުއެފާގެ އުސޫލާ ޚިލާފު މުބާރާތެއްގައި ބައިވެރިވެއްޖެނަމަ 100 މިލިޔަން ޕައުންޑުގެ ޖޫރިމަނާއެއް ދައްކަން އެއްބަސްވުމާއި، ޔުއެފާގެ އެ ނޫން ވެސް އެހެން ކޮންމެ އުސޫލަކާ ޚިލާފުވެއްޖެނަމަ އެ ކުލަބެއް 50 މިލިޔަން ޕައުންޑްގެ ޖޫރިމަނާކުރަން ވަނީ ނިންމާފައެވެ.
ސުޕަ ލީގުގައި މި ވަގުތު ވަކިނުވެ އޮތް ހަމަ އެކަނި ތިން ކުލަބަކީ ސްޕެއިންގެ ބާސެލޯނާ އާއި ރެއާލް މެޑްރިޑްގެ އިތުރުން އިޓަލީގެ ޔުވްނެޓަސްއެވެ. މި ތިން ކުލަބާއި މެދު ވަރަށް އަވަހަށް ގޮތެއް ނިންމާނެ ކަމަށް ޔޫއެފާއިން ވަނީ ބުނެފައެވެ. ރިޕޯޓުތައް ބުނާގޮތުން މި ތިން ކުލަބަށް ޔޫއެފާއިން ސުޕަ ލީގުން ވަކީވާން އަންގާނެއެވެ. އަދި ޔޫއެފާގެ މި އަމުރައް ނުކިޔަމަންތެރި ވެއްޖެނަމަ، ކުރިޔައް އޮތްތަނުގައި ޔޫއެފާގެ މުބާރާތްތަކުގައި މި ކުލަބުތަކަށް ބައިވެރި ނުވެވޭނެ ގޮތައް އަދަބު ދޭނެއެވެ.
މިލިޔުން ކިޔާލުމުން
