ސިނޮފާމް ވެކްސިން ބޭނުންކުރުމުގެ ހުއްދަ ދީފި

ޗައިނާގެ އުފެއްދުމެއް ކަމުގައިވާ ސިނޮފާމް ވެކްސީން ބޭނުން ކުރުމުގެ ހުއްދަ ދުނިޔޭގެ ސިއްޙަތު ޖަމިއްޔާ (ޑަބްލިއު، އެޗް،އޯ) އިން ދީފިއެވެ. މި ހުއްދަ ދީފައިވަނީ ހުކުރު ދުވަހުއެވެ. މިއީ ޗައިނާގައި އުފައްދާފައިވާ ވެކްސިންއަކަށް ސިއްޙަތު ޖަމިއްޔާއިން ހުއްދިދިން ފުރަތަމަ ފަހަރެވެ. އަދި މި ހުއްދައާއި އެކު މި ވެކްސިންގެ އެތައް މިލިއަން ޑޯޒެއް (އދ ގެ އެހީއާއެކު) ދުނިޔޭގެ އެކި ޤައުމުތަކަށް ލިބިގެން ދާނެކަމަށް ބެލެވެއެވެ.

ދުނިޔޭގެ ސިއްޙަތު ޖަމިއްޔާގެ ޓެކްނިކަލް އެޑްވައިޒަރީ ގްރޫޕްގެ މި ނިންމުމުގެ ސަބަބުން، އދ އިން އިސްނަގައިގެން ދުނިޔޭގެ އެކި ޤައުމުތަކަށް ކޮވިޑް-19 ވެކްސިން ފޯރުކޮށްދިނުމަށް ކުރިއަށް ގެންދާ ’ކޯވެކްސް‘ ޕްރޮގްރާމްގައި ވެސް ސިނޮފާމް ވެކްސިން ބޭނުން ކުރާނެއެވެ. އަދި ކުރިއަށް އޮތް ދުވަސްތަކުގައި އދ ގެ ކުޑަކުދިންނާއި ބެހޭ ގޮފި (ޔުނިސެފް) އާއި އެމެރިކާގައި ހުންނަ ސިއްޙަތު ޖަމިއްޔާގެ ރީޖަނަލް އޮފީހުން ވެސް މި ވެކްސިން ދޫކުރާނެއެވެ.

އިޝްތިހާރު

ޗައިނާއިން ވަނީ ކޮވިޑް-19 އިން ރައްކައުތެރި ވުމަށް 2 ވެކްސިނެއް އުފައްދާފައެވެ. އެއީ ބެއިޖިންގ އިންސްޓިޓިއުޓް އޮފް ބަޔޯމެޑިކަލް ޕްރޮޑަކްޓްސް އިން އުފައްދާފައިވާ ވެކްސިނަކާއި، ވޫހާން އިންސްޓިޓިއުޓް އޮފް ބަޔޯ މެޑިކަލްސްއިން އުފައްދާފައިވާ ވެކްސިނެކެވެ. މީގެތެރެއިން ސިއްޙަތު ޖަމިއްޔާއިން ހުއްދަ ދީފައި ވަނީ ބެއިޖިންގ އިންސްޓިޓިއުތް އޮފް ބަޔޯ މެޑިކަލް ޕްރޮޑަކްޓްސް އިން އުފައްދާފައިވާ ވެކްސިނަށެވެ.

އެމެޖެންސީގައި ބޭނުން ކުރުމަށް ސިނޮފާމް ވެކްސިންއަށް ހުއްދަދިންކަން އިޢުލާނުކޮށް ދުނިޔޭގެ ސިއްޙަތު ޖަމިއްޔާގެ ޑިރެކްޓަރ ޖެނަރަލް ޓެޑްރޯސް އަދަހޮމް ގެބްރޭސަސް ބުނެފައި ވަނީ މިއީ ސަލާމަތާއި ކޮލިޓީއަށް ބެލުމަށް ފަހު، ބޭނުން ކުރުމަށް އެ ޖަމިއްޔާއިން ހުއްދަދިން 6 ވަނަ ވެކްސިން ކަމަށެވެ. މީގެ ކުރިން ހުއްދަ ދީފައި ވަނީ ފައިޒާ ވެކްސިންއާއި، ޖޯންސަން ޖޯންސަން، މޮޑާނާ، އެސްޓްރާ ޒެނެކާ އަދި އިންޑިއާގެ ސެރަމް އިންސްޓިޓިއުޓްއިން އުފައްދާފައިވާ އެސްޓްރާ ޒެނެކާ ވެކްސިންއަކަށެވެ.

ޖެނީވާގައި އޮތް ނޫސް ކޮންފަރެންސެއްގައި ވާހަކަ ދައްކަވަމުން ޓެޑްރޯސް އިތުރަށް ވިދާޅުވެފައި ވަނީ، ސިނޮފާމްއަށް ދިން ހުއްދައާއެކު ކޮވެކްސް ޕްރޮގްރާމްއަށް ގަންނަ ވެކްސިންގެ ބާވަތްތައް އިތުރުވާނެ ކަމަށާއި، އަދި ޤައުމުތަކަށް އެތެރެކޮށް ވެކްސިން ދިނުން ފަސޭހަ ވާނެކަމަށެވެ.

މީގެ ކުރިން ސިއްޙަތު ޖަމިއްޔާއިން ބުނެފައި ވަނީ، ސިނޮފާމްގެ ރަނގަޅު އަސަރު އުމުރުން 18 އަހަރާއި 59 އަހަރާއި ދެމެދުގެ މީހުންނަށް ކުރާނެ ކަމާއިމެދު އެ ޖަމިއްޔާގެ ބޮޑު އިތުބާރެއް އެބައޮތް ކަމަށެވެ. ނަމަވެސް 60 އަހަރުން މަތީގެ މީހުންނަށް އޭގެން އަސަރެއް ކުރާނެކަމަށް އެހާ ނުފެންނަކަމަށް ވެސް ބުނެފައިވެއެވެ. މީގެ އިތުރުން މި ވެކްސިންގެ ސަބަބުން ދިމާވެދާނެ ސައިޑް އިފެކްޓުތަކާއި ބެހޭ މަޢުލޫމާތު މަދުކަމުގެ ކަންބޮޑުވުން ވެސް އެ ޖަމިއްޔާއިން ކުރިން  ވަނީ ފާޅު ކޮށްފައެވެ.