ކޮރަޕްޝަނުގެ ކުށް ސާބިތުވި މެލޭޝިއާގެ ކުރީގެ ބޮޑުވަޒީރު ގޭބަންދަށް ބަދަލުކުރަނީ

ކުރީގެ ބޮޑުވަޒީރު ނަޖީބު ގޭބަންދަށް ބަދަލުކުރުން މެލޭޝިއާ ސަރުކާރުން މަޑުޖައްސާލައިފި؛ ގާނޫނީ ގޮތުން އިތުރަށް ބަލަންޖެހޭ ކަންކަން ހުރިކަމަށް ބުނެފި އެވެ.

ކޮރަޕްޝަނުގެ ކުށް ސާބިތުވެ ޖަލަށްލާފައިވާ މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާގު ގޭބަންދަށް ބަދަލުކުރުމަށް ނިންމާފައިވާ ނިންމުން ވަގުތީ ގޮތުން ފަސްކޮށްފައިވާ ކަމަށް އެ ޤައުމުގެ އެޓާނީ ޖެނެރަލްގެ އޮފީހުން ބުނެފި އެވެ.

އިޝްތިހާރު

އެ އޮފީހުން ހާމަކުރި ގޮތުގައި މި ނިންމުން ފަސްކުރީ ރަސްގެފާނު ދެއްވި މާޢާފާއި އެ ބަދަލަށް ހުއްދަދީ ކޯޓުން ނެރުނު އަމުރު ޤާނޫނީ ގޮތުން އިތުރަށް ދިރާސާކުރުމަށް ވަގުތު ބޭނުންވާތީ އެވެ.

2009 އިން 2018 އަށް ބޮޑުވަޒީރުކަން ކުރެއްވި ނަޖީބުގެ މައްޗަށް ކޮރަޕްޝަނުގެ ކުށް ސާބިތުވީ އޭނާގެ ވެރިކަމުގައި އުފެއްދެވި ދައުލަތުގެ އިންވެސްޓްމަންޓް ފަންޑު 1އެމް.ޑީ.ބީ އިން އެތައް ބިލިއަން ޑޮލަރަކަށް ހިޔާނާތްތެރިވި މައްސަލައިގަ އެވެ.

ނަމަވެސް ނަޖީބު ގެންދަވަނީ އެއްވެސް ނުބައި އަމަލެއް ހިންގަވާފައި ނުވާނެ ކަމަށް ވިދާޅުވެ އެ ތުހުމަތުތަކަށް އިންކާރު ކުރައްވަމުންނެވެ.

މެލޭޝިއާގެ ރަސްގެފާނު ސުލްޠާން އިބްރާހީމް ސެޕްޓެމްބަރު މަހު ނިންމެވީ ނަޖީބަށް ދެއްވި ދެވަނަ ރަސްކަމުގެ މާފުގެ ދަށުން އޭނާގެ ޙުކުމުގެ ބާކީ އޮތްބައި ގޭބަންދުގައި ތަންފީޒު ކުރުމުގެ ހުއްދަ ދެއްވުމަށެވެ.

ނަޖީބު ނިސްބަތްވާ ޔުނައިޓެޑް މެލޭސް ނޭޝަނަލް އޯގަނައިޒޭޝަން އިން ބުނި ގޮތުގައި މާޢާފުގެ ޝަރުތުތައް ފުރިހަމަކުރުމުގެ ގޮތުން ދައްކަންޖެހޭ 50 މިލިއަން ރިންގިޓް (12.32 މިލިއަން ޑޮލަރު) ގެ ޖޫރިމަނާ އެ ޕާޓީން ވަނީ ދައްކާފަ އެވެ.

ނަޖީބުގެ ވަކީލު ކުރިން ވިދާޅުވި ގޮތުގައި މެލޭޝިއާގެ ކޯޓަކުން ވަނީ އޭނާ ގެއަށް ބަދަލުކުރުމުގެ އަމުރެއް ނެރެފަ އެވެ. އަދި އެކަން ހުކުރު ދުވަހު ހިނގާނެ ކަމަށް އުންމީދު ކުރެވުނު ކަމަށްވެސް އޭނާ ވިދާޅުވި އެވެ.

ނަމަވެސް އެޓާނީ ޖެނެރަލްގެ އޮފީހުން ނެރުނު ބަޔާނެއްގައި ބުނެފައިވަނީ ރަސްގެފާނު ދެއްވި މާޢާފާއި އޭގެ ފަހުން ނެރުނު ކޯޓު އަމުރު ޤާނޫނީ ގޮތުން މާނަކުރުމުގައި ސުވާލުތަކެއް އުފެދިފައިވާ ކަމަށެވެ.

”މިކަމާ ގުޅިގެން ގޭބަންދަށް ބަދަލުކުރުމުގެ ކަންކަން ތަންފީޒުކުރުން ވަގުތީ ގޮތުން މަޑުޖައްސާލަންޖެހޭ. އެއީ މިކަމާ ގުޅޭ ތަޙްޤީޤުތަކާއި ޤާނޫނީ ގޮތުން ސާފުކުރަންޖެހޭ ކަންކަން ފުރިހަމަވަންދެން،“ އެ ބަޔާނުގައިވެ އެވެ.