ކަސްރަތު ކުލާސްތަކާއި ޖިމް، ސެލޫންތައް އަދި ސިނަމާތައް ބަންދު ކުރަން އަންގައިފި
މާލެ ސަރަހައްދުގައި ހިންގާ ކަސްރަތު ކުލާސްތަކާއި ޖިމްތަކާއި ސެލޫންތައް އަދި ސިނަމާތައް ބަންދު ކުރަން އަންގައިފި އެވެ.
ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވާ މި އެންގުން އަންގާފައިވަނީ މިގޮތަށް ނިންމީ ކޮވިޑް19 އިން ރައްކާތެރިވުމަށް އަޅާ ފިޔަވަޅެއްގެ ގޮތުން ކަމަށެވެ.
މާލެ ސަރަހައްދުގައި، ޖުމްލަކޮށް މުޅި ރާއްޖޭގައި ވެސް ކޮވިޑް19 ފެތުރޭ މިންވަރު އިތުރުވެފައިވާ މި ދަނޑިވަޅުގައި ކަސްރަތު ކުލާސްތަކާއި ޖިމްތަކާއި ސެލޫންތައް އަދި ސިނަމާތައް ބަންދު ކުރަން ނިންމާފައިވަނީ މާދަމާ އިން ފެށިގެން ނެވެ.
އެޗްޕީއޭގެ އެންގުމުގައި ވަނީ މާދަމާ، މެއި 7 އިން ފެށިގެން ވަކި ގޮތެއް އަންގަންދެން މާލެ ސަރަހައްދުގައި ހިންގާ ޖިމްތަކާއި ކަސްރަތު ކުލާސްތައް އަދި ސިނަމާތަކާއި ސެލޫންތައް ބަންދު ކުރަން އަންގާ ކަމަށެވެ.
ކޮވިޑު ކޭސްތައް ރާއްޖެގައި އިތުރުވަމުން އަންނަ އިރު، މާލެ ސަރަހައްދުގައި ފިޔަވަޅުތައް ވަނީ ވަރުގަދަކޮށްފަ އެވެ.
އެގޮތުން ރޭގަނޑު ނުވަޔަކުން ފަތިހު ހަތަރަކަށް ބޭރަށް ނިކުމެ އުޅުން ވަނީ މަނާކޮށްފަ އެވެ. އަދި ދުވާޓްރެކްތަކާއި ޕާކުތަކާއި މައިޒާންތައް ވެސް ވަނީ ބަންދުކޮށްފަ އެވެ.
މީގެ އިތުރުން އެއްރަށން އަނެއް ރަށަށް ޒަރޫރީ ބޭނުމަކަށް ނޫނީ ދަތުރު ނުކުރުމަށް ވެސް އަންގާފައި ވެއެވެ. އަދި ކޮވިޑް ކޭސްތައް އިތުރުވާން ފެށުމާއެކު ވެކްސިންގެ ދެ ޑޯޒް ފުރިހަމަ ކުރި ފަރާތްތަކަށް ދަތުރުކުރުމުގައި ދިން ލުއިވެސް ވަނީ ހިފަހައްޓާފަ އެވެ.
މިލިޔުން ކިޔާލުމުން
