ސައުދީގެ ތަޢުލީމީ މަންހަޖުގައި ހިންދޫ ދީނުގެ ވާހަކަތައް ހިމަނައިފި
ސައުދީ އަރަބިއްޔާއިން މިހާރު އަމަލު ކުރަން ފަށާފައިވާ ’ވިޝަން 2030‘ ގެ ދަށުން، އެ ޤައުމުގެ އައު ތަޢުލީމީ މަންހަޖުގައި ހިންދޫ ދީނުގެ ’ރާމާޔަން‘ އަދި ’މަހާބާރަތާ‘ ގެ ވާހަކަތައް ހިމަނައިފިއެވެ.
ސައުދީގެ ފުރަތަމަ ޔޯގާ އިންސްޓްރަކްޓަރ އަދި އަރަބް ޔޯގާ ފައުންޑޭޝަންގެ ފައުޑަރ ކަމުގައިވާ ނަޢުފް އަލް މަރްވާއީ ކޮށްފައިވާ ޓްވީޓެއްގައި، އޭނާގެ ދަރުފުޅަށް މިއަހަރު ސްކޫލުން ދީފައިވާ ސޯޝަލް ސްޑަޑީޒްގެ ސުވާލު ޕޭޕަރެއްގެ ފޮޓޯތަކެއް ވަނީ ހިމަނާފައިއެވެ. އަދި އެ ސުވާލު ކަރުދާހުގައި ހިންދޫ ދީނާއި ބުދިޒަމްގެ ވާހަކަތަކުން ސުވާލު ހިމަނާފައިވެއެވެ. އެ ޓްވީޓް ވަނީ ސޯޝަލް މީޑިއާގައި ވައިރަލް ވެފައެވެ.
އޭނާގެ ޓްވީޓުގައި ބުނެފައި ވަނީ، ސައުދީ އަރަބިއްޔާގެ އައު 2030 ވިޝަން އަދި އައު ތަޢުލީމީ މަންހަޖުގެ ސަބަބުން އެންމެން ގުޅިގެން އުޅޭ މެދު މިނުގެ އަދި ކެތްތެރި މުޖުތަމަޢެއް އުފެދިގެން ދާނެ ކަމަށް. އަދި އޭނާގެ ދަރިފުޅުގެ ސްކޫލް ސޯޝަލް ސްޓަޑީޒް އިމްތިހާނުގައި ހިންދުއިޒަމް، ބުދިޒަމް، ރާމާޔަން، ކަރްމާ އަދި މަހަބާރަތަ ދަރްމާއާއި ބެހޭގޮތުން ސުވާލުތައް ހިމަނާފައިވާ ކަމަށް ވެސް އެ ޓްވީޓުގައި ބުނެފައި ވެއެވެ. މީގެ އިތުރުން އޭނާ ބުނެފައި ވަނީ، ދަރިފުޅަށް އެ ހުރިހާ ފިލާވަޅުތައް ދަސްކުރުމަށް އެހީތެރިވެވުނީތީ އުފާކުރާ ކަމަށެވެ.
އިނގިރޭސި މާއްދާ ކިޔެވުން މަޖުބޫރުވާ ގޮތަށް ތަޢުލީމަށް ގެނެސްފައި މިވާ ބަދަލަކީ، ތެޔޮ ވިއްކައިގެން ލިބޭ ފައިސާއަށް އެ ޤައުމު ބަރޯސާވެފައި އޮތް އޮތުން ކުޑަކޮށް، ޤައުމުގެ އިޤްތިސާދު ފުޅާ ކުރުމަށް ސައުދީގެ ވަލީ އަޙްދު މުޙައްމަދު ބިން ސަލްމާން ފަށާފައިވާ މަޝްރޫޢު ’ވިޝަން 2030‘ ގެ ދަށުން ގެނެސްފައިވާ ބަދަލުތަކެކެވެ. މީގެ އިތުރުން ބސައުދީއަކީ ހައްދުފަހަނަ އަޅާފައިވާ ޤައުމެއްގެ ގޮތުގައި ބޭރު ދުނިޔެއަށް ސިފަވެފައި އޮތް އޮތުން ބަދަލުކޮށް، މެދުމިނުގެ އަދި ހުރިހާ ދީނަކަށް ވެސް ކެތްތެރި ޤައުމެއްގެ ގޮތުގައި ދެއްކުމަކީވެސް މުހައްމަދް ބިން ސަލްމާން ފަށާފައިވާ މަޝްރޫޢުގެ އަމާޒެކެވެ.
މިކަމާއި ގުޅޭގޮތުން އިންޑިއާގެ ހިންދުސްތާން ޓައިމްސްގައި ބުނެފައި ވަނީ، ރާމާޔަންއާއި މަހާބާރަތާގެ އިތުރުން، އިންޑިއާގެ ތާރީޚައި ގުޅިފައިވާ އެއްޗެއް ކަމުގައިވާ ޔޯގާއާއި އާޔުރްވޭދާއާއި ބެހޭ ފިލާވަޅުތައް ވެސް ސައުދީގެ ތައުލީމުގައި ހިމެނުމަށް ހަމަޖެހިފައިވާ ކަމަށެވެ. ބުނެވޭ ގޮތުގައި، އެންމެ ފުރަތަމަ ސާންސްކްރިތުން ލިޔެފައިވާ މަހާބާރަތައަކީ މިހާތަނަށް ލިޔެފައިވާ އެންމެ ދިގު ޅެމެވެ. އަދި އޭގައި ހިންދޫން ޤަބޫލުކުރާ ފޮތެއް ކަމަށްވާ ބަގަވަތު ގީތާގެ ވަރަށް ގިނަ ބައިތައް އެކުލެވިފައި ވެއެވެ.
ފާއިރތުވި މަހު ވިޝަން2030 ގެ 5 ވަނަ އަހަރީ ދުވަސް ފާހަގަ ކޮށް، 2016 ގައި މަޝްރޫޢު އިފްތިފާޙު ކުރި ފަހުން، އެ މަޝްރޫޢުގެ ކުރިއެރުމާއި ބެހޭގޮތުން މަޝްވަރާ ކޮށް ސައުދީގެ ޤައުމީ ޓީވީއަށް ދިން ބަސްދީގަތުމެއްގައި މުހައްމަދު ބިން ސަލްމާން ބުނެފައި ވަނީ، ވިޝަން2030 ގެ ފަހުން އިޤްތިސާދީ ދާއިރާގެ އެތައް މައްސަލަތަކެއް ހައްލުވެފައިވާ ކަމަށެވެ. އޭގެ ތެރޭގައި ގެދޮރުވެރިކަން ވެސް ހިމެނޭ ކަމަށް ބުނެފައިވެ އެވެ.
ސައުދީ އަރަބިއްޔާއަކީ ދީނީ ހަރުކަށި ފިކުރަށް ތާޢީދު ނުކުރާ، އަދި މެދުމިނުގެ ޤައުމެއްގެ ގޮތުގައި ބޭރު ދުނިޔެއަށް ދެއްކުމަށް، އަދި ހުޅަނގުގެ ރުހުން ހޯދުމަށް އެ ޤައުމުގެ ވަލީ އަޙުދު ދަނީ ޤައުމުގެ އެތައް ކަމަކަށް ބަދަލު ގެންނަމުންނެވެ. މިގޮތުން އަންހެނުންނަށް އެއްގަމު އުޅަނދު ދުއްވުމަށް ހުއްދަ ދިނުމާއި، ޔޯގާ ސެންޓަރު ހުޅުވުން، އަދި މިހާއު ތަޢުލީމަށް ގެންނަމުންދާ ބަދަލަކީ ފާހަގަ ކޮށްލެވޭ ބޮޑެތި ކަންކަމެވެ.
މިލިޔުން ކިޔާލުމުން
