ރަސޫލާ صلى الله عليه و سلم އެންމެ ގިނައިން ކުރެއްވި ދުޢާ!
އަަހަރަމެން ނިކަމެތި އިންސާނުންގެ ހިތްތަކަކީ ވަރަށް އަވަސް އަވަހަށް ބަދަލުވަމުންދާ ހިތްތަކެކެވެ. ދުނިޔެވީ ކަންކަމުގެ އަވައިގައި ޖެހި އެންމެ ރަނގަޅު މުޢުމިނު އިންސާނާގެ ހިތްވެސް ލެބިގެންދާ ފަހަރު އާދެއެވެ. އަޅުގަނޑުމެންގެ ލޮބުވެތި ނަބިއްޔާ صلى الله عليه و سلم ވަނީ އާދަމްގެ ދަރިންގެ ހިތްތަކަކީ ކެކިކެކި ހުންނަ ފެންފަދަ އެއްޗެއްގެ ގޮތުގައި ސިފަކުރައްވާ ހަދީޡް ކުރައްވާފައެވެ.
މި އުއްމަތުގެ ލޮބުވެތި ނަބިއްޔާގެ އެކުވެރި ޝަހާބީންގެ އަމަލުތަކަށް އަޅުގަނޑުމެން ނަޒަރު ހިންގާލާއިރު ފެނިގެން ދަނީ އެ ބޭކަލުންނަކީ އެ ބޭކަލުންގެ އަޤީދާ ވަރުގަދަ ކުރައްވާ އިލްމް އުގެނުމަށް ވަގުތު ނެންގެވި ބޭކަލުންގެ ގޮތުގައެވެ. އަދި ލަސްލަހުން އިލްމް އުގެނެމުން ގެންދެވި ބޭކަލުންގެ ގޮތުގައެވެ. ލަސްލަހުނޭ އަޅުގަނޑު މި ބުނާ ބަހުގެ މާނައަކީ ކޮންމެ ކަމެއް އުގެނުމަށް ވަގުތު ނެންގެވި ވާހާކައެވެ.
އިބުނު މަސްޢޫދު ރަޟިއަﷲ އަންހު ރިވާކުރެއްވި ގޮތުގައި އެ ބޭކަލުން ހިތުދަސްކުރައްވަނީ ޤުރުއާނުގެ ފަހަރަކު 10 އާޔަތް ކަމަށާއި ހިތުދަސްކުރައްވާ އާޔަތްތަކުގެ މާނަ ރަނގަޅަށް ބައްލަވާ އެ އާޔަތްތަކުގެ މާފްހޫމްގެ މައްޗަށް އަމަލު ބެހެއްޓެވިއެވެ.
އެހެންކަމުން ހިތްތަކުގެ އިމާންތެރިކަން ވަރުގަދަކުރައްވަން ބޭނުންވާނަމަ މަޑުމަޑުން ދީނީ އިލްމް އުނގެނި އެކަމުގެ މައްޗަށް އަމަލު ކުރުމަށް އިލްމްވެރިން ނަސޭޙަތްތެރިވެވަޑައިގަންނަވައެވެ.
ރަސޫލާ صلى الله عليه و سلم އެންމެ ގިނައިން ކުރެއްވި ދުޢާ
يا مقلب القلوب ثبت قلبي على دينك
”ހިތްތައް ބަދަލު ކުރައްވާ ވެރި އިލާޙެެެވެެ! މިއަޅާގެ ހިތް އިބަރަސްކަލާނގޭގެ މަގުގައި ސަބިތު ކުރައްވާންދޭ“
މި ދުނިޔެ މައްޗަށް ފޮނުވުނު އެންމެ މާތް ނަބިއްޔާ صلى الله عليه و سلم މި ދުޢާ ތަކުރާރުކޮށް ކިޔަވާވިދާޅުވެފައިވާއިރު، އަޅުގަނޑުމެން ނިކަމެތި އަޅުން މި ދުޢާ ކުރެއްވުން އަޢުލާކަންބޮޑެވެ. ސަބަބަކީ އަޅުގަނޑުމެންނަކީ ފާފައާއި ފަސާދަކުރުން އަޅުގަނޑުމެންގެ ފިތުރަތުގައި ލައްވާފައިވާ ފަރާތްތަކެއްކަމުގައިވެފައި އަޅުގަނޑުމެންގެ ހިތްތަކަކީ އަބަދުވެސް ބަދަލުވަމުންދާ ހިތްތަކެއްގެ ކަމުގައިވާތީއެވެ.
މީގެއިތުރުން މާތް ނަބިއްޔާ صلى الله عليه و سلمގެ ކުރިފުޅުމަތީގައި އަޅުގަނޑުމެންނަކީ ”ބިލިއަން“ ގުނަ ނިކަމެތި ބައެއްގެ ގޮތުގައިވާތީއެވެ. ނަބިއްޔާ صلى الله عليه و سلمގެ ހިތްޕުޅު ﷲގެ މަގުގައި ސާބިތުކޮށްދެއްވާ ބެހެއްޓެވުމަށް ތަކުރާރުކޮށް ދުޢާ ދަންނަވާފައިވާއިރު، އަޅުގަނޑުމެންވެސް މި ދުޢާ ކުރަން ޖެހެއެވެ.
އަޅުގަނޑުމެންގެ ހިތް, ވެރި އިލާޙް ﷲގެ މަގުގައި ސާބިތުވެ ބެހެއްޓުމާއި އަޤީދާ ގުޑުުުންނާރާ އެއްގޮތަކަށް ބެހެއްޓުމަށް އަޅުގަނޑުމެންނަށް އެހީތެރިވެވަޑައިގެންނެވެނީ ހަމައެކަނި މި ކައުނުގެ ވެރި އިލާޙު ﷲ تعلى ކަމުގައި ވާތީއެވެ.
ނަބިއްޔާ صلى الله عليه و سلم ކުރެއްވި އިތުރު ދުޢާ
يا مصرف القلوب صرف قلبي إلى طاعتك
“ ހިތްތަކަށް މަގުދައްކަވާ ވެރި އިލާޙެެެވެެ! މި އަޅާގެ ހިތަށް ރަނގަޅު މަގު ދައްކަވައިދޭން“
މި އުއްމަތުގެ ނަބިއްޔާ صلى الله عليه و سلم އެކަލޭގެފާނުގެ ހިތްޕުޅު ﷲގެ މަގުގައި ސާބިތުކޮށްދެއްވުމަށް ދުޢާ ކުރައްވާ، އަދި ﷲ ގެ ހަޒްރަތުން އެކަލޭގެފާނަށް ރަނގަޅު މަގު ދެއްކެވުމަށްވެސް ދުޢާ ކުރައްވާފައިވެއެވެ.
އަޅުގަނޑުމެން އިންސާނުން، ﷲ تعلىގެ މަގުގައި ސާބިތުވެ ރަނގަޅު ގޮތުގައި އަބަދުމެ ތިބެން އެދޭ ހާލު، ﷲގެ ހަޒްރަތުން އަޅުގަނޑުމެންނަށް އެކަން ފަސޭހަކޮށްދެެއްވަން އެދެންވާނެއެވެ.
މިލިޔުން ކިޔާލުމުން
