އެމީހެއްގެ ފުށުން ޖައްވު ތަޣައްޔަރު ކުރުވާ ވިހަ މާއްދާތަކުގެ ލިސާންތައް މަދު ކުރުމަށް މިނިސްޓަރ އެދިވަޑައިގެންފި
ކޮންމެ މީހަކުވެސް އެމީހެއްގެ ފުށުން ޖައްވު ތަޣައްޔަރު ކުރުވާ ވިހަ މާއްދާތަކުގެ ލިސާންތައް މަދު ކުރުމަށް ތިމާވެއްޓާއިބެހޭ ވަޒީރު ޑރ. ޙުސައިން ރަޝިދު ހަސަން އެދިވަޑައިގެންފިއެވެ.
ތިމާވެށީގެ ދުވަހުގެ މުނާސަބާގައި ނެރުއްވި ޚިތާބުގައި ވަޒީރު ވަނީ ދުއްވާ އިންޖީނުލީ އުޅަނދަކީ ގަވައިދުން ސަރވިސް ކުރާ އުޅަނދަކަށް ހެދުމަށައި އެއްތަނުން އަނެއްތަނަށް ދިޔުމަށާއި ހެލިފެލިވުމުގައި މިހާރަށް ވުރެ ބޮޑަށް ފައިމަގު ނުވަތަ ބައިސްކަލު ޚިޔާރު ކުރުމަށް އެދިވަޑައިގެންފައެވެ.
ޖައްވުގައިވާ ކިލަނބުކަން ސާފުކުރުމަށް މާހައުލު ފެހި ކުރުމަށާއި އިސްރާފު ކުރުން މަދުކޮށް ކުނި މަދުކުރަމަށާއި ހަކަތަ އުފެއްދުމުގައި އިޔާދަ ކުރަނިވި ވަސީލަތްތައް ބޭނުންކުރުމަށްވެސް އެދިވަޑައިގެންފައިވާ އިރު، ގޭގައި ގެންގުޅޭ ކަރަންޓު ބޭނުންކުރާ އާލާތްތަކަކީ ހަކަތަ ސަމަކާރަ (އެނަރޖީ އެފިޝެންޓް) ތަކެތިކަމަށް ހެދުމަށްވެސް ވަނީ އެދިވަޑައިގެންފައެވެ.
“އާންމު ދަތުރުފަތުރު ކުރުމުގެ ނިޒާމަކީ ހަރުދަނާ ތިމާވެއްޓާ ރައްޓެހި ކަރަންޓުން ނުވަތަ ބެޓެރިން ހިންގާ ނިޒާމަކަށް ހެދުމަށް މިއަދު އަޒުމު ކަނޑައެޅުން ކީއްތޯއެވެ؟ ދުޅަހެޔޮ، ހަށިހެޔޮ އަދި ވެށިހެޔޮ އަދަކަށް އަދި މިއަށްވުރެ ފަހި މާދަމާއެއް، ލިބިގަންނަމާ ހިންގަވާށެވެ. މިކަމުގައި ބޭނުންވަނީ އެންމެންގެ ބައިވެރި ވުމާއި އެއްބާރުލުމެވެ. މިއީ، އަޅުގަނޑުމެން ދިވެހިންނަށް ހާސިލްކުރެވިދާނެ ލަނޑުދަނޑިއެކެވެ.” ވަޒީރުގެ ބަޔާނުގައިވެއެވެ.