އައްޑޫ ސިޓީއަށާއި ލ. އަތޮޅަށް ގުގުރުމާއެކު ބޯކޮށް ވާރޭ ވެހޭނެ: މެޓް އޮފީސް

ލ އަތޮޅުން ފެށިގެން އައްޑޫ ސިޓީ އާ ދެމެދުގެ ރަށްތަކަށް ރީނދޫ އެލާޓް ނެރެފިއެވެ.

މެޓް އޮފީހުން މީގެ ކުޑަ އިރުކޮޅެއް ކުރިން ނެރުނު އެލާޓުގައި ބުނެފައިވަނީ އައްޑޫ ސިޓީއަށާއި ލ. އަތޮޅަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާކުރާކަމަށެވެ. އަދި ވިލާގަނޑުގައި 45 މޭލަށް ވައިގަދަވާނެ ކަމަށް މެޓް އޮފީހުގެ އެލާޓްގައި ވެއެވެ.

އިޝްތިހާރު

މެޓް އޮފީހުން ވަނީ މީގެ ކުރިން ތިން އަތޮޅަކަށް ވެސް ރީނދޫ އެލާޓް ނެރެފައެވެ. އޭ ގޮތުން ކުރިން އައްޑޫ ސިޓީއަށް އެކަނި ނެރުނު ރީނދޫ އިންޒާރުގެ މުއްދަތު ވަނީ އިތުރު ކޮށްފައެވެ. އެގޮތުން މެޓް އޮފީހުން ކުރިން އެލާޓް ނެރެފައިވަނީ މިރޭ 19:00 އާ ހަމައަށެވެ.

އަދި މެޓް އޮފީހުން ފަހުން ނެރުނު އެލާޓުގެ މުއްދަތު ވެސް ހަމަވާނީ 19:00 އަށެވެ.

ރާއްޖެއަށް މިހާރު ކުރަމުން މި ދާ ވިއްސާރައާއި ގުޅިގެން ބޯކޮށް ވާރޭ ވެހި އައްޑޫ ސިޓީއާއި ލ. ފޮނަދޫ ގެ މަގުތަކުގައި ވަނީ ވަރަށް ބޮޑަށް ފެންބޮޑުވެފައެވެ. އަދި ބައެއް ގޭގޭއަށް ވެސް ފެންވަދެ ކޮންމެ ވެސް ވަރެއްގެ ގެއްލުންތަކެއް ވެސް ލިބިފައިވާ ކަމުގެ މައުލޫމާތު ވަނީ ލިބިފައެވެ.