ހަފްތާއަކު ދެފަހަރު މަޖިލީހުން ނޫސްވެރިންނަށް މައުލޫމާތުދޭނެ: އަމީން އާންމު

ހަފްތާއަކު ދެފަހަރު ރައްޔިތުންގެ މަޖިލީހުން ނޫސްވެރިންގެ ބައްދަލުވުމެއް ބާއްވައި ނޫސްވެރިންނަށް މައުލޫމާތުދިނުމަށް ނިންމާފައިވާ ކަމަށް މަޖިލީހުގެ އަމީން އާއްމު ފާތުމަތު ލިއުޝާ ވިދާޅުވެއްޖެއެވެ.

ރައްޔިތުން މަޖިލީހުގެ މިއަދުގެ ޖަލްސާއަށްފަހު ކުރިއަށްދިޔަ ނޫސްވެރިންގެ ބައްދަލުވުމުގައި ނޫސްވެރިންނަށް މައުލޫމާތު ދެއްވަމުން ލިއުޝާ ވިދާޅުވީ ރައްޔިތުންގެ މަޖިލީހާއި މަޖިލީހުގެ އިދާރާގައި ހިނގާ މުހިއްމު އެކި ކަންކަން މި ނޫސްވެރިންގެ ބައްދަލުވުންތައް މެދުވެރިކޮށް އާންމުންނާއި ހިއްސާ ކުރެވިގެންދާނެ ކަމަށާއި މި ނިންމުމަކީ މަޖިލީހުގެ ރައީސް ކުރީގެ ރައީސް މުހައްމަދު ނަޝީދާއި ނައިބު ރައީސް އީވާ އަބުދުﷲގެ އެދިލެއްވުމަށް ނިންމެވި ނިންމެވުމެއް ކަމަށް ލިއުޝާ ވިދާޅުވިއެވެ.

އިޝްތިހާރު

މި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ މިއަދުގެ ޖަލްސާގެ މަސައްކަތްތަކުގެ ކުރު ހުލާސާއެއް ވެސް އަމީން އާއްމު ވަނީ ނޫސްވެރިންނަށް ދެއްވާފައެވެ.

އެގޮތުން އިންޑިއާގެ ބޮޑުވަޒީރު ނަރެންދުރަ މޯދީ އަންނަ މަހު ރާއްޖެއަށް ކުރައްވާ ދަތުރުފުޅުގައި މަޖިލީހުގައި ތަގުރީރު ކުރެއްވުމުގެ ހުއްދަ ދިނުމަށް މަޖިލީހުން ފާސްކޮށްފައިވާކަމަށާއި މަޖިލީހުގެ ގަވައިދު 30 ދުވަސް ތެރޭ އިސްލާހުކުރުމަށް މިއަދުގެ ޖަލްސާގައި ހުށަހަޅައި ކޮމިޓީއެއް އެކުލަވައިލިކަމަށް ވެސް ލިއުޝާ ވިދާޅުވިއެވެ.