ހުއިފިލަނޑާ އާލާކޮށް ބޮޑުކުރުމުގެ ޢަމަލީ މަސައްކަތް އިފްތިތާޙުކޮށްފި

ހުއިފިލަނޑާ އާލާކޮށް ބޮޑުކުރުމުގެ ޢަމަލީ މަސައްކަތް ލ. ދަނބިދޫގައި ރަސްމީކޮށް މިއަދު އިފްތިތާހުކޮށްފި އެވެ.
ފިޝަރީޒް މިނިސްޓްރީ އާއި އިންޓަނޭޝަނަލް ފަންޑް ފޯރ އެގްރިކަލްޗަރަލް ޑިވެލޮޕްމަންޓް (އިފާޑް) ގުޅިގެން ކުރިއަށް ގެންދާ މަޝްރޫޢު ފައްޓަވައިދެއްވީ ފިޝަރީޒް މިނިސްޓަރު ޑރ. މުހައްމަދު ޝައިނީ އެވެ.

ރާއްޖޭގެ މެރިކަލް ސިނާއަތް ތަރައްޤީކުރުމަށް ”މެރިކަލްޗަރ އެންޓަޕްރައިޒް ޑިވެލޮޕްމަންޓް ޕްރޮޖެކްޓް“ގެ ނަމުގައި ކުރިއަށްދާ މިމަޝްރޫޢަކީ 5 އަހަރު ދުވަހުގެ މުއްދަތަކަށް ކުރިއަށް ގެންދާ މިމަޝްރޫޢެކެވެ.

އިޝްތިހާރު

މި މަޝްރޫޢުގެ ސަބަބުން ރާއްޖޭގެ މެރިކަލް ސިނާއަތް ތަރައްޤީވެ، ހުއިފިލަނޑާ އާލާކޮށް ބޮޑުކުރުމުގެ ރަނގަޅު މާކެޓެއް އުފެއްދޭނެ ކަމަށް ފިޝަރީޒް މިނިސްޓްރީން ބުނެއެވެ. އަދި މިދާއިރާއިން އެތައް ބަޔަކަށް ވަޒީފާ ލިބި އާމްދަނީ ލިބޭނެ މަގުވެސް ފަހިވެގެންދާނެ ކަމަށް އެ މިނިސްޓްރީން ބުނެއެވެ.

ރާއްޖޭގެ ކުންފުންޏެއް ކަމަށްވާ ބަރަކަތުލް ބަހުރު ނަމަކަށް ކިޔާ ކުންފުންޏާއި މި މަސައްކަތް ޙަވާލުކޮށްފައިވަނީ މިއަހަރުގެ މާރޗުމަހުގެ 24 ވަނަ ދުވަހުއެވެ. ދަނބިދޫ އާއި ކަލައިދޫގެ 100 މީހަކަށް އަމާޒުކޮށްގެން ކުރިއަށް ގެންދާ މިމަޝްރޫޢު ކުރިއަށް ގެންދިއުމަށް އެޑްވާންސް ޕޭމަންޓްގެ ގޮތުގައި 2.4 މިލިއަން ރުފިޔާވެސް ބަހުރު ކުންފުންޏަށް ސަރުކާރުން ވަނީ ދީފައެވެ.

މިމަޝްރޫއުގެ ދަށުން ހުއިފިލަނޑާ އާއި ހުއިފިލަނޑާގެ ކާނާ އާއި ކޮށި ހަދާ ސާމާނާއި ހުއިފިލަނޑާ ބޮޑުކޮށް ގެންގުޅޭނެ ގޮތުގެ ތަމްރީން މިމަސައްކަތަށް ހޮވާ ފަރާތްތަކަށް ބަހުރު ކުންފުނިންދޭނ އިރު، މިމަސައްކަތަށް ހޮވޭ ފަރާތްތަކުން ކުރަންޖެހޭ ހަމައެކަނި ކަމަކީ ހުއިފިލަނޑާތައް ބަލަހައްޓައި ގަޑިން ގަޑިއަށް ކާންދިނުމެވެ.

150 މިލިއަން ރުފިޔާ ޚަރަދުކުރުމަށް ހަމަޖެހިފައިވާ މި މަޝްރޫއުގެ ދަށުން ބައެއް ފަރާތްތަކަށް ބޮލަކަށް 50،000ރ.ގެ ލޯނު ދޫކުރުމަށް ސަރުކާރުން ނިންމާފައިވާ އިރު، މިމަޝްރޫޢުގެ ދަށުން ލޯން ލިބޭ 30 މީހުން މިހާރު ވަނީ ކަނޑައަޅާފައެވެ.