އެއާ އިންޑިއާގެ ފްލައިޓެއް ހައިޖެކް ކުރަން އުޅޭކަމުގެ އިންޒާރަކާ ގުޅިގެން އެލާޓް ވެއްޖެ

ކަލްކަތާ އެއާޕޯޓުން ފުރަން ތައްޔާރުވި އެއާ އިންޑިއާގެ ފްލައިޓެއް ހައިޖެކް ކުރަން އުޅޭކަމުގެ އިންޒާރަކާ ގުޅިގެން ނުރައްކަލުގެ ރަނގަބީލު ޖަހައިފި އެވެ.

މަސްދަރުތަކުން ބުނާ ގޮތުގައި ހައިޖެކް ކުރުމާ ގުޅޭ އިންޒާރުގެ މެސެޖެއް ފެނިފައިވަނީ ބޯޓުގެ ފާޚާނާއެއްގެ ލޯގަނޑުގައި ލިޔެފައިވަނިކޮށެވެ.

އިޝްތިހާރު

މުމްބާއީއަށް ދަތުރުކުރަން އޮތް އެއާ އިންޑިއާގެ ފްލައިޓަކަށް ދިން މި އިންޒާރާ ގުޅިގެން މިއަދު ހެނދުނު ކަލްކަތާގެ ނެތާޖީ ސުބާޝް ޗަންދުރަ ބޯސް އިންޓަނޭޝަނަލް އެއާޕޯޓުގައި ބޮޑު ނުތަނަވަސްކަމެއް އުފެދުނެވެ.

ޚަބަރުތައް ބުނާގޮތުގައި ފާޚާނާގެ ލޯގަނޑުގައި ލިޔެފައިވާ އިންޒާރުގެ މެސެޖު ފެނުނީ ބޯޓު ފުރަން ތައްޔާރުވަމުން ދަނިކޮށެވެ.

މިކަން އެނގުމާއެކު، ބޯޓުގެ ޕައިލެޓް ވަނީ ވަގުތުން އެއާ ޓްރެފިކް ކޮންޓްރޯލް (އޭޓީސީ) އަށް އެކަން އަންގާފަ އެވެ.

މި ހާދިސާއާ ގުޅިގެން ބޯޓު ވަނީ ވަކި ޚާއްޞަ ސަރަޙައްދަކަށް (އައިސޮލޭޝަން ބޭ) ބަދަލުކޮށްފަ އެވެ. އަދި ސެންޓްރަލް އިންޑަސްޓްރިއަލް ސެކިއުރިޓީ ފޯސް (ސީއައިއެސްއެފް) އާއި އެއާޕޯޓުގެ ސަލާމަތީ ފަރާތްތަކުން ގުޅިގެން ދަނީ ބޯޓު ވަރަށް ބޮޑަށް ބަލައި ފާސްކުރަމުންނެވެ.

ބޯޓުގެ އެއްވެސް ހިސާބެއްގައި ނުރައްކާތެރި އެއްޗެއް އޮތްތޯ ބެލުމަށްޓަކައި ހުރިހާ ދިމާއެއް ވަރަށް ފަރުވާތެރިކަމާއެކު ދަނީ ޗެކްކުރަމުންނެވެ.

ފުލުހުންނާއި ސަލާމަތީ އިދާރާތަކުން މިހާރު ވަނީ މި މެސެޖު ލިޔުނު މީހަކު ހޯދުމަށް ތަޙުޤީޤެއް ފަށާފައެވެ. ކަމާބެހޭ އިދާރާތަކުން ދަނީ އެއާޕޯޓާއި ބޯޓުގެ އެތެރޭގައި ހަރުކޮށްފައިވާ ސީސީޓީވީ ކެމެރާތަކުގެ ފުޓޭޖްތައް ބަލައި ދިރާސާކުރަމުންނެވެ.