ނަތަންޔާހޫގެ ސިޔާސީ ނުފޫޒު ކެނޑުނީތަ؟

އިސްރާއީލުގައި ދިރިއުޅޭ ފަލަސްތީނު ރައްޔިތުންގެ ބޭނުންތަކާއި އަޑުތަކަށް ސަރުކާރުން ސީދާ ގޮތެއްގައި އިޖާބަ ނުދޭހާ ހިނދަކު ނަތަންޔާހޫގެ ސިޔާސީ ނުފޫޒު ކެނޑިގެން ނުދާނެ އެވެ.

މި އިންތިޚާބަކީ އިސްރާއީލުގެ ސެކިއުލަރ މެދުފަންތީގެ އިދިކޮޅު ފަރާތްތަކަށާއި އިސްރާއީލުގެ ރައްޔިތުންގެ ގޮތުގައި ތިބި ފަލަސްތީނު މީހުން އަޅުވެތިކަމުގައި ތިބި އެމީހުންގެ އަޚުންނަށް އެހީތެރިވުން ހުއްޓާލާނެ ކަމަށް ގަބޫލުކުރާ އެންމެހައި ފަރާތްތަކަށް ލިބުނު ވަރުގަދަ އިންޒާރެކެވެ.

އިޝްތިހާރު

އިންތިޚާބުގެ ނަތީޖާއިން ހާމަވަނީ ނަތަންޔާހޫއަށް ނާކާމިޔާބީއާ ކުރިމަތިލާން ޖެހުނު ނަމަވެސް އޭނާގެ ސިޔާސީ ބާރު މުޅިން ކެނޑިގެން ނުދާކަމެވެ.

އޭނާ ގަބޫލުކުރާ ގޮތުގައި ޔަހޫދީ ވޯޓުލީ މީހުންނަށް އޭނާ ހުށަހެޅި ހުށަހެޅުންތައް އެއީ، ހަނގުރާމަ ކުރިއަށް ގެންދިއުމާއި ކުއްލި ނުރައްކަލުގެ ހާލަތު ދެމެހެއްޓުމަށް ރައްޔިތުން ވަނީ ރުހުން ދީފަ އެވެ.

7 އޮކްޓޯބަރު 2023 ގައި ހަމާސްއިން ދިން ހަމަލާއަކީ އޭނާގެ އިހުމާލެއް ނޫން ކަމަށާއި އޭގެ ޒިންމާ އުފުލަންޖެހޭނީ އަސްކަރިއްޔާއިން ކަމަށް ނަތަންޔާހޫ ވޯޓުލީ މީހުންގެ ގާތުގައި ބުނެފައިވެ އެވެ.

އޭނާގެ ދައުވާގައިވާ ގޮތުން އަސްކަރީ މެނޭޖްމަންޓް ފެއިލްވުމުން އޭނާ މައިދާނަށް ނުކުމެ 7 އޮކްޓޯބަރުގެ ކުރިއަށްވުރެ އިސްރާއީލަކީ ރައްކާތެރި ތަނަކަށް ވަނީ ހަދާފަ އެވެ. މި ވާހަކަތަކަށް ގިނަ ބަޔަކު ތާއީދުކުރި ކަމަށް ބެލެވެ އެވެ.

2022 ވަނަ އަހަރު ބޭއްވި އިންތިޚާބާ އަޅާބަލާއިރު ނަތަންޔާހޫއާއި އޭނާގެ ބައިވެރިންނަށް ލިބުނު ވޯޓު މަދުވެފައިވާކަން ކަށަވަރެވެ.

އޭނާގެ ކޯލިޝަނަށް 8 އާއި 10 އާ ދެމެދުގެ ގޮނޑި ގެއްލިފައިވާއިރު ސަރުކާރެއް އެކުލަވާލުމަށް ބޭނުންވާ އަޣުލަބިއްޔަތެއް ނުލިބެ އެވެ.

ނަމަވެސް ”ބަދަލަކަށް“ ގޮވާލި އޭނާގެ އިދިކޮޅު ފަރާތްތަކަށް ވެސް އަޣުލަބިއްޔަތު ނުލިބޭނެ ގޮތް ހެދުމުގައި އޭނާ ވަނީ ކާމިޔާބު ހޯދާފަ އެވެ.

މި އިންތިޚާބުގައި ފާހަގަކުރެވޭ އެންމެ އުއްމީދީ ކަމަކީ ފަލަސްތީނު ޕާޓީތަކުގެ ”ޖޮއިންޓް ލިސްޓް“ އިއްތިހާދަށް ލިބުނު ކާމިޔާބީގެ އިތުރުން މަންސޫރު އައްބާސްގެ ”ރާމް“ ޕާޓީއަށް ލިބުނު ކުރިއެރުމެވެ.

ލަފާކުރެވޭ ގޮތުގައި އިސްރާއީލުގެ 120 ގޮނޑީގެ ޕާލަމަންޓް އިން މި ދެ ބަޔަށް ޖުމްލަ 19 ގޮނޑި ލިބޭނެ އެވެ.

މިއީ އިސްރާއީލުގެ ފަލަސްތީނު ސިޔާސީ މުޖުތަމައުގެ ތެރޭގައި ޢަރަބިންގެ ބައިވެރިވުން މިހާ ބޮޑަށް ފެނިގެންދިޔަ ތާރީޚީ ފަހަރެކެވެ.

އައްބާސް ޖޮއިންޓް ލިސްޓުން ވަކިވީ ޒަޔަނިސްޓް ޔަހޫދީ ޕާޓީތަކާ ގުޅިގެން ފަލަސްތީނު މުޖުތަމައަށް ފައިދާތަކެއް ހޯދައިދިނުމުގެ މަގުސަދުގަ އެވެ.

ފަހުގެ އިންތިޚާބުތަކުގައި އޭނާއަށް މިކަމުގައި ކޮންމެވެސް ވަރެއްގެ ކާމިޔާބީއެއް ލިބިފައިވެ އެވެ.

އެހެންނަމަވެސް ރާމް ޕާޓީއަށްވުރެ ދެގުނަ އިތުރަށް ޖޮއިންޓް ލިސްޓަށް ވޯޓު ލިބިފައިވާކަން ފާހަގަކުރަންޖެހެ އެވެ.

އިސްރާއީލުގެ އާބާދީގެ 20 އިންސައްތަ ހިއްސާކުރާ ފަލަސްތީނުގެ މަދުބަޔަކީ އާންމުކޮށް ސިޔާސީ މައިދާނުން އެކަހެރިކޮށްފައި ތިބޭ ބައެއް ނަމަވެސް މިހާރު އެމީހުން ވަނީ ސިޔާސީ މަސްރަހުގެ މައި މައިދާނަށް ނުކުމެ އެމީހުންގެ ބާރު ދައްކާފަ އެވެ.

ނަތަންޔާހޫ އިދިކޮޅު ލީޑަރު ގަޑީ އައިސެންކޮޓްއާ ގުޅިގެން އެއްބައިވަންތަކަމުގެ ސަރުކާރެއް އެކުލަވާލި ކަމުގައިވިޔަސް ފަލަސްތީނު ބްލޮކަށް މިވަނީ ކާމިޔާބީ ލިބިފަ އެވެ.

އެއީ އެފަދަ ކޯލިޝަނެއްގައި ހަރުކަށި ޔަހޫދީން ކަމަށްވާ އިތަމާރު ބެން ގްވީރް އާއި ބެޒަލެލް ސްމޮޓްރިޗް ހިމެނުމުގެ ފުރުސަތު ކުޑަވުމުންނެވެ.

ގިނަ އަދަދެއްގެ ފަލަސްތީނު ރައްޔިތުން ވޯޓުލާން ނުކުތް މައިގަނޑު ސަބަބަކީ ނަސްލީ ތަފާތުކުރުން ގެންގުޅޭ މި ދެމީހުން ސަރުކާރުން ދުރުކުރުމެވެ.

މީގެ އިތުރުން އިސްރާއީލުގެ ފަލަސްތީނު ރައްޔިތުން މިވަނީ ލިބަރަލް ސެކިއުލަރ ޒަޔަނިސްޓުންނަށް ވަރުގަދަ ފިލާވަޅެއް ދަސްކޮށްދީފަ އެވެ.