ސަޢޫދީ އާއި އެމެރިކާއިން ޔަމަނުގެ މަސްރަހާއި ކަނޑުގެ ރައްކާތެރިކަމާ ގުޅޭގޮތުން މަޝްވަރާކޮށްފި

ސަޢޫދީ ޢަރަބިއްޔާއާއި އެމެރިކާއިން ޔަމަނުގެ މަސްރަހާއި ކަނޑުގެ ސަލާމަތާއި ރައްކާތެރިކަމާ ގުޅޭގޮތުން މަޝްވަރާކޮށްފި އެވެ.

މިދިޔަ ހޯމަ ދުވަހު ސަޢޫދީ ޢަރަބިއްޔާގެ ޚާރިޖީ ވަޒީރު އެމެރިކާގެ ސްޓޭޓް ޑިޕާޓްމަންޓުގައި އެ ޤައުމުގެ ޚާރިޖީ ވަޒީރާ ބައްދަލުކުރައްވާފައިވަނީ، ދެ ޤައުމުގެ ގުޅުން ބަދަހިކުރުމަށާއި މެދުއިރުމަތީގެ ސަލާމަތީ ގޮންޖެހުންތަކާ ގުޅިގެން ގުޅިގެން މަސައްކަތްކުރުމަށެވެ.

އިޝްތިހާރު

ވޮޝިންޓަނުގައި ހުންނަ ސަޢޫދީ އެމްބަސީން ބުނި ގޮތުގައި، ޕްރިންސް ފައިސަލް ބިން ފަރުހާން އާއި މާކޯ ރޫބިއޯ ވަނީ ސަޢޫދީ އާއި އެމެރިކާގެ ”ސްޓްރެޓީޖިކް“ ގުޅުމާ ބެހޭގޮތުންނާއި، އެކި ދާއިރާތަކުން އެއްބާރުލުން އިތުރުކުރެވޭނެ ގޮތްތަކާ ބެހޭގޮތުން މަޝްވަރާކުރައްވާފަ އެވެ.

އެމްބަސީން އެކްސްގައި ކުރި ޕޯސްޓެއްގައި ބުނެފައިވަނީ، ސަރަހައްދީ އަދި ބައިނަލްއަޤްވާމީ ކުރިއެރުންތަކުގެ އިތުރުން ޔަމަނުގެ ހާލަތާއި އެކަމަށް ހައްލެއް ހޯދުމަށް ކުރެވެމުންދާ މަސައްކަތްތަކާ ބެހޭގޮތުން ވެސް ދެ ބޭފުޅުން ވާހަކަދެއްކެވި ކަމަށެވެ.

މި ބައްދަލުވުމުގައި، ސަރަހައްދީ ހަމަޖެހުމަށާއި ދުނިޔޭގެ ވިޔަފާރި އާއި މުދާ އުފުލުމުގެ ނިޒާމަށް ބުރޫނާރާނެހެން ކަނޑުގެ ސަލާމަތާއި ރައްކާތެރިކަން ކަށަވަރުކުރުމުގެ މުހިންމުކަމުގެ މައްޗަށް އަލިއަޅުވާލާފައިވެ އެވެ.

ވަކިން ޚާއްޞަކޮށް ހޯރްމޫޒް ކަނޑުއޮޅި އާއި ބާބުލް މަންދަބް ސަރަހައްދުގައި ދަތުރުފަތުރުގެ މިނިވަންކަން ދެމެހެއްޓުމާ ގުޅޭގޮތުން މަޝްވަރާކުރެވުނެވެ.

ޕްރިންސް ފައިސަލް އާއި ރޫބިއޯ ވަނީ ދެ ޤައުމުގެ މަސްލަހަތު ހިމެނޭ ކަންކަމުގައި ގުޅިގެން މަސައްކަތްކުރުމުގެ މުހިންމުކަން ތަކުރާރުކުރައްވައި، ސަރަހައްދީ ސަލާމަތާއި އަމާންކަން ޤާއިމުކުރުމަށް ކުރެވޭ ޑިޕްލޮމެޓިކް މަސައްކަތްތަކަށް އެއްބާރުލުން ދެއްވާނެކަން ހާމަކުރައްވާފަ އެވެ.

އެމެރިކާގެ ސްޓޭޓް ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، އީރާން، ގާޒާ، ލުބުނާން އަދި ސޫދާން ފަދަ ސަރަހައްދީ މައްސަލަތަކާއި، ސަރަހައްދީ ސަލާމަތާއި ހަމަޖެހުމާ ގުޅޭގޮތުން ދެ ޤައުމުން އިތުރަށް ގުޅިގެން މަސައްކަތްކުރުމާ ބެހޭގޮތުން ވެސް މި ބައްދަލުވުމުގައި މަޝްވަރާކުރެވުނު ކަމަށެވެ.