ރައީސް ޔާމީންގެ އިޤްތިޞާދީ ސިޔާސަތު ބޭރު ދުނިޔެއިން ބަލައިގެންފި: މިނިސްޓަރ ސަޢީދު

ނިއުދިއްލީގައި މިއަދު ކުރިއަށް ދިޔަ ތިންވަނަ މޯލްޑިވްސް އިންވެސްޓްމެންޓް ފޯރަމް ނިންމާލުމަށްފަހު ނޫސްވެރިންނަށް މަޢުލޫމާތު ދެއްވަމުން އިކޮނޮމިކް މިނިސްޓަރ މުޙައްމަދު ސަޢިދު ވިދާޅުވީ ރައީސް ޔާމީންގެ އިޤްތިޞާދީ ސިޔާސަތު ބޭރު ދުނިޔެއިން ބަލައިގެންފި ކަމަށެވެ.

އަދި އެންމެ ބޮޑު ޔަޤީންކަމަކީ ރައީސް ޔާމީން ގެންގުޅުއްވާ އިޤްތިޞާދީ ހަރުދަނާ ސިޔާސަތު ކަމަށާއި މި ފޯރަމްގެ ތެރެއިން ރާއްޖެ، ޑެސްޓިނޭޝަނެއްގެ ގޮތުގައި މާކެޓު ކުރެވޭ އިރު، ޓުއަރިޒަމް ނޫން ދާއިރާތަކުން އިންވެސްޓު ކުރުމުގެ ފުރުޞަތުވެސް ހުޅުވިގެންދާ ކަމަށެވެ.

އިޝްތިހާރު

އަދި ފޯރަމްގެ ސަބަބުން ބޭރުގެ ފަރާތްތަކަށް ރާއްޖެއާ މެދު އިތުބާރު ބޮޑުވާ ކަމަށާއި އެކަމުގެ ހިތްހަމަޖެހުން ލިބޭ ކަމަށާއި މި ފޯރަމްގެ ސަބަބުން އިންޑިއާގެ ވިޔަފާރިވެރިންގެ ލޯތައް ކުރިއަށް ވުރެ އިތުރަށް ހުޅުވި، ރާއްޖެއާ ދޭތެރޭގައި ވަރަށް ޕޮޒިޓިވް ކަމަށެވެ.

ތާޖު ޕެލެސް ހޮޓެލްގެ ޖަލްސާކުރާ ތިން މާލަމެއްގައި ބޭއްވި މި ފޯރަމަށް ޒިޔާރަތް ކުރި ވިޔަފާރިވެރިންނަށް ރާއްޖޭގައި އިންވެސްޓް ކުރެވިދާނެ ދާއިރާތަކުގެ މަޢުލޫމާތު ވަނީ ހިއްސާ ކޮށްފައެވެ.

މިއަހަރުގެ އިންވެސްޓްމެންޓް ފޯރަމް އިންޑިއާގައި ނިންމާލާފައިވާ އިރު، އަންނަ އަހަރު މި ފޯރަމް ބޭއްވުމަށް ހަމަޖެހިފައިވަނީ ޤަތަރުގެ ވެރިރަށް ދޯހާގައެވެ.

އިންޑިއާގެ ވެރިރަށް ނިއުދިއްލީގައި ހުންނަ ތާޖް ޕެލެސް ހޮޓެލްގައި ބޭއްވި މޯލްޑިވްސް އިންވެސްޓްމެންޓް ފޯރަމް 2016 އިންތިޒާމުކުރީ ދިވެހި ސަރުކާރުގެ ފަރާތުން މިނިސްޓްރީ އޮފް އިކޮނޮމިކް ޑިވެލޮޕްމެންޓާއި އިންޑިއާގެ ވިޔަފާރިވެރިންގެ ޖަމިއްޔާ، ފެޑަރޭޝަން އޮފް އިންޑިއަން ޗެމްބާ އޮފް ކޮމާސް އެންޑް އިންޑަސްޓްރީ (ފިކީ)އާ ގުޅިގެންނެވެ.