ކަސްޓަމްސްގެ ހުއްދަ ނުހޯދާ ރަސްމީ ބަނދަރުނޫން އެހެން ބަނދަރަކަށް ދަތުރުކުރި އުޅަނދެއް ޖޫރިމަނާކޮށްފި
ކަސްޓަމްސްގެ ހުއްދަ ނުހޯދާ ރަސްމީ ބަނދަރުނޫން އެހެން ބަނދަރަކަށް ދަތުރުކުރި އުޅަނދެއް ޖޫރިމަނާކޮށްފިއެވެ.
މިއީ ހުޅުމާލެ ސޭފް އެންކަރޭޖްގައި އޮތުމަށް 13 ސެޕްޓެމްބަރ 2016 އިން 12 އޮކްޓޯބަރ 2016 އަށް އިންޓަރ އެޓޯލް ޕަރމިޓް ދޫކުރެވިފައިވަނިކޮށް ކަސްޓަމްސްގެ ހުއްދަ ނުހޯދާ ރަސްމީ ބަނދަރުފިޔަވާ އެހެން ތަނަކަށް (ވ. ރަކީދޫ) ދަތުރުކޮށްފައިވާ އުޅަނދެކެވެ.
މި އުޅަނދު ޖޫރިމަނާކުރީ ކަސްޓަމްސް ޤާނޫނުގެ 60 ވަނަ މާއްދާގެ (ހ) އަށް ރިޢާޔަތްކޮށް ކަސްޓަމްސް ޢާންމު ޤަވާޢިދުގެ 550 ވަނަ މާއްދާގެ (ރ) ގެ 12 ވަނަ ނަމްބަރުގެ ދަށުންނެވެ.
ކަސްޓަމްސް ޢާންމު ޤަވާޢިދުގެ 550 ވަނަ މާއްދާގެ (ރ) ގެ 12 ގައި ބަޔާންކޮށްފައިވަނީ ރާއްޖެއިން ބޭރުން އަންނަ އުޅަނދުފަހަރު ކަސްޓަމްސްގެ ހުއްދަނެތި ރަސްމީ ބަނދަރުތައް ފިޔަވައި އެހެން ތަންތަނަށް ދަތުރުކޮށްފިނަމަ 30،000 (ތިރީސްހާސް) ރުފިޔާއިން ޖޫރިމަނާކުރެވޭނެކަމަށެވެ.
މިގޮތުން މިއުޅަނދުގެ އެޖެންޓް 30،000 (ތިރީސްހާސް) ރުފިޔާއިން ޖޫރިމަނާކޮށް 3 ދުވަހުގެތެރޭގައި ފައިސާ ކަސްޓަމްސް އަށް ދެއްކުމަށް ވަނީ އަންގާފައެވެ.
ރަސްމީ ބަނދަރުތަކުގެ ގޮތުގައި މިހާރު ކަނޑައަޅާފައިވަނީ މާލޭ ކޮމަރޝަލް ހާބަރ، އިބުރާހިމް ނާޞިރު އިންޓަރނޭޝަނަލް އެއަރޕޯޓް، ހަނިމާދޫ އިންޓަރނޭޝަނަލް އެއަރޕޯޓް، ކުޅުދުއްފުށީ ސަރަހައްދީ ބަނދަރު، ގަން އިންޓަރނޭޝަނަލް އެއަރޕޯޓް އަދި ހިތަދޫ ސަރަހައްދީ ބަނދަރެވެ.
މިލިޔުން ކިޔާލުމުން
