މީޑިއާ ކޮންޓެންޓް ޕްލެޓްފޯމް އައިފްލިކްސް ރާއްޖެއަށް ތަޢާރަފްކޮށްފި

ދިވެހިރާއްޖޭގެ ގުޅުން ޕްރައިވެޓް ލިމިޓެޑް (ދިރާގު) ން ތަޢާރަފްކުރި އައިފްލިކްސް އަކީ ދުނިޔޭގެ އެންމެ ކުރިއަރަމުން އަންނަ މީޑިއާ ކޮންޓެންޓް ޕްލެޓްފޯމެކެވެ.

މި ޚިދުމަތް ތަޢާރަފް ކޮށްދެއްވީ ދިރާގުގައި ރޭ ބެއްވި ޚާއްޞަ ރަސްމިއްޔާތެއްގައި ދިރާގުގެ ޗީފް މާކެޓިންގ އޮފިސަރު އިޒަބެލް ހާޖްރީ އާއި އައިފްލިކްސްގެ ހެޑް އޮފް ނިއު މާކެޓްސް މާޓިން ޖޮހެންސަން އެވެ.

އިޝްތިހާރު

ފުރަތަމަ 3 މަސް ދުވަހު ހިލޭ ދިނުމަށް ހަމަޖައްސާފައިވާ މި ޚިދުމަތާއި ބެހޭގޮތުން އިޒަބެލް ވިދާޅުވީ ދިރާގުން އަބަދުވެސް ބަލަނީ ޓެކްނޮލޮޖީއާ ގުޅުން ހުރި ދުނިޔޭގެ މަޝްހޫރު ހިދުމަތްތައް ބޭނުން ކުރުމުގެ ފުރުޞަތު ދިވެހިންނަށް ހޯދައިދޭން ކަމަށެވެ. އަދި އައިފްލިކްސް ފަދަ ޚިދުމަތެއް ރާއްޖެއަށް ތަޢާރަފް ކުރުމަކީ ދިރާގަށް ލިބޭ ވަރަށް ބޮޑު އުފަލެއްކަމަށްވެސް އޭނާ ވިދާޅުވިއެވެ.

އައިފްލިކްސްގެ ފަރާތުން މާޓިން ވިދާޅުވީ އައިފްލިކްސް ވެގެންދާނީ ދިވެހިންގެ ތެރޭގައި މަޤްބޫލް ޚިދުމަތަކަށް ކަން ޔަޤީން ކަމަށާއި ޓެކްނޮލޮޖީގެ އެންމެ ފަހުގެ އާލާތްތައް ދިވެހިން ބޭނުންކުރާ މިންވަރު ވަރަށް ބޮޑަށް އެނގޭ ކަމަށެވެ.

ހަމައެކަނި ދިރާގުގެ ނެޓްވޯކުގައި ރާއްޖޭގައި ބޭނުން ކުރެވޭ އައިފްލިކްސް ތަޢާރަފް ކުރުމާއެކު ދިރާގުން ފަށާފައިވާ ޚާއްޞަ ޕްރޮމޯޝަންގެ ދަށުން އެ ޚިދުމަތަށް ސަބްސްކްރައިބް ކުރުމުން ފުރަތަމަ ތިން މަސްދުވަހު ހިލޭ އައިފްލިކްސްގެ ލައިބްރަރީގައި ހިމެނޭ ހުރިހާ އެއްޗެއް ބަލައިލުމުގެ ފުރުޞަތު ލިބޭނެއެވެ.

މެލޭޝިއާގެ އައިފްލިކްސް ކުންފުނިން މިހާރުވެސް އަންނަނީ ތައިލެންޑް، ފިލިޕީންސް، އިންޑޮނޭޝިއާ، ބްރޫނާއީ އަދި ސްރީލަންކާގައިވެސް މި ޚިދުމަތްދެމުންނެވެ.