އޮކްޓޯބަރު މަހު މީރާއަށް 888.4 މިލިއަން ރުފިޔާ ބަލައިގެންފި

ވޭތުވެދިޔަ އޮކްޓޯބަރު މަހު މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް 888.4 މިލިއަން ރުފިޔާ ބަލައިގެންފައިވާކަމަށް އެ އޮތޯރިޓީން ހާމަކޮށްފިއެވެ.

މި އާއެކު މި އަހަރުގެ އޮކްޓޯބަރު މަހުގެ ނިޔަލަށް ބަލައިގަތް ޖުމްލަ އާމްދަނީ 12.30 ބިލިއަން ރުފިޔާއަށް އަރާއިރު، މިއީ 2015 ވަނަ އަހަރުގެ މި މުއްދަތާއި އަޅާބަލާއިރު %9.2 އިތުރު ޢަދަދެކެވެ.

އިޝްތިހާރު

އޮކްޓޯބަރު މަހު ބަލައިގަތް އާމްދަނީގެ އެންމެ ބޮޑު ބައެއް  ޖީއެސްޓީ ހިއްސާކުރި އިރު އެއީ %61.4 ނުވަތަ 545.18 މިލިއަން ރުފިޔާއެވެ. ދެން އެންމެ ބޮޑު އާމްދަނީއެއް ލިބިފައިވަނީ ޓޫރިޒަމް ލޭންޑް ރެންޓް (101.02 މިލިއަން ރުފިޔާ ނުވަތަ %11.4) އިންނެވެ.

ބީ.ޕީ.ޓީ (48.98 މިލިއަން ރުފިޔާ ނުވަތަ %5.5)، އެހެނިހެން ޓެކުހާއި ފީ (112.74 މިލިއަން ރުފިޔާ ނުވަތަ %12.7) އަދި ޖޫރިމަނާ ގެ ގޮތުގައި (31.54 މިލިއަން ރުފިޔާ ނުވަތަ %3.6) ލިބިފައިވެއެވެ.

މީރާއިން ޢާންމުކުރި ތަފާސްހިސާބުގައިވާ ގޮތުން މި އަހަރުގެ އޮކްޓޯބަރު މަހު ބަލައިގަތް އާމްދަނީ 2015 ވަނަ އަހަރުގެ އެ މުއްދަތާ އަޅައިބަލާއިރު %23.8 ވަނީ އިތުރުވެފައެވެ. އޭގެ މައިގަނޑު އެއްސަބަބަކީ މި އަހަރުގެ 3 ވަނަ ކުއާޓަރގައި ޖީ.އެސް.ޓީގެ ގޮތުގައި ދައްކާފައިވާ ޢަދަދު އިތުރުވުން ކަމުގައި މީރާއިން ހާމަކުރެއެވެ.

އޮކްޓޯބަރު 2016 ގައި މީރާއިން ބަލައިގަތް އާމްދަނީގެ ތެރޭގައި 34.5 މިލިއަން އެމެރިކާ ޑޮލަރުވެސް ހިމެނެއެވެ.