މީރާގެ އޮޑިޓް ނޯޓިސް އަކާ ގުޅިގެން އިސްތިއުނާފު ނުކުރެވޭނެކަމަށް ހައިކޯޓުން ނިންމައިފި

ޓެކްސް ދައްކާ ފަރާތްތަކަށް މީރާއިން ފޮނުވާ އޮޑިޓް ނޯޓިސްއަކާ ގުޅިގެން އިސްތިއުނާފު ނުކުރެވޭނެ ކަމަށް ހައިކޯޓުން ނިންމައިފިއެވެ.

އަދި އެ ފުރުޞަތު ލިބޭނީ އެ ނޯޓިސްއާ ގުޅިގެން މީރާއިން ކުރާ އޮޑިޓަކުން ޢަދަދެއް ކަނޑައެޅުމަށްފަހު އެކަން ޓެކްސް ދައްކާ ފަރާތަށް އެންގުމުން ޓެކްސް ނެގުމާބެހޭ އިދާރީ ޤާނޫނުގައި ބަޔާންކުރާ ހަމަތަކުގެ މަތިން ކަމުގައިވެސް ދިވެހިރާއްޖޭގެ ހައިކޯޓުން ވަނީ ޙުކުމް ކޮށްފައެވެ.

އިޝްތިހާރު

ހައިކޯޓުން މިގޮތަށް ނިންމީ ޓްރެވަލް ލޭންޑް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކަށް މީރާއިން ފޮނުވި އޮޑިޓް ނޯޓިސް އަކާ ގުޅިގެން، ޓެކްސް އެޕީލް ޓްރައިބިއުނަލްގައި އިސްތިއުނާފު ކުރުމުން އެ މައްސަލަ ޓްރައިބިއުނަލް އިން ބެލޭނެކަމަށް ކަނޑައެޅުމުން މީރާއިން އެ މައްސަލަ ހައިކޯޓުގައި އިސްތިއުނާފުކުރުމާ ގުޅިގެން ޓްރައިބިއުނަލްގެ ނިންމުން ބާޠިލުކުރުމަށްފަހުއެވެ.

މި މައްސަލަ ޓްރެވަލް ލޭންޑް ޕްރައިވެޓް ލިމިޓެޑުން ސިވިލް ކޯޓަށް ހުށަހެޅުމުން އެ ކޯޓުން ވަނީ ޓެކްސްގެ މައްސަލަތައް އިސްތިއުނާފުކުރުމުގެ ފުރަތަމަ މަރުހަލާގައި ބެލުމުގެ އިޙްތިޞާޞް އެ ކޯޓަށް ލިބިގެން ނުވާކަމަށް ނިންމަވާފައެވެ.

އަދި އެ ނިންމުން ޓްރެވަލް ލޭންޑް ޕްރައިވެޓް ލިމިޓެޑުން ހައިކޯޓުގައި އިސްތިއުނާފު ކުރުމުން ހައިކޯޓުންވެސް ވަނީ ސިވިލް ކޯޓުގެ ޙުކުމަށް ތާއީދު ކޮށްފައެވެ.

ޓެކްސް ނެގުމާބެހޭ އިދާރީ ޤާނޫނުގައި ވާގޮތުން މީރާގެ ނިންމުމަކާމެދު ޓެކްސް ދައްކާ ފަރާތަކުން އިއުތިރާޒު ކުރާނަމަ ހުށަހަޅަން ޖެހެނީ މީރާއަށެވެ. އެއީ އެފަދަ ނިންމުމެއް އެންގި ތާރީޚުން ފެށިގެން 30 ދުވަހުގެ ތެރޭގައެވެ.

އެ މައްސަލަ މީރާއިން ބެލުމަށްފަހު ނިންމި ގޮތާމެދު ހިތްހަމަ ނުޖެހޭނަމަ، އެ ނިންމުން އެންގި ތާރީޚުން ފެށިގެން 30 ދުވަހުގެ ތެރޭގައި ޓެކްސް އެޕީލް ޓްރައިބިއުނަލްގައި އިސްތިއުނާފު ކުރެވިދާނެއެވެ. ނަމަވެސް އެއީ އެ ވަގުތަކަށް އެ ފަރާތުން ދައްކަންޖެހޭ އެންމެހައި ފައިސާ ދެއްކުމަށް ފަހުގައެވެ.