ފަތުރުވެރިކަމާ ތިމާވެއްޓާބެހޭ ވުޒާރާގެ ސްޓޭޓް މިނިސްޓަރު، ފޯ ސީޒަންސް ސާފިން ޗެމްޕިއަންސް ޓްރޮފީގައި ބައިވެރިވެވަޑައިގެންފި

ފަތުރުވެރިކަމާ ތިމާވެއްޓާބެހޭ ވުޒާރާގެ ސްޓޭޓް މިނިސްޓަރު ޑރ. ޢަބްދުﷲ ނިޔާޒާއި މިނިސްޓްރީގެ އިސްވެރިންގެ ވަފުދެއް، ދުނިޔޭގެ މަޝްހޫރު ފޯ ސީޒަންސް މޯލްޑިވްސް ސާފިން ޗެމްޕިއަންސް ޓްރޮފީ 2025 ގެ 13 ވަނަ އެޑިޝަންގައި ބައިވެރިވެވަޑައިގެންފިއެވެ. މި މުބާރާތް ކުރިއަށް ދަނީ ފޯ ސީޒަންސް މޯލްޑިވްސް ކުޑަހުރާގަ އެވެ.

މިފަދަ ބައިނަލްއަޤްވާމީ ފެންވަރުގެ ކުޅިވަރު މުބާރާތްތަކުގައި ސަރުކާރުގެ އިސްވެރިން ބައިވެރިވެވަޑައިގަތުމަކީ، ދިވެހިރާއްޖޭގެ ފަތުރުވެރިކަމަށް، ޚާއްސަކޮށް ސާފް ޓޫރިޒަމް ކުރިއެރުވުމަށް ލިބޭ ވަރަށް ބޮޑު ހިތްވަރެކެވެ. ރާއްޖޭގެ ރީތި ރާޅުތަކާއި ހިތްފަސޭހަ މާހައުލަކީ ދުނިޔޭގެ ސާފަރުންގެ މެދުގައި ވަރަށް ބޮޑަށް މަގުބޫލުކަން ހޯދާފައިވާ ކަމެކެވެ.

އިޝްތިހާރު

ފޯ ސީޒަންސް ސާފިން ޗެމްޕިއަންސް ޓްރޮފީއަކީ ސާފިންގެ ރީތިކަމާއި، މުޖުތަމަޢުގެ ބައިވެރިވުމާއި، ދިވެހިރާއްޖޭގެ ދުނިޔޭގެ ފެންވަރުގެ ރާޅުތައް ފާހަގަކުރުމަށް ބާއްވާ ހުނަރުވެރި މުބާރާތެކެވެ. މި މުބާރާތުގެ ތެރެއިން، ރާއްޖޭގެ ހިތްގައިމު ގުދުރަތީ ރީތިކަމާއި، މެހެމާންދާރީގެ ސިފަތައް ދުނިޔެއަށް ފެނިގެންދާނެކަމަށް އުންމީދު ކުރެވެއެވެ. މިފަދަ މުބާރާތްތަކުގެ ސަބަބުން ދިވެހިރާއްޖެއަކީ ދުނިޔޭގެ ފެންވަރުގެ ސާފިން މަންޒިލެއްގެ ގޮތުގައި އިތުރަށް ބަދަހިވެ، ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ލިބިގެންދާނެ އެވެ.