ދެ ދުވަހުގެ ތެރޭގައި އެތެރޭގެ އުދުހުންތަކުގެ އަގުހެޔޮކުރެވޭނެ: މިނިސްޓަރ ނަހުލާ
ޑޮމެސްޓިކް އުދުހުންތަކުގެ އަގުހެޔޮކޮށް ކުރިއަށް އޮތް ދެ ދުވަހުގެ ތެރޭގައި އިއުލާނުކުރާނެ ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު އާއިޝަތު ނަހުލާ ވިދާޅުވެއްޖެ އެވެ.
އެ މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި މިކަން އިއުލާނުކުރަމުން މިނިސްޓަރު ނަހުލާ ވިދާޅުވީ ޑޮމެސްޓިކް އުދުހުންތަކުގެ އަގުހެޔޮކުރުމަށް ކުރަމުން އަންނަ މަސައްކަތް ގާތްގަނޑަކަށް މިހާރު ނިމިފައިވާކަމަށެވެ.
ނަހުލާ ވިދާޅުވީ މިހާރު ކުރަމުންގެންދާ މަސައްކަތަކީ އަގުތަށް ފައިނަލް ކުރުމުގެ މަސައްކަތް ކަމަށެވެ. އެހެން ކަމުން އެ މަސައްކަތްވެސް ނިމި ކުރިޔަށް އޮތް ދެދުވަސްތެރޭގައި އެތެރޭގެ އުދުހުންތަކުގެ އަގު ހެޔޮކުރާނެ ކަމަށްވެސް މިނިސްޓަރ ނަހުލާ ވިދާޅުވިއެވެ.
“ މަސައްކަތުގެ 60 ޕަސަންޓް މިހާރު ވަނީ ނިމިފަ. އެހެންކަމުން އުންމީދުކުރަނީ ކުރިއަށް އޮތް ދެ ދުވަހެއްގެ ތެރޭގައި އަޅުގަނޑުމެންނަށް އެއްކޮށް އެކަންތައް ނިންމާލެވޭނެކަމަށް“ މިނިސްޓަރ ނަހުލާ ވިދާޅުވިއެވެ.
ނަހުލާ ވިދާޅުވީ އުދުހުންތަކުގެ އަގުހެޔޮކުރަން ސިވިލް އޭވިއޭޝަން އޮތޯރިޓީއާއެކު މަސައްކަތްކޮށް އަގުތަކެއް މިހާރު ކަނޑައަޅާފައިވާ ކަމަށާއި އެހެން ނަމަވެސް އެކަން ފައިނަލް ކުރާނީ ކަމާބެހޭ ހުރިހާ ފަރާތްތަކާ މަޝްވަރާކުރުމަށްފަހުގައި ކަމަށެވެ.
އޭނާ ވިދާޅުވި ހެޔޮކުރާ އަގުތައް އިއުލާނުކުރިނަމަވެސް އެކަމަށް އަމަލުކުރަން ދެތިން ހަފްތާއެއްވަރު ނަގާނެކަމަށެވެ. އެތެރޭގެ އުދުހުންތަކުގެ އަގު ހެޔޮ ކުރުމަކީ ރައީސް ޞޯލިހުގެ ރިޔާސީ 100 ވައުދުގެ ތެރެއިން ވައުދެކެވެ.
މިލިޔުން ކިޔާލުމުން
