ގުރައިދޫ ތުއްތޮންބެ ކަޕް ފަށައިފި

މާލެ އަތޮޅު ގުރައިދޫަގއި ބާއްވަމުން އަންނަ ތުއްތޮންބެ ކަޕް މިއަދު ހަވީރު ފަށައިފިއެވެ.

ރައްޔިތުންގެ މަޖިލީހުގެ ކ. ގުރައިދޫ ދާއިރާގެ މެމްބަރު އަލް އުސްތާޛު އިބްރާހިމް ރިޒާ ބާއްވަމުން އަންނަ ’ތުއްތޮންބެ ކަޕް’ގެ ފުރަތަމަ މެޗުގައި މިއަދު ބައްދަލުކުރީ ބީޑަބްލިއުބީ އާއި ކުޑަސިޓީ އެފްސީއެވެ.

އިޝްތިހާރު

މި މެޗުު 0-6 ލަނޑުން ކާމިޔާބުކުރީ ކުޑަސިޓީ އެފްސީއެވެ. މި މެޗުގެ މޭން އޮފް ދަ މެޗުގެ މަޤާމަށް ހޮވިފައިވަނީ ދިވެހި ޤައުމީ ފުޓްބޯޅަ ޓީމަށްވެސް ކުޅޭފައިވާ އަދި ގްރީން ސްޓްރީޓްގެ ކެޕްޓަން އަސްއަދު ޢަލީ (އަޑޭ)އެވެ.

އެއްއަހަރުގެ މެދުކެނޑުމަކަށްފަހު ބޭއްވި މިއަހަރުގެ މުބާރާތުގައި 6 ޓީމަކުން ވަނީ ބައިވެރިވެފައެވެ. އެއީ ބީޑަބްލިއުބީ، ކުޑަސިޓީ އެފްސީ، ހަޓް އެފްސީ، ސިކްސް އެކްސް، އޯލް އެޓޭކް އެފްސީ އަދި ޗެލެންޖަރސް އެފްސީއެވެ.

މިއަހަރުގެ މުބާރާތުގައި ގްރޫޕް ސްޓޭޖުގެ 15 މެޗާއި ސެމީފައިނަލުގެ 2 މެޗާއި ފައިނަލް މެޗާއެކު ޖުމްލަ 18 މެޗު ކުޅުމަށް ވަނީ ތާވަލުކޮށްފައެވެ.

ރަށުގެ ޒުވާނުންގެ މެދުގައި ފުޓްބޯޅައިގެ ހުނަރު އިތުރުކުރުވާ، މުބާރާތްތަކުގައި ވާދަކޮށް، ވާދަވެރި މެޗުތަކަށް ހޭނުވުމާއި ހުރިހާ ޒުވާނުން އެއްމާޙައުލަކުން ބައްދަލުވެ، އެކުވެރިކަމާއެކު އުޅުމުގެ މަގު ފަހިކޮށްދިނުމުގެ މަޤުޞަދުގައި ބާއްވާ މި މުބާރާތް ކުޅެނީ ކ. ގުރައިދޫ ފުޓްބޯޅަ ދަނޑުގައެވެ.