އެމްޓީސީސީގެ ޔަންމާ ސާރވިސް ކެމްޕެއިން ފަށައިފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ޔަންމާ ސާރވިސް ކެމްޕެއިން ފަށައިފިއެވެ.

އެމްޓީސީސީ އާއި ޔަންމާ އޭޝިއާ ގުޅިގެން މިއަދުން ފެށިގެން މި މަހުގެ 29ގެ ނިޔަލަށް ކުރިޔަށް ގެންދާ މި ކެމްޕެއިނަކީ ކަސްޓަމަރުން ހޭލުންތެރިކުރުވުމާއެކު ކުންފުންޏާއި ކަސްޓަމަރުންނާއި ދެމެދު އޮންނަ ގުޅުން ބަދަހިކޮށް ގާތް ގުޅުމެއް ދެމެހެއްޓުމުގެ މަޤުޞަދުގައި ކުރިއަށް ގެންދާ ކެމްޕޭނެކެވެ.

އިޝްތިހާރު

ޔަންމާ ސާރވިސް ކެމްޕެއިންގެ ދަށުން މާލޭ ނޯތު ހާބަރުގައި އެމްޓީސީސީ އަދި ޔަންމާ އޭޝިއާގެ ޓެކްނިކަލް ޓީމުން މިއަދާއި މާދަމާ ހަރަކާތްތެރިވަމުންދާ އިރު، މި ކެމްޕެއިންގެ ތެރެއިން ޔަންމާގެ ޓެކްނިކަލް ޓީމްތަކުން ޔަންމާ އިންޖީން އަޅާފައިވާ އޮޑިފަހަރަށް ޒިޔާރަތްކޮށް އިންޖީނުތައް ސާރވޭ ކުރުމާއި ކަސްޓަމަރުންނަށް ޖެނުއިން ސްޕެއަރ ޕާރޓްސްގެ މުހިއްމުކަން ހާމަކޮށްދިނުމަށް ވަނީ ހަމަޖެހިފައެވެ. އަދި ހޭލުންތެރި ކުރުމުގެ ހަރަކާތްތަކެއްވެސް ކުރިއަށް ގެންދާނެއެވެ.

މާލެއިން ބޭރުގައިވެސް މި ކެމްޕެއިންގެ ހަރަކާތްތަކެއް ކުރިއަށް ގެންދިއުމަށް ނިންމާފައިވާ އިރު، އެމްޓީސީސީ އިން ބުނީ އަމާޒަކީ މިފަދަ ކެމްޕެއިންތައް ކުރިއަށް އޮތް އަހަރުތަކުގައިވެސް ރާއްޖޭގެ އެކި ކަންކޮޅުތަކުގައި ހިންގުން ކަމަށެވެ. އަދި މިއަހަރު ތެރޭގައިވެސް ރާއްޖޭގެ އެކި ކަންކޮޅުތަކުގައި އެކި ޕްރޮޑަކްޓްތަކަށް ޙާއްޞަކޮށްގެން އެމްޓީސީސީ އިން ވަނީ ހޭލުންތެރިކުރުމުގެ ޕްރޮގްރާމްތަކާއި ތަމްރީނު ޕްރޮގްރާމްތައް ހިންގާފައެވެ.

އެމްޓީސީސީ އަކީ ދިވެހި ރާއްޖޭގައި ޤާއިމްކުރެވުނު އެންމެ ފުރަތަމަ އަދި އެންމެ އިތުބާރުކުރެވޭ ޕަބްލިކް ކުންފުންޏެވެ. އެމްޓީސީސީ އަކީ ޔަންމާ އިންޖީނު އަދި ސުޒުކީ އައުޓްބޯޑް އިންޖީނާއި ކާސްޓްރޯލް އަޑީތެލާއި ސިގްމާ އެންޓިފައުލިންގ ސިސްޓަމް އަދި ސްކޮޓް ބާޑާރ ބްރޭންޑްގެ ފައިބަރ ކުރަން ބޭނުންކުރާ ސާމާނުގެ ރާއްޖޭގެ އޮތޮރައިޒްޑް ޑިސްޓްރިބިއުޓަރުވެސް މެއެވެ.

އެކުންފުނިން ދަތުރުފަތުރުގެ ޚިދުމަތާއި ބަނދަރުހެދުމާއި ިބންހިއްކުމާއި ފަޅުފުންކުރުމާއި ގޮނޑުދޮށް ރައްކާތެރިކުރުމާއި ގެދޮރު ޢިމާރާތް ކުރުމުގެ މަސައްކަތް ރާއްޖޭގެ ހުރިހާ ކަންކޮޅެއްގައި އަންނަނީ ފޯރުކޮށްދެމުންނެވެ.