މުސްލިމުންގެ ޢަދާވާތްތެރިން އަބަދުވެސް މަސައްކަތްކުރާނީ އިސްލާމްދީނާއި މުސްލިމުން ބަލިކޮށް، ނިކަމެތިކޮށްލުމަށް: ޚުޠުބާ

މުސްލިމުންގެ ޢަދާވާތްތެރިން އަބަދުވެސް މަސައްކަތްކުރާނީ އިސްލާމްދީނާއި މުސްލިމުން ބަލިކޮށް، ނިކަމެތިކޮށްލުމަށްކަމަށް ހުކުރު ޚުޠުބާގައި ބުނެފިއެވެ.

މާތްﷲގެ ވަޙީ ބަސްފުޅުތަކުން ދަލީލު ދައްކަމުން ޚުޠުބާގައި ބުނީ ”އެއުރެން އެދެނީ ﷲގެ ނޫރުފުޅު ކަމުގައިވާ އިސްލާމް ދީން އެ އުރެންގެ އަނގަތަކުން ފުމެ ނިއްވާލުމަށް“ ކަމަށާއި ”ކާފިރުން ނުރުހުނުކަމުގައިވިޔަސް ﷲ އެކަލާނގެ ދީން ފުރިހަމަ ކުރައްވާހުރި“ ކަމަށެވެ.

އިޝްތިހާރު

އެހެންކަމުން މިކަމާއިމެދު ވިސްނާ އެކުވެރި އެއްބައިވަންތަ ބައެއްގެ ގޮތުގައި ދެމި ތިބުމަށާއި އިސްލާމް ދީނުގެ ރިވެތި އަޚްލާގުން ޒީނަތްތެރިވުމަށް މިއަދުގެ ހުކުރު ޚުޠުބާގައި ވަނީ ގޮވާލާފައެވެ.

މުސްލިމުން އެބައިމީހުންގެ އެއްބައިވަންތަކަމުގެ ބިނާއަށް ލޮޅުމެއް އަރާފަދަ އެއްވެސްކަމެއް ނުކުރާނެ ކަމަށާއި އިސްލާމީ އުއްމަތަށް ލިބިފައިވާ ހުރިހާ ކާމިޔާބަކާއި ކުރިއެރުމެއްގެ އަސާސަކީ އިސްލާމީ އެއްބައިވަންތަކަން ކަމަށްވެސް ޚުޠުބާގައި ބުނެފައިވާ އިރު، އިތުރަށް ބުނީ މިކަން ހީނަރުވެގެންދިޔަ ކޮންމެ ދަނޑިވަޅެއްގައި މުސްލިމުން ވަނީ ބަލިކަށިވެފައި ކަމަށެވެ.

”އިސްލާމީ އުޚްވަތްތެރިކަމަކީ ގަދަފަދަ ބާރެއް. އަދި ބައިބައިވުމަކީ މުޖުތަމަޢު ނިކަމެތިވެ ބަލިކަށިވެގެންދާ ކަމެއް“ ޚުޠުބާގައި ބުންޏެވެ.