ސަރުކާރުން ރައްޔިތުންނަށް ޚިދުމަތްތައް ފޯރުކޮށްދިނުމުގައި ތަފާތެއް ނުކުރާނަން: ރައީސް

އަލަށް މި އުފެދިގެންދާ ސަރުކާރުން ރައްޔިތުންނަށް ޚިދުމަތްތައް ފޯރުކޮށްދިނުމުގައި މީހެއްގެ ނަސްލަށް، ސިޔާސީ ނުވަތަ އެނޫންވެސް ވިސްނުމަކަށް ބައްލަވައި، ތަފާތެއް ނުކުރައްވާނެ ކަމަށް ރައީސުލްޖުމްހޫރިއްޔާ އިބްރާހިމް މުޙަައްމަދު ސާލިޙް (އިބޫ) ވިދާޅުވެއްޖެއެވެ.

ރާއްޖޭގެ ރައީސްކަމުގެ ހުވާ ކުރެއްވުމަށްފަހު، ވާހަކަފުޅު ދައްކަވަމުން ވިދާޅުވީ ހަމަ އެއްވެސް ރައްޔިތަކު ބާކީވެގެނެއް ނުދާނެ ކަމަށެވެ.

އިޝްތިހާރު

މީގެ އިތުރުން ރައީސުލްޖުމްހޫރިއްޔާ ވިދާޅުވީ ދައުލަތް ހިންގުމުގެ ނިޒާމެއް ދިވެހީންނަށް ގެނެސްދިން ޤާނޫނު އަސާސީއަކީ ދިވެހި ރައްޔިތުންނަށް ކުރިން ލިބިފައިނުވާ އެތަކެއް ޙައްޤުތަކެއް ކަށަވަރުކޮށްދިން ޤާނޫނުއަސާސީއެއް ކަމަށެވެ. އެއީ ތިންބާރު ވަކިވެފައިވާ، ދައުލަތް ހިންގުމުގެ ނިޒާމެއް ދިވެހިންނަށް ގެނެސްދިން ޤާނޫނުއަސާސީއެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ.

އެހެންނަމަވެސް، ހިތާމަޔަކީ އާ ޤާނޫނުއަސާސީއެއް ލިބިގަނެ އަޅުގަނޑުމެން ކުރި އުއްމީދުތައް މިއަދު ވިއްސިވިހާލިވެ، އެ ޤާނޫނުއަސާސީ ގެނެސްދިން ނިޒާމު ޚަރާބުވެފައިވުން ކަމަށާއި މިއަދު ކުރަން މިފަށާ މަސައްކަތަކީ ދިވެހި ދައުލަތުގެ އެންމެހައި ކަންތައްތައް ޤާނޫނުއަސާސީގެ (އިމުގެތެރެއަށް) ގެނެސް، ދިވެހި ރައްޔިތުންނަށް އިންސާފުވެރި ވެރިކަމެއް ކޮށްދިނުމުގެ މަސައްކަތް ކަމަށްވެސް އެމަނިކުފާނު ވިދާޅުވިއެވެ.

“ މާތްﷲ ގެ ވާގިފުޅާއެކު، މިފެށޭ ރިޔާސީ ދައުރުގައި ދިވެހި އެންމެހާ ލޮބުވެތި ރައްޔިތުން ދެކޭނީ ދިވެހި ދައުލަތުގެ އެންމެހައި ކަންކަން އިންސާފުގެ މަގަށް މިސްރާބުވެގެން ދާ މަންޒަރު. މާތްވެގެންވާ އިސްލާމްދީނުގެ ރިވެތި އުޞޫލުތައް ނަގަހައްޓައި، ރައްޔިތުންނަށް ޖަވާބުދާރީވާނޭ ސަރުކާރެއް އުފެދިގެން ދާ މަންޒަރު“ ރައީސުލްޖުމްހޫރިއްޔާ އިބްރާހިމް މުޙާއްމަދު ސާލިޙް ވިދާޅުވިއެވެ.