ސެމީޑީލްގައި ރޯވި އަލިފާންގަނޑު ކޮންޓްރޯލްކޮށްފި
މއ. ސެމީ ޑީލްގައި ރޯވި އަލިފާންގަނޑު ކޮންޓްރޯ ލުކުރެވިއްޖެކަމަށް އެމްއެންޑީއެފް އިން ބުނެފިއެވެ.
އެ އިދާރާއިން ބުނީ އެގޭގެ 4 ވަނަ ފަންގިފިލާގައި ރޯވި އަލިފާންގަނޑު މިހާރު ކޮންޓްރޯލު ކުރެވިފައިވާ ކަމަށާއި އިތުރު ބެލުންތައް މިހާރުބަލަމުން އަންނަކަމަށެވެ.
ޗާންދަނީ މަގުގައި ހުންނަ މއ. ސެމީ ޑީލް އަކީ 10 ބުރީގެ ޢިމާރާތެކެވެ. އަދި އަލިފާން ރޯވެފައިވަނީ 4 ވަނަ ފަންގިފިލާގައެވެ.
މިއީ ގުދަނެއްގެ ގޮތުގައި ބޭނުންކުރާ ފަންގިފިލައެއް ކަމަށާއި އެތާނގައި ހުރީ އައިސް އަލަމާރި އާއި އިލެކްޓްރޯނިކްސް ސާމާނާއި ބަދިގެ ސާމާނު ކަމަށްވެސް އެމްއެންޑީއެފް އިން ވަނީ ބުނެފައެވެ.
އެ ހާދިޘާގައި އެ ޢިމާރާތުގެ 3 ވަނަ ފަންގިފިލާއަށްވެސް ވަނީ އަލިފާނުގެ އަސަރު ކޮށްފައެވެ. އަދި އަލިފާން ނިއްވުމުގައި ހަރަކާތްތެރިވި ސިފައިންގެ 3 މީހަކަށް ދުމުގެ އަސަރުކޮށްގެން ސެނަހިޔާ ހޮސްޕިޓަލަށް ގެންގޮސްފައިވާ އިރު، އެތަނުން އެކަކަށް ފަރުވާ ދިނުމަށްފަހު މިހާރު ވަނީ ދޫކޮށްލާފައެވެ.
އެހެންނަމަވެސް މި ހާދިޘާގައި އިތުރު އެއްވެސް މީހަކަށް އަނިޔާވިކަމުގެ މަޢުލޫމާތެއް އަދިނުލިބެއެވެ.
މި ހާދިޘާ ހިނގި ސަރަޙައްދަށް ޑިފެންސް މިނިސްޓަރ އާދަމް ޝަރީފް ޢުމަރާއި ޗީފް އޮފް ޑިފެންސް ފޯރސް މޭޖަރ ޖެނެރަލް އަޙްމަދު ޝިޔާމް ވަނީ ޒިޔާރަތްކުރައްވާފައެވެ.
މިލިޔުން ކިޔާލުމުން
