މަރްޙޫމާ ޞަފިއްޔާ މުޙައްމަދުގެ ހަނދާނީ ބަށި މުބާރާތް މާދަމާ ފަށަނީ..

ރ. މީދޫ އަލް މަރްޙޫމާ ޞަފިއްޔާ މުޙައްމަދުގެ ހަނދާނީ ބަށި މުބާރާތް މާދަމާ ފެށުމަށް ނިންމައިފިއެވެ.

މި ބަށި މުބާރާތާއިބެހޭ ގޮތުން އެޓޯލްނިއުސްއަށް މަޢުލޫމާތު ދެއްވަމުން އަލް މަރްޙޫމާ ޞަފިއްޔާ މުޙައްމަދުގެ މާމަ ދަރިފުޅު ފާޠިމަތު ނަޝާ ވިދާޅުވީ މިއީ މާމަ (އަލް މަރްޙޫމާ ޞަފިއްޔާ މުޙައްމަދު، ރ.މީދޫ ރަތްދަޅަގެ) ގެ ޢާއިލާ އާއި މީދޫ ޖަމިއްޔަތުއް ސަލާޙް ގުޅިގެން ކުރިއަށް ގެންދާ މުބާރާތެއް ކަމަށެވެ. އަދި މިއަހަރު މި ބާއްވަނީ 3 ވަނަ މުބާރާތް ކަމަށާއި މި މުބާރާތުގައި 4 ޓީމު ވާދަކުރާ ކަމަށެވެ.

އިޝްތިހާރު

ޖުމްލަ 48 ކުޅުންތެރިންނާއެކު ފަށާ މި ބަށި މުބާރާތް ކުޅުމަށް މީދޫ ޖަމިއްޔަތުއް ސަލާހްގެ ބަށި ކޯޓު ހަމަޖައްސާފައިވާ އިރު، މާދަމާ ބާއްވާ މުބާރާތް ހުޅުވުމުގެ ރަސްމިއްޔާތު އޮންނާނީ ހަވީރު 16:15 ގައި ކަމަށާއި މި ރަސްމިއްޔާތަށް އެރަށުގެ ކުރީގެ ބަށި ކުޅުންތެރިންނާއި ރަށުގެ ކަމުވޮށިގެންވާ ފަރާތްތަކަށް ދަޢުވަތު އަރުވާފައިވާނެ ކަމަށްވެސް ނަޝާ ވިދާޅުވިއެވެ.

މާދަމާއިން ފެށިގެން މި މަހުގެ 14 ވަނަ ދުވަހާއި ހަމައަށް ކުރިއަށްދާ މި މުބާރާތުގައި މިއަހަރު ބައިވެރިވެފައިވަނީ ފަތްމިނި، ރެހެނދި، ގޮމަ އަދި ރިލެކްސް ޓީމެވެ.

މަރްޙޫމާ ޞަފިއްޔާ މުޙައްމަދަކީ މީދޫއަށް އިޖުތިމާޢީ ގޮތުން ގިނަ ޚިދުމަތްތަކެއް ކޮށްދެއްވާފައިވާ ފަރާތެކެވެ. އެގޮތުން ފޫޅުމައިކަމާއި ޖަމާތްތްރިކަން ފަދަ އެހެނިހެން ރޮނގުރޮގުންވެސް ވަނީ ގިނަ ޚިދުމަތްތަކެއް ކޮށްދެއްވާފައެވެ. އަދި މި ޚިދުމަތުގެ އަގު ޖަމިއްޔަތުއް ސަލާޙް އިން އަބަދުވެސް ފާހަގަ ކުރަމުން އަންނަ ކަމަށާއި އެކަމަށްޓަކާ ޢާއިލާގެ ނަމުގައި ވަރަށް ޚާއްޞަ ޝުކުރެއް އަދާކުރާކަމަށްވެސް ނަޝާ ވިދާޅުވިއެވެ.

ނަޝާ އިތުރަށް ވިދާޅުވީ މިއަހަރަށްފަހު މި ނަމުގައި ބަށި މުބާރާތް ނުބާއްވަން ނިންމާފައިވާ ކަމަށެވެ. އެހެންނަމަވެސް ވޮލީ ފުޓްބޯޅަ، ފުޓްސަލް ފަދަ ކުޅިވަރުތަކަށް ޚާއްޞަކޮށްގެން އިތުރު މުބާރާތްތަކެއް ބޭއްވުމަށް ވިސްނަމުން އަންނަ ކަމަށެވެ.

”މިއީ މާމަގެ ހަނދާނީ ބަށި މުބާރާތް މިނަމުގަ ބާއްވާ އެންމެ ފަހު މުބާރާތް. މިގޮތަށް ނިންމީ ހަމައެކަނި ބަށި މުބާރާތެއް ބޭއްވުމުގެ ބަދަލުގައި ވީހާވެސް ގިނަ ކަނބަލުންނަށް ބައިވެރިވުމަށް ފުރުޞަތު ތަނަވަސްކޮށްދޭ ކަހަލަ މުބާރާތްތަކެއް ބޭއްވުމަށް. އެގޮތުން ފުޓްސަލް، ފުޓްބޯޅަ އަދި ވޮލީ ފަދަ ކުޅިވަރުތައް އިރާދަކުރެއްވިއްޔާ އަންނަ އަހަރުން ފެށިގެން ބާއްވާނަން“ ނަޝާ ވިދާޅުވިއެވެ.