ޓީއެފްޖީ ބޮޑުހާފުގައި ބައިވެރިވުމަށް އިތުރު ފުރުޞަތެއް..

ޓީއެފްޖީ ބޮޑުހާފުގައި ބައިވެރިނުވާ ފަރާތްތަކަށް އިތުރު ފުރުޞަތެއް ދިނުމަށް ނިންމާ އެ ފުރުޞަތު ހުޅުވާލައިފިއެވެ.

ޓޯޓަލް ފިޓްނެސް ގްރޫޕް (ޓީއެފްޖީ) އިން ބުނީ މިފަހަރު ދީފައިވަނީ ވަރަށް މަދު ފުރުޞަތެއް ކަމަށާއި މިގޮތަށް ނިންމީ ވީހާވެސް ގިނަ މީހުންނަށް ބައިވެރިވުމަށް ފުރުޞަތު ދިނުމަށް ކަމަށެވެ. އަދި www.gotorace.com/event/bodu-haaf މެދުވެރިކޮށާއި ޓީއެފްޖީއަށް ގޮސްގެންވެސް ރެޖިސްޓްރީ ކުރެވޭނެ ކަމަށެވެ.

އިޝްތިހާރު

މުޅިން އަލަށް މިއަހަރު ބާއްވާ މި ދުވުމަކީ ބޮޑުތަކުރުފާނުގެ ހަނދާނުގައި ބާއްވާ ދުވުމަކަށްވާ އިރު، ރާއްޖޭގައި ބާއްވާ އެހެން ދުވުންތަކާއި މި ދުވުން ތަފާތުވާނެ ކަމަށް ޓީއެފްޖީ އިން ބުންޏެވެ.

މި މަހުގެ 10 ވާ ހޮނިހިދު ދުވަހު ހެނދުނު ހުޅުމާލޭގައި ބާއްވާ ބޮޑުހާފަކީ 5 ކިލޯމީޓަރާއި 10 ކިލޯމީޓަރު އަދި 21 ކިލޯމީޓަރުގެ ދުވުން ހިމަނާފައިވާ ދުވުމުކެވެ. އަދި ދުވުމުގެ ޓައިޓްލް ލިބޭނީ މި ހުރިހާ ކެޓަގަރީއެއް ފުރިހަމަ ކުރުމުން ކަމަށްވެސް ޓީއެފްޖީ އިން ބުންޏެވެ.

ޓީއެފްޖީ އިން އިތުރަށް ބުނީ މިގޮތަށް އޮތްނަމަވެސް އެމީހަކު ބޭނުން ކެޓަގަރީއެއްގައި ދުވެވިދާނެ ކަމަށެވެ. އަދި ކޮންމެ ކެޓަގަރީއެއް ނިންމުމުންވެސް މެޑެލް ލިބޭނެ ކަމަށެވެ.

ބޮޑުހާފުގައި 5 ކިލޯމީޓަރ ދުވުން ފަށާނީ ފަތިހު 05:30ގައެވެ. މި ކެޓަގަރީގެ ދުވުން 45 މިނެޓުގެ ތެރޭގައި ނިންމަން ޖެހޭ އިރު، 10 ކިލޯމީޓަރ ދުވުން ފަށާނީ 06:30 ގައެެވެ. މި ކެޓަގަރީގެ ދުވުން ނިންމަން 1 ގަޑި 30 މިނެޓު ނިންމަން ލިބޭ އިރު، 21 ކިލޯމީޓަރގެ ދުވުން 08:30 ގައި ނިންމާފައިވާ އިރު، މިދުވުން ފުރިހަމަ ކުރުމަށް ތިންގަޑި އިރު ލިބޭނެއެވެ.