ވިކްޓްރީ ރަން މާދަމާ މާލޭގައި ބާއްވަނީ..

ދިވެހިރާއްޖޭގެ ނަޞްރުގެ ދުވަހުގެ މުނާސަބަތުގައި އެމްއެންޑީއެފް އިން ބާއްވާ ”ވިކްޓްރީ ރަން“ މާދަމާ މާލޭގައި ބޭއްވުމަށް ނިންމައިފިއެވެ.

މޯލްޑިވްސް ނެޝަނަލް ޑިފެންސް ފޯރސް (އެމްއެންޑީއެފް) އިން ބުނީ ދިވެހިރާއްޖޭގެ ފަޚުރުވެރި 30 ވަނަ ނަޞްރުގެ ދުވަހުގެ މުނާސަބަގައި ބާއްވާ މި ދުވުން ފަށާނީ މާދަމާ ހެނދުނު 06:00 ގައި ކަޅުތުއްކަލާކޮށިން ކަމަށެވެ.

އިޝްތިހާރު

”މި ދުވުން ކުރިއަށްދާނީ ކަޅުތުއްކަލާކޮށި ދެކުނު ގޭޓުން ނިކުމެގެން އިރަށްގޮސް، ޢިއްޒުއްދީން މަގުން އުތުރަށްގޮސް، އަމީނީމަގުން ހުޅަނގަށް ގޮސް ،ކަނބާ އައިސާރަނި ހިނގުމުން އުތުރަށްގޮސް، ބޮޑުތަކުރުފާނުމަގުން އިރަށްގޮސް، މާލެ ވަށައި ދުވުމަށްފަހު ކަޅުތުއްކަލާކޮށްޓަށް ނިންމާގޮތަށް“ އެމްއެންޑީއެފް އިން ބުންޏެވެ.

ވިކްޓްރީ ރަން އަކީ އަސްކަރިއްޔާތަކުގައި ކާމިޔާބީ ފާހަގަކުރުމަށާއި އަސްކަރީ ސަފުތަކުގެ ބަދަހިކަން ދައްކައިދިނުމާއި ޤައުމީ ރޫޙާއި ޖޯޝް ލަޝްކަރުގައި އަށަގެންނެވުމަށް ބާއްވަމުންގެންދާ ހަރަކާތެކެވެ. ވަކިން ޚާއްޞަކޮށް މި ހަރަކާތް ރަމްޒުކޮށްދެނީ ދީނާއި ޤައުމުގެ ޙައްޤުގައި ޝަހީދުވި މަތިވެރި އަބްޠާލުންގެ ޒިކުރާއެވެ.

ސިފައިންގެ ހުރިހާ ރޭންކެއްގެ ސިފައިން ބައިވެރިވާ މި ހަރަކާތް ކުރިއަށްދާއިރު، ޤައުމީ ޝިޢާރާއި ސިފައިންގެ ޢަޒުމް އަޑު ހަރުކޮށް ކިޔަމުން ގެންދާނެއެވެ.