ނޮވެމްބަރު ތިނެއްގެ ހަނދާނީ ބިނާގައި ދިދަ ޖެހުމާއި ގާޑު މައުންޓް ކުރުމުގެ ރަސްމިއްޔާތު ބާއްވައިފި

ނޮވެމްބަރު ތިނެއްގެ ހަނދާނީ ބިނާގައި ދިދަ ޖެހުމާއި ގާޑު މައުންޓް ކުރުމުގެ ރަސްމިއްޔާތު މިއަދު ބާއްވައިފިއެވެ.

ދިވެހިރާއްޖޭގެ ފަޚުރުވެރި 30 ވަނަ ނަޞްރުގެ ދުވަހުގެ މުނާސަބަތުގައި ބޭއްވި މި ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް ޢުމަރެވެ.

އިޝްތިހާރު

ނޮވެންބަރު ތިނެއްގެ ހަނދާނީ ބިނާ ކައިރީގައި މިއަދު ހެނދުނު 06:30 ގައި ބޭއްވި މިރަސްމިއްޔާތުގައި ދިދަ ޖަހައި ގާޑުމައުންޓްކޮށްފައިވަނީ ދިދަ ޕާޓީގައި ހިމެނޭ ސިފައިންނެވެ.

ދިދަވެރިން ދިދަ ޖަހައި ގާޑު މާއުންޓް ކުރުމުން ނޮވެމްބަރު ތިނެއްގެ ޢުދުވާނީ ޙަމަލާގައި ޝަހީދުވި މީހުންގެ ހަނދާނުގައި 7ބަޑީގެ ސަލާމެއްއަރުވައި ހިމޭންކަމުގެ ސުކޫތެއް ވަނީ ގެނެސްފައެވެ. ދިދަ ޕާޓީގެ ކޮމާންޑަރަކީ ކެޕްޓަން އިބްރާހީމް ޒަމީރުއެވެ.

މިރަސްމިއްޔާތުގައި ސިފައިންގެ ޢަޒުމް ޢަޒުމް އައު ކޮށްދެއްވީ ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޝާހިދެވެ. މިރަސްމިއްޔާތު ނިމިގެންދިޔައީ ސިފައިންގެ ލަވައިންނެވެ.

މި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމާއި ސިފައިންގެ ޖެނެރަލް އޮފިސަރުންނާއި ސިފައިންގެ ޚިދުމަތުން ޝަރަފުވެރިކަމާއެކު ރިޓަޔަރ ކޮށްފައިވާ އެކި ރޭންކުތަކުގެ ބޭކަލުންނާއި ސީނިއަރ އޮފިސަރުންނާއި އެހެނިހެން ރޭންކުތަކުގެ ގިނަ ޢަދަދެއްގެ ސިފައިން ވަނީ ބައިވެރިވެވަޑައިގެންފައެވެ.

މީގެ އިތުރުން ނަޞްރުގެ ދުވަސް ފާހަގަކުރުމުގެ ގޮތުން ސިފައިން ޤާއިމްވެތިބޭ ހުރިހާ މަރުކަޒުތަކެއްގައި މިއަދުގެ ފަތިސް ނަމާދު ވަނީ އެއްޖަމާޢަތެއްގައި ކޮށްފައެވެ. އެމްއެންޑީއެފް މާލޭ އޭރިއާގައި ސިފައިން ފަތިސް ނަމާދަށް ޖަމާވެފައިވަނީ މަސްޖިދުއް ސުލްޠާން މުޙައްމަދު ތަކުރުފާނުލް އަޢުޡަމް “އިސްލާމީ މަރުކަޒު“ އަށެވެ.

އިމާމުވެ ނަމާދު ކުރައްވައި، ނަމާދަށްފަހު ނަޞްރުގެ ދުވަހާ ގުޅޭ ޚާއްޞަ ދުޢާކޮށްދެއްވީ މޭޖަރ އަބްދުލް މަޖީދު އިބްރާހީމެވެ.

އެއަށްފަހު މަސްޖިދުއް ސުލްޠާން މުޙައްމަދު ތަކުރުފާނުލް އަޢުޡަމްގެ އިމާމު، އައްޝެއިޚް ހައިޝަމް މުޙައްމަދު ވަނީ ނަޞްރުގެ ދުވަހާގުޅޭ ގޮތުން ދީނީ ނަސޭޙަތެއް ދެއްވާފައެވެ.