ހަތަރުހާސް މީހުންނާއެކު ދިރާގު ރޯޑު ރޭސް ބާއްވައިފި

ރާއްޖޭގައި އެންމެ ގިނަ ދުވުންތެރިން ބައިވެރިވާ ދިރާގު މޯލްޑިވްސް ރޯޑް ރޭސް 4،000 މީހުންނާއެކު މިއަދު ހަވީރު ބާއްވައިފިއެވެ.

ހުޅުމާލޭ ސެންޓްރަލް ޕާކުގައި މިއަދު ހަވީރު 16:15 ގައި ފެށި މި ދުވުމުގައި 5 ކިލޯ މީޓަރާއި 10 ކިލޯ މީޓަރގެ ރޭސް ވަނީ ހިމަނާފައެވެ. އަދި ދުވުން ނިމުމުން އެކި ވަނަތަކަށްދިޔަ ދުވުންތެރިންނަށް އިނާމާއި ހަނދާނީ ލިޔުން ވަނީ ދީފައެވެ.

އިޝްތިހާރު

އޯޕަން ކެޓަގަރީގެ 10 ކިލޯ މީޓަރުގެ ދުވުމުގެ ފިރިހެނުންގެ ބައިގެ އެއްވަނަ 34 މިނިޓް 28 ސިކުންތުން ރޭސް ނިންމައިގެން ހުސައިން ފަޒީލް ހާރޫން އެއްވަނަ ހޯދި އިރު، މިކެޓަގަރީގެ އަންހެނުންގެ ބައިން އެއްވަނަ ހޯދީ މަރިޔަމް ޢަބްދުލް ކަރީމެވެ. އޭނާ ރޭސް ނިންމާފައިވަނީ 45 މިނިޓް 33 ސިކުންތުންނެވެ. 

45 އަހަރުން މަތީގެ ކެޓަގަރީން 1 ވަނަ ފިރިހެން ދުވުންތެރިއަކީ އިބްރާހިމް ނައީމެވެ. މިކެޓަގަރީގެ އަންހެނުންގެ ބައިން އެއްވަނަ ހޯދީ ފާތިމަތު ސީމާއެވެ.

ދިރާގު މޯލްޑިވުސް ރޯޑު ރޭހުގައި މިއަހަރު ދިހަޔަަކަށް ވުރެ ގިނަ ޖަމިއްޔާއިން ބައިވެރިވެފައިވާއިރު، އެޖަމިއްޔާތަކަށް ދިރާގުން ވަނީ ފައިސާގެ އެހީދީފައެވެ. އަދި ރެޖިސްޓްރޭޝަންގައި ބައިވެރިން ހޮވި ޓޮޕް ފައިވް އެންޖީއޯގެ ތެރެއިން ކޮންމެ އެންޖީއޯއަކަށް އައްޑިހަހާސް ރުފިޔާވެސް ވަނީ ދީފައެވެ.

އޭގެ ތެރޭގައި އެމްއޭޕީޑީ އާއި އެޑްވަކޭޓިންގ ދަ ރައިޓްސް އޮފް ޗިލްޑްރެން (އާރކް)، ކެންސަރ ސޮސައިޓީ އޮފް މޯލްޑިވްސް އާއި މޯލްޑިވްސް އޯޓިޒަމް އެސޯސިއޭޝަން އަދި ޓައިނީ ހާޓްސް އޮފް މޯލްޑިވްސް ވަނީ ހިމެނިފައެވެ.

ދިރާގު މޯލްޑިވްސް ރޯޑު ރޭހުގެ 12 ވަނަ ދުވުން މިއަދު ބާއްވާފައިވާ އިރު، މިއީ މި ދުވުމުގައި މިހާތަނަށް އެންމެ ގިނަ މީހުން ބައިވެރި އަހަރެވެ. މީގެކުރިން ބައިވެރިކޮށްފައިވަނީ 3،000 މީހުންނެވެ.

މިއަހަރުގެ ދުވުމަށް ދިރާގުން ވަނީ ބަދަލުތަކެއް ގެނެސްފައެވެ. އެގޮތުން މިއަހަރުގެ ރޭހުގައި އެންމެ ފުރަތަމަ ނިންމާ ފަރާތަކަށް ދޭ މެޑަލްގެ ފަރުމާއަށް ވަނީ ބަދަލު ގެނެސްފައިވާކަން ފާހަގަކޮށްލެވެއެވެ. އަދި މި އަހަރު މި ދެ މެޑަލް އާ ޑިޒައިނަކާއެކު ވަނީ ދެ މެޑަލްގެ ގޮތުގައި ވަކިކޮށްފައެވެ.

ކުޑަކުދިންގެ ޙައްޤުތައް ރައްކާތެރިކޮށް، އެކަމަށް ހޭލުންތެރިކުރުވުމަށް ބާއްވާ މި ދުވުމުގައި ފާއިތުވި ދެ އަހަރުވެސް 8 ޖަމިއްޔާއަކުން ވަނީ  ބައިވެރިވެފައެވެ. އަދި އެ ދެ އަހަރުގެ ހަރަކާތުން ލިބުނު ދެ މިލިއަން ރުފިޔާ ދިރާގުން ވަނީ އެޖަމިއްޔާތަކަށް ހަދިޔާކޮށްފައެވެ.