8 ޓީމާއެކު ދޮންފަނު އިންވިޓޭޝަން ކަޕް ޑިސެމްބަރުގައި..
8 ޓީމާއެކު ދޮންފަނު އިންވިޓޭޝަން ކަޕް ޑިސެމްބަރުގައި ފެށުމަށް ނިންމައިފިއެވެ.
ބ. އަތޮޅު ދޮންފަނު ޒުވާނުންގެ ރޫހުން އިންތިޒާމުކޮށްގެން ބާއްވަމުން އަންނަ މި މުބާރާތާއިބެހޭ ގޮތުން އެ ޖަމިއްޔާއިން ބުނީ ފާއިތުވި އަހަރު 5 ޓީމު މި މުބާރާތުގައި ވާދަކުރި ނަމަވެސް، މިއަހަރު 8 ޓީމު ބައިވެރިވެފައިވާ ކަމަށެވެ. އަދި އޭގެ ތެރޭގައި މިއަހަރު މުޅިން އަލަށް ބައިވެރިވި 3 ރަށްވެސް ހިމެނޭ ކަމަށެވެ.
”މިއަހަރުގެ މުބާރާތުގައި އަލަށް ބައިވެރިވީ ކުޑަރިކިލު ކަމަދޫ އަދި މާޅޮސް. އެހެންވީމަ މުބާރާތަށް ލިބެމުން އަންނަ ތަރުޙީބު ރަނގަޅޭ ބުނެވޭނީ“ ދޮންފަނު ޒުވާނުންގެ ރޫޙުގެ އޮފިޝަލަކު ވިދާޅުވިއެވެ.
އޭނާ އިތުރަށް ވިދާޅުވީ މިއަހަރުގެ މުބާރާތުގައިވެސް ފައިބެއަހަރުގެ ޗެމްޕިއަން ގޮއިދޫއާއި ރަނަރ-އަޕް އޭދަފުށި، ކިހާދޫ، ދަރަވަންދޫ، ދޮންފަނުން ބައިވެރިވެފައިވާ ކަމަށެވެ.
އެ އަތޮޅުގެ ޒުވާނުންގެ ތެރެއިން 23 އަހަރުން ދަށުގެ ޒުވާނުންނަށް ޚާއްޞަކޮށްގެން ބާއްވާ މި މުބާރާތުގެ މަޤުޞަދުތަކުގެ ތެރޭގައި ޒުވާން ކުޅުންތެރިން ބިނާކޮށް، ޒުވާނުންގެ މެދުގައި ފުޓްބޯޅައަށް ލޯބިޖެއްސުން ހިމެނެއެވެ.
މީގެ އިތުރުން އަތޮޅުގައި ތިބި ޒުވާން އަދި އިހުގެ ފުޓްބޯޅަ ކުޅުންތެރިން އެއްމާޙައުލަކުން ބައްދަލުކޮށްލުމާއެކު، އިހުގެ ކުޅުންތެރިންގެ ތަޖުރިބާއާއެކު، ޒުވާން ކުޅުންތެރިންނަށް ފުޓްބޯޅައިގެ ކުރިމަގު އުޖާލާކޮށްދިނުންވެސް ހިމެނެއެވެ.
މިލިޔުން ކިޔާލުމުން
