މިއަހަރުގެ ދިރާގުގެ ސްޕެޝަލް ސްޕޯޓްސް ފެސްޓިވަލްގައި ބީބީ ރަނަރސް އިން އެމްއޭޕީޑީއަށް އެހީތެރިވަނީ..

މާދަމާ ހަވީރު ބޭއްވުމަށް ހަމަޖެހިފައިވާ މިއަހަރުގެ ދިރާގުގެ ސްޕެޝަލް ސްޕޯޓްސް ފެސްޓިވަލްގައިބީބީ ރަނަރސް އިން މޯލްޑިވްސް އެސޯސިއޭޝަން އޮފް ފިޒިކަލް ޑިސޭބްލްސް (އެމްއޭޕީޑީ)އަށް އެހީތެރިވުމަށް ނިންމައިފިއެވެ.

ބީބީ ރަނަރސްގެ މީޑިއާ އޮފިޝަލް އެޓޯލްނިއުސްއަށް ވިދާޅުވީ އެމްއޭޕީޑީއާއި ދިރާގުގެ އެދުމުގެމަތިން މިއަހަރުގެ ’ދިރާގު ސްޕެޝަލް ފެސްޓިވަލު’ގައި އެ ގްރޫޕުގެ އެހީތެރިކަން ދިނުމަށް ނިންމާފައިވާ ކަމަށެވެ. އަދި މިއީ ހިލޭ ސާބަހަށް ކޮށްދޭ ކަމެއް ކަމަށެވެ.

އިޝްތިހާރު

އޭނާ އިތުރަށް ވިދާޅުވީ މިފަދަ ކޮންމެ ކަމަކަށް ވެދެވެން އޮތް މިންވަރަކުން އެހީތެރިކަން ފޯރުކޮށްދިނުމަށް ބީބީ ރަނަރސް އަބަދުވެސް އިސްކަންދޭނެ ކަމަށާއި އެފަދަ ކަންތަކަށް އަބަދުވެސް މަރުޙަބާ ކިޔާނެ ކަމަށެވެ.

ނުކުޅެދުންތެރިކަން ހުންނަ ކުދިންނަށް އަމާޒުކޮށްގެން ބާއްވާ މި ފެސްޓިވަލް އޮންނާނީ މާދަމާ ހަވީރު 16:00 އިން އިރުއޮއްސި 18:00ގެ ނިޔަލަށް ހެންވޭރު ފުޓްބޯޅަ ދަނޑުގައެވެ. އަދި މިއަހަރުގެ ފެސްޓިވަލުގައި 4 އެންޖީއޯ އާއި 1 ސްކޫލަކުން 390 ކުދިން ބައިވެރިވާނެއެވެ.

މިއަަހރުގެ ފެސްޓިވަލުގައި ބާއްވާ ކުޅިވަރުތަކުގެ ތެރޭގައި ބެޓްން ރިލޭ، ދުވުން ފަދަ ކުޅިވަރުތައް ހިމަނާފައިވާ އިރު، ދިރާގުން ބުނީ ނުކުޅެދުންތެރިކަން ހުންނަ ކޮންމެ ކުއްޖަކަށްވެސް ބައިވެރިވެވޭނެ ކަމަށެވެ. އަދި ވަނަ ވަނައަށް އަންނަ ކުދިންނަށް މެޑަލްވެސް ދޭނެކަމަށެވެ.

ދިރާގުން މިފަދަ ފެސްޓިވަލެއް ބޭއްވުމުގެ މަޤުޞަދަކީ ތަފާތު ނުކުޅެދުންތެރިކަން ހުންނަ ކުދިން ބައްދަލުވެ، އެ ކުދިންނަށް މަޖާކޮށްލުމުގެ ފުރުޞަތު ފަހިކޮށްދިނުމާއެކު އެފަދަ ކުދިންގެ ކޮންފިޑެންސް ލެވެލް އިތުރުކުރުމެވެ.