މަންތާ އެއަރގެ ދަތުރުތައް މިއަހަރު ރާއްޖެއަށް ފަށަނީ..
މަންތާ އެއަރގެ ދަތުރުތައް މިއަހަރު ރާއްޖެއަށް ފަށާނެކަމަށް އެ ކުންފުނިން ބުނެފިއެވެ.
ރާއްޖޭގެ ޓޫރިޒަމް ކުންފުންޏެއް ކަމަށްވާ ޔުނިވަރސަލް އެންޓަރޕްރައިސަސް އާއި ރިއޯލޯ އިންވެސްޓްމެންޓު ގުޅިގެން އުފައްދާފައިވާ ޖޭވީގެ އޮފިޝަލަކު ވިދާޅުވީ މަންތާ އެއަރގެ ދަތުރުތައް ޑިސެމްބަރު މަހުގެ ފަހު ކޮޅު ފަށަން ތައްޔާރުވެފައިވާ ކަމަށެވެ.
އެ ކުންފުނިން މުވައްޒަފުން މަޤާމުތަކަށް އައްޔަންކޮށް ޓްރެއިނިންގ ފަށާފައިވާ ކަމަށާއި އެ އެއަރލައިންގެ އަމާޒަކީ ރަނގަޅު އަގެއްގައި ޢާންމުންނަށް ޚިދުމަތް ފޯރުކޮށްދިނުން ކަމަށްވެސް އޮފިޝަލު ވިދާޅުވިއެވެ.
މަންތާ އެއަރ އޭޓީއާރް 600-72 މަރުކާގެ ދެ ބޯޓެއް ދާދިފަހުން ގަނެފައިވާ އިރު، ފުރަތަމަ ބޯޓް ރާއްޖެ އަންނަ ނޮވެމްބަރު މަހުގެ 12 ވަނަ ދުވަހު ރާއްޖެ އައުމަށް ވަނީ ހަމަޖެހިފައެވެ. އަދި ދެވަނަ ބޯޓް ޑިސެމްބަރު މަހު އަންނާނެއެވެ.
62 މީހުންގެ ޖާގައިގެ މި ބޯޓު ތަކުގައި ބިޒްނަސް ކުލާހާއި އިކޮނޮމީ ކުލާހުގައި ދަތުރު ކުރެވޭނެ ކަމަށާއިި ފުރަތަމަ ދަތުރު ފަށަނީ ދ. ކުޑަހުވަދޫ އާއި ބ. ދަރަވަންދޫ އަދި ތ. ތިމަރަފުށީ އެއަރޕޯޓަށް ކަމަށްވެސް މަންތާ އެއަރގެ އޮފިޝަލު ވިދާޅުވިއެވެ.
މިލިޔުން ކިޔާލުމުން
