ސަން ޓޫނާ ބާޖުގައި ރޯވި އަލިފާންގަނޑު ނިއްވާލައިފި
ސަން ޓޫނާ ބާޖުގައި ރޯވި އަލިފާންގަނޑު ނިއްވާލައިފިކަމަށް އެމްއެންޑީއެފް އިން ބުނެފިއެވެ.
އެ އިދާރާއިން ބުނީ މާލެ އަތޮޅު ތިލަފުށީ ބޭރުގައި އޮތް ސަން ޓޫނާ ބާޖުގައި ރޯވި އަލިފާން އެމްއެންޑީއެފް ފަޔަރ އެންޑް ރެސްކިއު ޓީމުން ކުރި މަސައްކަތުން ނިއްވާފައިވަނީ މިއަދު މެންދުރު 14:25ގައި ކަމަށެވެ. އަދި އަލިފާން ރޯވެފައިވަނީ ބާޖުގެ އިންޖީނު ރޫމުގައި ކަމަށެވެ.
މަސް ކިރާ އަދި ކަންނެލި މަސްވެރިކަން ކުރާ ދޯނި ފަހަރަށް އައިސް ދޫކުރުމަށް ހަދާފައިވާ 320 ފޫޓު ދިގު މި ބާޖުގައި އަލިފާން ރޯވި އިރު، 20 މީހުން ތިބިކަމަށާއި މި އެންމެންވެސް މޯލްޑިވްސް ޕޮލިސް ސަރވިސްގެ ލޯންޗަކަށް ނަގާފައިވާ ކަމަށްވެސް އެމްއެންޑީއެފް އިން ބުންޏެވެ.
މީގެ އިތުރުން އެ އިދާރާ އިން ބުނީ މި ހާދިޘާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށާއި ހާދިސާ ހިނގަން މެދުވެރިވި ސަބަބު، މޯލްޑިވްސް ޕޮލިސް ސަރވިސްއިން ތަޙްޤީޤު ކުރަމުން އަންނަ ކަމަށެވެ.
މިލިޔުން ކިޔާލުމުން
