އިންސާނާ ކިތަންމެ މުދަލެއް ދުނިޔެއިން ހޯދިޔަސް އެ މުދަލަކީ ވަގުތީ އެއްޗެއް: ޚުޠުބާ

އިންސާނާ ކިތަންމެ މުދަލެއް ދުނިޔެއިން ހޯދިޔަސް އެ މުދަލަކީ ވަގުތީ އެއްޗެއް ކަމަށް މިއަދުގެ ހުކުރު ޚުޠުބާގައި ބުނެފިއެވެ.

މިއަދުގެ ޚުޠުބާގައި ބުނީ މާތްﷲ ހަޟްރަތުގައި ޖަވާބުދާރީ ވާން ޖެހޭ ދުވަހެއް އަންނަ ކަމަށާއި އެދުވަހަކުން އެ މުދާ ހޭދަ ކުރެއްވި ގޮތާއިމެދު ސުވާލު ކުރެވޭނޭ ކަމަށެވެ. އަދި މާތްﷲ އެންގެވި ގޮތައް އެ މުދާ ހޯދައި، އެކަލާންގެ މަގުގައި އެ މުދާ ހޭދަ ކޮށްފައިވާ މީހެއް ކަމުގައި ތިބާ ވެއްޖެ ނަމަ، އުފަލުގެ ކޮޅެއް ނެތް ކަމަށެވެ.

އިޝްތިހާރު

އެ މުދާ ހޯދުމުގައާއި ޚަރަދު ކުރުމުގައި މާތްﷲގެ އަމުރުފުޅާ ޚިލާފުވެ، އެ މުދަލުގެ ސަބަބުން މާތްﷲ ހަނދުމަކުރުން ތިބާ އެއްކިބާވެފައިވާ މީހަކަށް ތިބާ ވެއްޖެނަމަ، ހިތާމައިގެ ކޮޅެއް ނެތް ކަމަށާއި ދުނިޔޭގައި އުޅޭ އިރު މުދާ ހެޔޮ ގޮތުގައި ބޭނުން ކުރުމަށްވެސް ހުކުރު ޚުޠުބާގައި ވަނީ ނަޞޭޙަތްތެރިވެފައެވެ.

މީގެ އިތުރުން ދުނިޔޭގެ ދިރިއުޅުން ތަނަވަސް ވަނީ މާތްﷲ އަށް ތަޤުވާވެރިވެގެން ކަމަށާއި އެކަލާންގެއަށް އަދާކުރަންޖެހޭ އަޅުކަންތަކަށް ފަރުވާތެރިވެ، ސަމާލުވެގެން ކަމަށްވެސް ވަނީ ބުނެފައެވެ. އަދި އެކަލާންގެ މަގުން މޫނު އަނބުރާލައިފި މީހަކުގެ ދިރިއުޅުން މާތްﷲ ދަތި ކުރައްވާނެ ކަމަށްވެސް ވަނީ ބުނެފައެވެ.