އޭޑީކޭ ހޮސްޕިޓަލުން މި މަހުގެ ނިޔަލަށް އުރަމަތީގެ ކެންސަރަށް ހޭލުންތެރިކުރުވައި ސްކްރީންކޮށްދިނުން ހިލޭ..

އޭޑީކޭ ހޮސްޕިޓަލުން މި މަހުގެ ނިޔަލަށް އުރަމަތީގެ ކެންސަރަށް ހޭލުންތެރިކުރުވައި ސްކްރީންކޮށްދިނުން ހިލޭ ހަމަޖެހިފައިވާ ކަމަށް އެ ހޮސްޕިޓަލުން ބުނެފިއެވެ.

އެ ހޮސްޕިޓަލުގެ މެނޭޖިންގ ޑިރެކްޓަރ އަހްމަދު އަފްޢާލް ވިދާޅުވީ މިއަދުން ފެށިގެން މި މަހުގެ ނިޔަލަށް ކޮންމެ ހޮނިހިރު ދުވަހެއްގެ ހެނދުނު 9:00 އިން 12:00 އަށް އުރަމަތީގެ ކެންސަރަށް ސްކްރީން ކުރުން އޮންނާނެ ކަމަށެވެ. އަދި ބްލޮކް އޭގެ 22 ވަނަ ކޮޓަރިއަށް ދިއުމުން އެކަމުގެ އިންތިޒާމު ހަމަޖެހޭނެ ކަމަށެވެ.

އިޝްތިހާރު

އޭނާ އިތުރަށް ވިދާޅުވީ ސްކްރީނިންގގެ އިތުރުން އަމިއްލައަށް އެކަން ދެނެގަނެވޭނެ ގޮތްތައްވެސް ދަސްކޮށްދޭނެ ކަމަށާއި މި މަހު ކުރިއަށްގެންދާ މި ޕްރޮގްރާމުގައި މަޢުލޫމާތު ދިނުމާއި ސްކްރީނިންގ އާއި ސެލްފް އެގްޒަރމިންގެ ކަންތައްތައް ދަސްކޮށްދޭނެ ކަމަށެވެ.

”ސްކްރީނިންގެ ތެރޭގައި އަލާމާތެއް ފާހަގަކުރެވިއްޖެނަމަ ސްކްރީނިންގެ ތެރެއިން އެ ފަރާތްތަކަށް ޑޮކްޓަރަށް ދެއްކުމާއި އެޕޮއިންޓްމަންޓް ހެދުމުގެ މަގު ވެސް ފަހިކޮށްދޭނެ“ އެމްޑީ އަފްޢާލް ވިދާޅުވިއެވެ.

ކޮންމެ އަހަރެއްގެވެސް އޮކްޓޫބަރު މަހަކީ އުރަމަތީގެ ކެންސަރަށް ހޭލުންތެރިކުރަން ބައިނަލްއަޤުވާމީ ގޮތުން ހަމަޖައްސާފައިވާ މަހެވެ. މި މަހުގެ ތެރޭގައި އުރަމަތީގެ ކެންސަރަށް ހޭލުންތެރިކުރުވަން ދުނިޔޭގެ އެކި ޤައުމުތަކުގައި ތަފާތު ހަރަކާތްތައް ހިންގަމުން އަންނަ އިރު، ރާއްޖޭގައިވެސް ކޮންމެ އަހަރަކުވެސް ތަފާތު ހަރަކާތްތައް ހިންގައެވެ.