ތިނަދޫ އިސްލާމީ މަރުކަޒުގެ ފުރާޅުން މިސްކިތުގެ ތެރެއަށް ފެން ފައިބަން ފަށައިފި
ގދ. ތިނަދޫ އިސްލާމީ މަރުކަޒުގެ ފުރާޅުން މިސްކިތުގެ ތެރެއަށް ފެން ފައިބަން ފަށައިފިއެވެ.
މާސްމީޑިއާގައި ބުނެފައިވާގޮތުގައި މި މަހުގެ 17 ވަނަ ދުވަހު ނަމާދު ކުރަން ފެށި މި މިސްކިތުގެ ފުރާޅުގެ އެކި ދިމާލުން ފެން ފައިބާތީ މިހާރުވަނީ މިސްކިތުގެ ނަމާދު ކުރާ ބައިގެ އެކިދިމާލުގައި ބާލިދީ ބަހައްޓާފައެވެ. އަދި އެފަދަ ފޮޓޯތަކެއްވެސް އަންނަނީ މާސްމީޑިއާގައި ދައުރުވަމުންނެވެ.
އެރަށުގެ މީހުން ބުނާގޮތުގައި ވާރޭވެހެން ފެށުމާއެކު މިސްކިތުގެ އުތުރު ފަރާތު ފުރާޅުން ފެން ލީކުވެ، މިސްކިތުގެ ތެރޭގައި އަންނަނީ ފެންބޮޑުވަމުންނެވެ.
ސަޢުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލް ޢަޒީޒާއި ދިވެހި ސަރުކާރުގެ ބަޖެޓުން ޚަރަދުކޮށްގެން ޢިމާރާތްކޮށްފައިވާ މި މިސްކިތަކީ މާލެ ފިޔަވައި، ރާއްޖޭގެ ރަށެއްގައި ބިނާ ކުރި ފުރަތަމަ އިސްލާމީ މަރުކަޒެވެ. އަދި މި އިސްލާމީ މަރުކަޒު ބިނާކުރުމަށް 34.4 މިލިއަން ރުފިޔާ ވަނީ ޚަރަދުކޮށްފައެވެ.
މިލިޔުން ކިޔާލުމުން
