ގޯއެއަރ ގެ ޖީ.އެސް.އޭ އެޖެންޓުކަމަށް ވޮޔޭޖަރސް މޯލްޑިވްސް ހަމަޖައްސައިފި
އިންޑިއާގެ ބަޖެޓް އެއަރލައިން ’ގޯއެއަރ‘ ގެ ޖީ.އެސް.އޭ އެޖެންޓުކަމަށް ވޮޔޭޖަރސް މޯލްޑިވްސް ޕްރައިވެޓް ލިމިޓެޑް ހަމަޖައްސައިފިއެވެ.
ގޯއެއަރ ގެ ފުރަތަމަ ފްލައިޓް ރާއްޖެއަށް އައުމަަށް ހަމަޖެހިފައިވަނީ އަންނަ އޮކްޓޯބަރ މަހުގެ 14 ވަނަ ދުވަހުއެވެ. މި ފްލައިޓް އަންނާނީ އިންޑިއާގެ މުމްބާއީންނެވެ.
އިންޑިއާގެ 5 ވަނައަށް އެންމެ ބޮޑު އެއަރލައިން ގޯއެއަރ ވުޖޫދަށް އައިސްފައިވަނީ 2005 ވަނަ އަހަރުގެ ނޮވެމްބަރ މަހުއެވެ. މި އެއަރލައިން އިން A320 ގެ ފްލީޓުތައް ބޭނުންކުރާ އިރު، މި ފްލައިޓުތަކުގައި އިކޮނޮމީ އަދި ބިޒްނަސް ކްލާސް ހިމެނެއެވެ.
ކާމިޔާބުކަމާއެކު އިންޑިއާގެ އެތެރޭގެ އުދުހުންތަކުގައި 10 އަހަރުގެ ތަޖުރިބާއަށް ފަހު، ގޯއެއަރ އިން ރާއްޖެއަށް ދަތުރުތައް ފަށާއިރު، ވެގެންދާނީ ރާއްޖެއަކީ އެ އެއަރލައިންގެ ބައިނަލްއަޤްވާމީ ފުރަތަމަ މަންޒިލަށެވެ.
ގޯއެއަރގެ މަޤްޞަދަކީ އެތެރޭގެ އުދުހުންތަކުން ހޯދާފައިވާ ކާމިޔާބީ ބައިނަލްއަޤްވާމީ އުދުހުންތަކުގައިވެސް ހޯދުމެވެ. އަދި ވައިގެ ދަތުރުފަތުރުގެ ސިނާޢަތުގައި ހެޔޮ އަގެއްގައި ”ފްލައިޓް ސްމާޓް“ ތަޖުރިބާ ޙާޞިލުވާނެ ގޮތްތަކެއް ރޭވުމެވެ.
ވޮޔޭޖަރސް އިން ބުނީ މުމްބާއީ އާއި މާލެއާދެމެދު ހަފުތާއަކު 3 ފްލައިޓް ބާއްވާ އިރު، ދެކޮޅު ޓިކެޓް 242 ޑޮލަރަށް ލިބޭނެ ކަމަށެވެ. އަދި ދިއްލީ އާއި މާލެއާދެމެދު ހަފުތާއަކު 2 ފްލައިޓް ބާއްވާއިރު، ދެކޮޅު ޓިކެޓް 274 ޑޮލަރަށް ލިބޭނެ ކަމަށެވެ.
އައު ފްލައިޓުގެ ބުކިންގސް ހެއްދެވުމަށް ޗާންދަނީ މަގުގައި ހުންނަ ވޮޔޭޖަރސް އޮފީހަށް ވަޑައިގަތުމުން ނުވަތަ 3018866 ނުވަތަ 3018877 ނަމްބަރު ފޯނަށް ގުޅުއްވުމަށް އެފަރާތުން އެދެއެވެ. އަދި goair@voyagesmaldives.com އަށް އީމެއިލް ކުރެއްވުމުން ސާފުވެވަޑައިގަންނަވާނެ ކަމަށްވެސް ވޮޔޭޖަރސް އިން މަޢުލޫމާތު ދެއެވެ.
ވޮޔޭޖަރސް މޯލްޑިވްސްއަކީ 1980 ވަނަ އަަހަރުން ފެށިގެން ޓްރެވަލް އެންޑް ޓްއަރސް އޮޕްރޭޝަންގެ ދާއިރާގައި 35 އަހަރަށްވުރެ ގިނަދުވަހުގެ ތަޖުރިބާއާއެކު ދިވެހިންގެ އިތުބާރު ލިބިފައިވާ އެއްފުރާޅެއްގެދަށުން ދަތުރުވެރިންނަށް ބޭނުންވާ ގިނަ ޚިދުމަތްތަކެއްދޭ ކުންފުންޏެކެވެ.
އެ ކުންފުނިން ޖީއެސްއޭ އެޖެންޓުކަންކުރާ އިތުރު އެއަރލައިންތަކުގެ ތެރޭގައި ބްރިޓިޝް އެއަރވޭސް، ލުފްތަންޒާ، އަލިޓާލިއާ، ޤަތަރު އެއަރވޭސް، އިތިހާދު އެއަރވޭސް، ބެންގކޮކް އެއަރވޭސް އަދި މޯލްޑިވިއަން ހިމެނެއެވެ.
މިލިޔުން ކިޔާލުމުން
