އިންތިޚާބުގެ ދާއިމީ ނަތީޖާ މި މަހުގެ 30 ގައި އިޢުލާން ކުރާނަން: އީސީ

ދިވެހިރާއްޖޭގެ ރައީސުލްޖުމްހޫރިއްޔާގެ މަޤާމަށް ބޭފުޅަކު އައްޔަންކުރުމަށް މި ސެޕްޓެމްބަރ މަހުގެ 23 ވީ އާދީއްތަ ދުވަހު ބޭއްވި ރިޔާސީ އިންތިޚާބުގެ ދާއިމީ ނަތީޖާ މި މަހުގެ 30 ވާ އާދީއްތަ ދުވަހު އިޢުލާން ކުރާނެކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

އީސީ އިން މިހެންބުނެފައިމިވަނީ ދާއިމީ ނަތީޖާ އިޢުލާން ކުރުން ފަސްކޮށްދިނުމަށް ޕީޕީއެމް އިން އީސީ އަށް ހުށަހަޅާފައިވަނިކޮށެވެ.

އިޝްތިހާރު

މަޢުލޫމާތު ލިބިފައިވާ ގޮތުގައި އިންތިޚާބާއިގުޅޭ މައްސަލަތަކެއް ފާހަގަކޮށް، ޕީޕީއެމް އިން ވަނީ އެ ކޮމިޝަނަށް ސިޓީއެއް ފޮނުވާފައެވެ. އަދި އެ މައްސަލަތަކާމެދު ގޮތެއް ނިމެންދެން ދާއިމީ ނަތީޖާ އިޢުލާންކުރުން ފަސް ކޮށްދިނުމަށް ވަނީ އެދިފައެވެ.

އެހެންނަމަވެސް އެ ސިޓީގައި ފާހަގަކޮށްފައިވަނީ ކޮން މައްސަލަތަކެއްކަމެއް އެނގިފައެއް ނުވެއެވެ. އެކަމަކު، ޕީޕީއެމްގެ މައްސަލަތަކާމެދު ގޮތެއް ނިންމުމަށް އިލެކްޝަންސްގެ ބައްދަލުވުމެއް މާދަމާ ބޭއްވުމަށް ވަނީ ނިންމާފައެވެ.

އިލެކްޝަންސް ކޮމިޝަނާއި ޙަވާލާދީ ރާއްޖޭގެ މާސްމީޑިއާތަކުގައި ބުނެފައިވަނީ ވަކި ގޮތަކަށް ޢަމަލުކުރަން އެދިފައިވީ ނަމަވެސް ކޮމިޝަނުން ކުރިއަށް ގެންދާނީ ޤާނޫނާއި ޤަވާޢިދުތަކާ އެއްގޮތަށް ކަމަށެވެ.

ޤާނޫނުގައި ބުނެފައިވާ ގޮތުގައި ވަގުތީ ނަތީޖާ އިޢުލާންކުރާތާ 7 ދުވަހުގެ ތެރޭގައި ރަސްމީ ނަތީޖާ އިޢުލާންކުރަން ޖެހެއެވެ.

ރިޔާސީ އިންތިޚާބުގެ ވަގުތީ ނަތީޖާ ދައްކާގޮތުން ގުޅިފައިވާ ޕާޓީތަކުގެ ކެންޑިޑޭޓު އިބްރާހިމް މުހައްމަދު ސޯލިހް (އިބޫ) އިންތިޚާބު ކާމިޔާބުކުރެއްވީ 134،616 ވޯޓުންނެވެ. އެއީ 58.4 އިންސައްތައެވެ. މިހާރުގެ ރައީސް ޢަބްދުﷲ ޔާމީނަށް ލިބިވަޑައިގަތީ 96،123 ވޯޓެވެ. އެއީ 41.6 އިންސައްތައެވެ.

މިއަހަރުގެ ރިޔާސީ އިންތިޚާބުގައި ވޯޓުލުމުގެ ޙައްޤު ލިބިފައިވާ 262,135 މީހުން ތިބި އިރު، އޭގެ ތެރެއިން 89 އިންސައްތަ މީހުން ވަނީ ވޯޓު ލާފައެވެ.

މި ނަތީޖާ ޤަބޫލުފުޅު ކުރެއްވިކަން ރައީސް ޔާމީން ވަނީ ޤައުމާ މުޚާތަބު ކުރައްވާ ވާހަކަފުޅު ދައްކަވަމުން ވިދާޅުވެފައެވެ.

އެކަމަކު ޕީޕީއެމުން އިންތިޚާބާއިގުޅޭ މައްސަލަތަކެއް ހޯދައި އިންތިޚާބު ބާޠިލު ކޮށްދޭން އެދި ހައި ކޯޓަށް ހުށަހަޅަން އުޅޭ ކަމުގެ އަޑުތަކެއް ފެތުރިފައިވީ ނަމަވެސް އެ ކޯޓުން މި ރޭ ބުނީ އެފަދަ އެއްވެސް މައްސަލައެއް މިހާތަނަށް އެ ކޯޓަށް ހުށަނާޅާ ކަމަށެވެ.