ޒުވާން ޖީލެއް ހަލާކުވެ ދިއުމަކީ މި ސަރުކާރުން ބޭނުންވާ ކަމެއްނޫން: ރައީސް ޔާމީން
ޒުވާން ޖީލެއް ހަލާކުވެ ދިއުމަކީ މި ސަރުކާރުން ބޭނުންވާ ކަމެއްނޫންކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މުލަކަތޮޅުގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި އެއަތޮޅު ދިއްގަރަށް ވަޑައިގެން އެރަށުގެ ބަނދަރު ހުޅުއްވައިދެއްވައި، ދިއްގަރުގައި ޤާއިމްކޮށްފައިވާ ނަރުދަމާ ނިޒާމުގެ ޚިދުމަތް ރަސްމީކޮށް ފައްޓަވައިދެއްވުމަށް މިއަދު ހެނދުނު އެރަށުގައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ޔާމީން ވިދާޅުވީ ރަނގަޅު މުޑުވަކަކަށް ދިވެހި ޒުވާނުން ހެއްދެވުމަށްޓަކައި ދީނީ ތަރުބިއްޔަތު ދިނުމަކީ މުހިންމުކަމެއްކަމަށެވެ. އަދި ދިވެހިންގެ ކަންކަން ނިންމުމުގައާއި ދިވެހިންގެ މަސްލަޙަތު އޮންނަ ކަންކަމުގައި ބޭރުގެ ފަރާތްތަކުން ގޮތް ނިންމުމުގެ ފުރުޞަތު މި ސަރުކާރުން ނުދެއްވާނެ ކަމަށެވެ.
މީގެ އިތުރުން ދިވެހިންނަކީ ބޭރު ދުނިޔޭގައި ޝަރަފުވެރި، އަބުރުވެރި ބަޔަކަށްވާންޖެހޭކަމުގައި ވިދާޅުވަމުން އެމަނިކުފާނު ވިދާޅުވީ ރާއްޖެއަކީ ވަޞީލަތް މަދު ބިން ނެތް ޤައުމެއް ކަމަށް ޤަބޫލުފުޅު ނުކުރައްވާ ކަމަށެވެ. އަދި ރާއްޖޭގައި ހުރި ވަޞީލަތްތައް ތަރައްޤީކޮށްގެން އެއިން ތަނަވަސްކަން ރައްޔިތުންނާ ހަމަޔަށް ގެނެސްދެއްވުމަކީ އެވަގުތެއްގައި ވެރިކަމާއި ހަވާލުވާބައެއްގެ ޒިންމާއެއްކަމަަށްވެސް އެމަނިކުފާނު ފާހަގަކުރެއްވިއެވެ.
މިމޭރުމުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ މިސަރުކާރުން ޤާނޫނީ އިމުގެ ބޭރުން އެއްވެސް ކަމެއް ކުރައްވާފައި ނުވާނެ ކަމަށާއި މިސަރުކާރުން މިކުރައްވާ މަސައްކަތަކީ، އެއްވެސް ތަފާތުކުރުމެއްނެތި ހުރިހާ ދިވެހި ރައްޔިތުންނާ ދޭތެރޭގައިވެސް އެއްހަމަޔަކުން އިންސާފު ޤާއިމުކުރުމުގެ މަސައްކަތް ކަމަށެވެ.
މިލިޔުން ކިޔާލުމުން
