އިލާހީ ރޭއްވެވުމުގެ ތެރެއިން ޕެނިސިލިން އުފެދުނު ގޮތް
1928 ވަނަ އަހަރު ދުނިޔެއަށް ތަޢާރަފު ކުރެވުނު ޕެނިސިލިން އަކީ ދުނިޔޭގެ އެންމެ ފުރަތަމަ އެންޓިބަޔޮޓިކެވެ. މި އަގުހުރި އެންޓިބަޔޮޓިކް ބޭސްވެރިކަމުގެ ތެރެއަށް ނެރުއްވީ އިނގިރޭސި ޙަކީމެއް ކަމަށްވާ، ސަރ އެލެގްޒެންޑަރ ފްލެމިންގ އެވެ. ފްލެމިންގ ގެ މި ހޯދުމަށްޓަކައި އޭނާއަށްވަނީ ސުލްޙައިގެ އިނާމު، ނޯބެލްގެ އިނާމު ލިބިވަޑައިގެންފައެވެ.
ޕެނިސިލިންގެ ތާރީޚަށް ޖެހިލާއިރު، މި ބޭސް އުފެއްދި މޮޅު ޙަކީމަކީ އިނގިރޭސި ވަރަށް އާދައިގެ ނިކަމެތި ދަނޑުވެރިއެއްގެ ދަރިއެކެވެ. ނަސީބު ކަންދިމާކުރި ގޮތުން ގެނބޭ ޗަކަގަނޑެއްގެ ތެރެއަށް ވެއްޓި މަރަށް ތެޅެމުންދިޔަ ކުޑަކުޑަ ސޮރެއް މަރުން ސަލާމަތް ކޮށްދިނީ މި ދެންނެވި ދަނޑުވެރިޔާއެވެ.
ދަނޑުވެރިޔާ އަށް މި ސަލާމަތް ކޮށްދެވުނީ އިނގިރޭސި ނަންހިނގާ އާއިލާއެއްގެ ސޮރެއްކަން އެނގުނީ އަނެއްދުވަހު އެސޮރުގެ ބައްޕަ ދަނޑުވެރިޔާ ކޮށްދިން ހެޔޮކަމުގެ ބަދަލު ދޭންވެގެން ފައިސާގެ ކޮތަޅު ތަކާއި އެކު ދަނޑުވެރިޔާގެ ގެއަށް އައުމުންނެވެ.
ކޮންމެއަކަސް ދަނޑުވެރިޔާ އޭނާ ކޮށްދިން ހެޔޮކަމަކީ ބަދަލުގައި ރުފިޔާތަކެއް ބޭނުންވެގެން ކުރި ކަމެއް ނޫންކަމަށާއި، އެއީ އޭނާގެ އިންސާނީ ވާޖިބެއް ކަމަށް ބުނެ ފައިސާގައި ހިފަން ދެކޮޅުހެދިޔެވެ. މިކަމާ ޝާހީ ޚާންދާނުގެ ބޭފުޅާ ކަންބޮޑުވެ ފިކުރުކުރައްވާން ހުންނަވަނިކޮށް އެތަނަށް އައީ ކިސަޑުގަނޑުގައި ބައްޕަގެ ދަނޑުގަ މަސައްކަތް ކުރަން އުޅުނު ދަނޑުވެރިޔާގެ ދަރިސޮރެވެ. ޝާހީ ވެރިޔާގެ ޚިޔާލަށް އައީ މިހާ ރަނގަޅު މީހެއްގެ ދަރިޔަކު ވިއްޔާ މި ކުޑަ ސޮރުގެ ގައިގައި ވެސް ރަނގަޅު ކަމެއް ހުންނާނެ ކަމަށެވެ.
އެހެން ކަމުން ދަނޑުވެރިޔާ ކައިރީ މިސޮރަށް މި ޤައުމުގެ އެންމެ ޤަދަރުވެރި ޔުނިވާސިޓީން ރަނގަޅު ތަޢުލީމެއް ދެވިއްޖެ ނަމަ ދަނޑުވެރިޔާއަށް މާއުފާވެރިކަން ލިބޭނެ ކަމަށް ބުންޏެވެ. އަދި އެކަމަށް ހިނގާނެ ހުރިހާ ޚަރަދެއްގައި ހިފާނެ ކަމަށާއި، ދަނޑުވެރިޔާ ޗަކަގަނޑުން ސަލާމަތް ކޮށްދިން އޭނާގެ އުފަން ދަރި ފަދައިން މިހާރު ޗަކައިން ތަތްތެޅިފައިވާ ދަނޑުވެރިޔާގެ ދަރި ބަލަހައްޓައިދޭން ވަޢުދުވެ އެސޮރު ޝާހީ ވެރިމީހާގެ ގަނޑުވަރަށް ބަދަލުކުރެއްވިއެވެ.
ދުވަސްތައް ފާއިތުވަމުން ދަނީއެވެ. ދަނޑުވެރިޔާ އާއި ޝާހީވެރިޔާގެ ދަރިޔާ ދެމީހުންވެސް ޔުނިވާސިޓީ ތަޢުލީމު ނިންމައިފިއެވެ. ދަނޑުވެރިޔާގެ ދަރިއަށް އޭނާގެ ކުރީގެ ޙާލަތާ އަދުގެ ޙާލަތު އެނގޭތީ ކިޔަވަންވެސް އެހާ މިންނެތް މަސައްކަތް ކުރީތީ ސަންތިމޭރީ މެޑިކަލް ކޮލެޖުން ލިބުނު ނަތީޖާވެސް ދަނޑުވެރިޔާ އުފަލުން ފޮޅޭހާވިއެވެ. ކޮންމެ އަކަސް ދަނޑުވެރިޔާގެ ދަރި ކިޔެވީ މެޑިސިންއެވެ. ޝާހީ ވެރިޔާގެ ދަރި ކިޔެވީ ސިޔާސީއެވެ.
ދުވަސްތައް ހުރެ ފާއިތުވަމުން ދަނީއެވެ. ދަނޑުވެރިޔާގެ ދަރި އާއި ޝާހީވެރިޔާގެ ދަރިވެސް ހުރެ ނިކަން ބާރަށް ކުރިއަރައިގެން ދެއެވެ. ދަނޑުވެރިޔާގެ ދަރި ދުނިޔޭގެ ނަންހިނގާ ޑަކުޓަރަކަށް ވެ ނިމިއްޖެ އެވެ. ދަނޑުވެރިޔާގެ ދިރިއުޅުން އުފާވެރި ކަމާއި އެކު ކުރިޔަށް ދިޔަނަމަވެސް ދަނޑުވެރިކަން ދޫކޮށްލަން ޚިޔާލެއް ނުކުރިއެވެ.
މިހެން ދުވަސްތައް އޮޅެމުން ނިޔުޅެމުން ދަނިކޮށް ދަނޑުވެރިޔާ ޗަކަގަނޑުން ނަގައިދިން އެއްކަލަ ޝާހީވެރިޔާގެ ދަރިސޮރަށް ނިޔުމޯނިޔާބަލި ޖެހި ދުނިޔެމަތިން އުންމީދު ކަޑާލަން ޖެހިއްޖެއެވެ.
މިކަމާ ދަނޑުވެރިޔާގެ ދަރި ޑޮކްޓަރުވެސް ނުހަނު ހިތާމަ ކުރިއެވެ. އެއްބަނޑު އެއްބަފާ ދެބެން ފަދައިން އުމުރުގެ ބޮޑުބައި ކިޔެވުމާއި ކުޅުމުގައި އެކުގައި ހޭދަކުދި ދެބެންގެ ތެރެއިން އެކަކު ބަލިވެ މަރުމަތީގައި އޮތްއިރު އަނެކަކީ ދުނިޔޭގެ ނަންހިނގާ މޮޅު ޑޮކްޓަރެއް ނަމަވެސް ކުރެވޭނެ ހަމަ އެއްކަމެއްވެސް ނެތީތީ އިންތިހާ އަށް ހިތާމަކުރިއެވެ.
އަދި ދަނޑުވެރިޔާގެ ދަރި ޑޮކްޓަރު ރެޔާއި ދުވާލު ކުރި މިންނެތް ބުރަ މަސައްކަތުން އެހާތަނަށް ފަރުވާއެއް ހޯދިފައި ނުވާ ނިޔުމޯނިޔާ ބައްޔަށް ފަރުވާއެއް ހޯދައިފިއެވެ. އެއީ ބުނެވިދިޔަ ޕެނިސިލިން އެވެ. ދުނިޔޭގެ އެންމެ ފުރަތަމަ އެންޓިބަޔޮޓިކެވެ.
ފަހުން މި ޕެނިސިލިން އިތުރަށް ތަރައްޤީކޮށް އެތައް ބައިވަރު ބަލިތަކެއްގެ ފަރުވާ ކަމުގައި ވިއެވެ.
މި ޙާދިސާގައި ދަނޑުވެރިޔާގެ ދަރިފުޅަށް ތަޢުލީމު ދެއްވި އިނގިރޭސި ޝާހީ ވެރިޔަކީ އެޤައުމުގެ ޤާނޫނު ހަދާ މަޖިލީހުގެ އެންމެ ޤަދަރުވެރި އެއް ބޭފުޅާ ކަމުގައިވާ ލޯރޑް ރެންޑްލްފް ޗާރޗިލްއެވެ. ދަނޑުވެރިޔާގެ އެހީތެރި ކަމާއި އެކު ޗަކަގަނޑަށް ގެނެބެމުން ދަނިކޮށް ސަލާމަތް ކުރެވުނީ ރެންޑްލޮފް ޗާރޗިލްގެ ދަރިކަލުން ސަރ ވިންސްޓަން ޗާރޗިލްއެވެ. ދަނޑުވެރިޔާގެ ދަރިޔާއި އެކުގައި އުޅެ ބޮޑުވި އިރު، ސިޔާސީ ދާއިރާއިން ކިޔަވަމުން ދިޔަ މީހަކީ މި ވިންސްޓަން ޗާރޗިލް އެވެ.
ފަހުން މި ބަލިން ސަލާމަތްވެ އިނގިރޭސި ވިލާތުގެ ވެރިކަން ދެފަހަރެއްގެމަތިން މީނާ ކުރެއްވި އެވެ. އިނގިރޭސި ރައްޔިތުންގެ ލޯތްބާއި ރުހުން ނިހާޔަތަށް ލިބިވަޑައިގަތުމުގެ ނަތީޖާ އެއްގެ ގޮތުން ވެރިކަމުން ވަކިވެ ވަޑައިގެންނެވިތާ އެތައް ދުވަހަކު ފަހު އަނެއްކާވެސް އިނގިރޭސިން މީނާ ވެރިކަމަށް ގެނައެވެ.
ފުރަތަމަ ފަހަރު މީނާ އިނގިރޭސި ވިލާތުގެ ވެރިކަން ކުރެއްވީ 1940 އިން 1945 އަށެވެ. އަދި ފަހުން ރައްޔިތުން އެދިގެން 1951 އިން 1955 އަށް އިނގިރޭސިވިލާތުގެ ވެރިކަން މީނާ ކުރެއްވިއެވެ.
ﷲ ގެ ކުޅަދުންވަންތަކަން ދެކިބަލާށެވެ. އިޙުސާންތެރިންނަށް ﷲ މިފަދައިން ޖަޒާދެއްވާނެ ކަން އެ އިލާހު ވަނީ ކީރިތި ޤުރުއާނުގައި ވަރަށް ތަފްޞީލުކޮށް ބަޔާންކުރައްވާފައެވެ. ރިޒުޤު ދެއްވުމުގައި އެ އިލާހު މުސްލިމެއް ކާފަރެއް ފަރަޤެއް ނުކުރައްވައެވެ. ތައުބާގެ ދޮރުކޮޅު މުސްލިމުންނަށާއި ކާފަރުންނަށް ވެސް އަބަދުމެ ހުންނަނީ ހުޅުވާލެވިފައެވެ.
އެމީހަކީ ﷲގެ ޒާތުފުޅަށް ކިތަންމެފަދަ ކުނި ހުތުރު ފުޅައެއް ގޮވާފައިވާ މީހަކަސް، އެއިލާހާއި އެއްހަމައަކަށް އެހެން ޝަރީކުން ލައިގެންނާއި އެ މަތިވެރި އިލާހަށް ދަރިކަލަކު ވާކަމަށް ދަޢުވާ ކުރަމުން ދިޔަ މީހަކަސް ތައުބާގެ ދޮރުކޮޅުން ވަނުމުން އެއިލާހުގެ އޯގާވަންތަ ކަމާއި ރަޙުމަތް ވަންތަކަން ދީލަތި ގޮތެއްގައި ދެއްވައެވެ. އެއިލާހު އެންގެވި ފަދައިން ދިރިއުޅުމުގެ ކަންކަމުގައި ހިފައި މައިންބަފައިންނަށާއި، ޢާއިލާ އާއި، ފަޤީރުންނާއި މިސްކީނުންނާއި ޔަތީމުންނަށް އިޙުސާންތެރިވާނަމަ އަޅުގަނޑުމެންނަށް އެހެން ބަޔަކު އުފާކޮށްދެވެއެވެ.
ﷲ ގެ ރުހިވޮޑިގަތުން ހޯދައިގަނެވެއެވެ. މިއަށްވުރެ ބޮޑު އުފަލެއް ކޮބައިތޯ އެވެ؟ މާތް ﷲ އަޅުގަނޑުމެން އެންމެނަށް އެ އިލާހުގެ މަގަށް މަގު ދައްކަވައި، އިހުސާންތެރިކަމާއި އޯގާތެރިކަމުގެ މާތް މަތިވެރި ސިފައިން އަޅަމެނަށް ސިފަ ދެއްވަވާށިއެވެ! އަދި ﷲ އާއި އެ އިލާހުގެ ނަބިއްޔާ (صلى الله عليه وسلم) ގެނެސްދެއްވި މަތިވެރި އަޚުލާޤުން އަޅަމެންގެ އަޚުލާޤު ޒީނަތްތެރި ކުރައްވާށިއެވެ! އާމީން!!
މިލިޔުން ކިޔާލުމުން
