ނަތަންޔާހޫގެ ފޯނު ކޯލެއް ލީކުވެއްޖެ

އިސްރާއީލުގެ އިންތިޚާބުގެ ވޯޓުލުން ނިމެން ގާތްވެފައިވަނިކޮށް ހަރުކަށި ފިކުރުގެ ޔަހޫދީން (އަލްޓްރާ-އޯތޮޑޮކްސް) ވޯޓުލާން ނުކުތުމަށް ބާރުއެޅުމުގެ ތެރޭގައި ބެންޖަމިން ނަތަންޔާހޫ ފާޅުކުރި ކަންބޮޑުވުންތަކެއް ހިމެނޭ ފޯނު ކޯލެއް ލީކުވެއްޖެ އެވެ.

މި ހިތްހަމަނުޖެހުން އުފެދުނީ ސިފައިންގެ ޚިދުމަތާ ގުޅޭގޮތުން ނަތަންޔާހޫ ވެފައިވާ ވައުދުތައް ފުއްދާފައިނުވާތީ އެ ފަރާތްތަކުން ރުޅިގަދަވެފައިވާ ދަނޑިވަޅެއްގަ އެވެ.

އިޝްތިހާރު

އިންޓަނެޓުގައި ދައުރުވަމުންދާ މި ކޯލުގައި ނަތަންޔާހޫ ބުނެފައިވަނީ ”ބުނެބަލަ، އެމީހުން މޮޔަވީތަ؟ އެމީހުން ބޭނުންވަނީ ވާތު ފިޔައިގެ ސަރުކާރެއް އަންނާންތަ؟“ މިފަދައިންނެވެ. އަދި އޭނާގެ އަނބި ސާރާ ނަތަންޔާހޫ ”އެކަމަކު އަހަރެމެން އެންމެން މަރުވާނެ!“ އޭ ކިޔައި ހަޅޭއްލަވާ އަޑުވެސް އެ ރެކޯޑިންގއިންއިވެ އެވެ.

މި ރެކޯޑިންގއާ ގުޅޭ ރިޕޯޓުތައް ބުނާގޮތުގައި ނަތަންޔާހޫ މި ވާހަކަ ދެއްކެވީ އެކްޓިވިސްޓަކާ އެވެ.

އެ އެކްޓިވިސްޓް ވަނީ ސިފައިންގެ ޚިދުމަތާ ގުޅޭ ވައުދުތައް ނުފުއްދުމުގެ ސަބަބުން ހަރުކަށި ފިކުރުގެ ވޯޓުލާ މީހުން ވޯޓުލާން ނެރުމަށް ބޮޑެތި ގޮންޖެހުންތަކެއް ކުރިމަތިވެފައިވާކަން ނަތަންޔާހޫއަށް އަންގާފަ އެވެ.

މި ހާދިސާއިން ހާމަވަނީ ނަތަންޔާހޫގެ ސިޔާސީ އިއްތިހާދުގެ މައިގަނޑު ބާރެއް ކަމަށްވާ ހަރުކަށި ފިކުރުގެ ޔަހޫދީންގެ ތާއީދު ހޯދުމަށް އޭނާއަށް ކުރިމަތިވެފައިވާ ނުތަނަވަސްކަމެވެ.

އިސްރާއީލުގެ ސިޔާސީ މަސްރަހުގައި ސިފައިންގެ ޚިދުމަތަކީ އަބަދުވެސް ބޮޑު ބަހުސެއް ހިނގާ ކަމެކެވެ.

ޚާއްޞަކޮށް ދީނީ ތަޢުލީމު ހާސިލުކުރާ ހަރުކަށި ފިކުރުގެ ފިރިހެނުން ސިފައިންގެ ޚިދުމަތުން އިސްތިސްނާކުރުމާ މެދު އުފެދިފައިވާ ދެބަސްވުންތަކުގެ ސަބަބުން ސަރުކާރުގެ އިއްތިހާދު ދެމެހެއްޓުމަށް ވަނީ ދަތިތަކާ ކުރިމަތިވެފަ އެވެ.