ލިތަލް އިންޖެކްޝަންގެ ދެ ޑޯޒް ދީގެން ވެސް މަރެއް ނުވި

އެމެރިކާގެ ޓެނެސީ ސްޓޭޓްގައި މަރުގެ އަދަބު ތަންފީޒުކުރާ އިދާރާގެ އެންމެ އިސްވެރިޔާ ފްރޭންކް ސްޓްރާޑާ، ކްރިސްޓާ ޕައިކްގެ މަރުގެ އަދަބު ތަންފީޒުކުރުމުގައި ދިމާވި މައްސަލަތަކާ ގުޅިގެން އިސްތިއުފާ ދެއްވައިފި އެވެ.

ޓެނެސީގެ ގަވަރުނަރު ބިލް ލީ ހޮނިހިރު ދުވަހު އިޢުލާނުކުރެއްވި ގޮތުގައި، ޑިޕާޓްމަންޓް އޮފް ކަރެކްޝަންސްގެ ކޮމިޝަނަރު ފްރޭންކް ސްޓްރާޑާ މި މަހުގެ ފަހުކޮޅު މަޤާމުން ވަކިވެވަޑައިގަންނަވާނެ އެވެ.

އިޝްތިހާރު

ގަވަރުނަރު ވިދާޅުވި ގޮތުގައި މިއީ މި ހިނގި ހިތާމަވެރި ހާދިސާއަށްފަހު އަޅަންޖެހޭ މުހިންމު ފިޔަވަޅެކެވެ.

ގަވަރުނަރު ލީ ނެރުއްވި ބަޔާނެއްގައި ވިދާޅުވީ، ކޮމިޝަނަރު ސްޓްރާޑާ މަޤާމުގެ މަސްޢޫލިއްޔަތު އަދާކުރެއްވީ އިޚުލާސްތެރިކަމާއެކު ކަމަށާއި، މި ދަނޑިވަޅުގައި ރައްޔިތުންގެ މަސްލަހަތަށް އިސްކަންދެއްވައި އޭނާ ނިންމެވި ނިންމެވުމަށް އިހުތިރާމްކުރައްވާ ކަމަށެވެ.

ނަމަވެސް، ސްޓްރާޑާގެ ބަދަލުގައި އެ މަޤާމަށް އައްޔަންކުރާނެ ބޭފުޅަކު އަދި ހާމަކޮށްފައެއްނުވެ އެވެ.

މީގެ ތިން އަހަރު ކުރިން ޓެނެސީގެ ކަރެކްޝަންސްގެ އިސްވެރިޔާގެ މަޤާމާ ހަވާލުވެވަޑައިގަތުމުގެ ކުރިން، ސްޓްރާޑާ ވަނީ އެރިޒޯނާގެ ކަރެކްޝަންސް ޑިޕާޓްމަންޓްގެ އިސް މަގާމެއް ފުރުއްވާފަ އެވެ.

އެރިޒޯނާގައި އޭނާގެ ބެލުމުގެ ދަށުން ކުރިއަށްގެންދިޔަ މަރުގެ އަދަބު ތަންފީޒުކުރުމުގެ ބައެއް އޮޕަރޭޝަންތަކުގައި ވެސް މައްސަލަތަކެއް ކުރިމަތިވެފައިވެ އެވެ.

ސްޓްރާޑާ ވިދާޅުވި ގޮތުގައި އޭނާ އިސްތިޢުފާ ދެއްވީ ޓެނެސީގެ ރައްޔިތުންގެ ލާބައަށްޓަކައި، އެ ހާދިސާ މިނިވަންކަމާއެކު ތަޙްޤީޤްކުރުމަށް ފުރުސަތު ދިނުމުގެ ގޮތުންނެވެ.

ކްރިސްޓާ ޕައިކް މަރަން ދިން ’ޕެންޓޯބާބިޓަލް‘ އިންޖެކްޝަންގެ ދެ ޑޯޒަށް ފަހުވެސް އޭނާ މަރުނުވުމުން، ބުދަ ދުވަހު އޭނާ ވަނީ ޖަލުން ހޮސްޕިޓަލަށް ބަދަލުކޮށްފަ އެވެ.

ޕައިކްގެ ވަކީލުން ބުނި ގޮތުގައި ސްޓްރާޑާގެ އިސްތިއުފާއަކީ އެކަށީގެންވާ ނިންމުމެއް ނަމަވެސް، އޭގެ ސަބަބުން ޕައިކްއަށް ލިބުނު ގެއްލުމަށް އޮތް ހައްލެއް ނޫނެވެ.

ވަކީލުން އިތުރަށް ހާމަކުރި ގޮތުގައި، މި ހާދިސާއިން ދޭހަވަނީ މުޅި ނިޒާމު ފެއިލްވެފައި އޮތް މިންވަރެވެ. އަދި މިނިވަން ތަޙްޤީޤަކުން ޓެނެސީގެ މަރުގެ އަދަބު ދިނުމުގެ ނިޒާމުގައި ހުރި ބޮޑެތި މައްސަލަތައް ހާމަވާނެ ކަމަށް އުންމީދުކުރާ ކަމަށްވެސް އެ ބަޔާނުގައިވެ އެވެ.

ކޯޓަށް ހުށަހެޅި ލިޔުންތަކުގައިވާ ގޮތުން، ޕައިކްގެ ހަށިގަނޑުން އެ ބޭސްތައް ބޭރުކުރުމަށް ވެންޓިލޭޓަރުގެ އެހީގައި ފަރުވާ ދޭންޖެހުނެވެ.

ވަކީލުން ތުހުމަތުކުރާ ގޮތުގައި، އައިވީ ގުޅުމުގައި ހެދި ގޯހެއްގެ ސަބަބުން ބޭސްތައް ދިޔައީ ލޭގެ ނިޒާމުގެ ބަދަލުގައި އޭނާގެ މަސްތަކުގެ ތެރެއަށެވެ. އަދި އެ މަސައްކަތުގައި އުޅުނު ޓީމަށް އެކަން ރޭކާނުލާ އޮތް ކަންވެސް ވަކީލުން ފާހަގަކުރި އެވެ.

ކްރިސްޓާ ޕައިކަކީ 1995 ވަނަ އަހަރު، އުމުރުން އެންމެ 18 އަހަރުގައި އަންހެނަކު ރަހުމުކުޑަގޮތަކަށް މަރާލި މައްސަލައިގައި މަރުގެ އަދަބު އިއްވާފައިވާ މީހެކެވެ.

އޭނާއަކީ އެމެރިކާގައި މަރުގެ އަދަބު އިއްވުނު އެންމެ ހަގު އަންހެނުންގެ ތެރޭގައި ހިމެނޭ މީހެކެވެ.

މި ހާދިސާއާ ގުޅިގެން ގަވަރުނަރު ލީ ވަނީ މި އަހަރުގެ ނިޔަލަށް ޓެނެސީގައި މަރުގެ އަދަބު ތަންފީޒުކުރުން މެދުކަނޑާލައި، މުޅި މައްސަލަ ތަޙްޤީޤްކުރުމަށް އަމުރުކުރައްވާފަ އެވެ.