ބީރަށްޓެހި ރަޙްމަތްތެރިން

އެއީ އާދައިގެ މަތިން ދަރިފުޅު ސްކޫލަށް ދާން ތައްޔާރުވި ހެނދުނެކެވެ.

ނަމަވެސް އެދުވަހު އޭނާގެ މޫނުމަތިން ފެންނަން ހުރީ އާދައިގެ މަތިންފެންނަ ސަކަ މިޒާޖެއްނޫނެވެ.

އިޝްތިހާރު

ކޮޓަރިން ނުކުމެ ސިޓިންގ ރޫމަށް އައިސް، މަޑުމައިތިރިކަމާއެކު އޭނާ ބުނެލީ އަހަރެންގެ މުޅި ގައިން ހީބިހި ނަގައިގެން ދިޔަ ވާހަކައެކެވެ.

”މަންމާ، ބޭބީގެ އެނދުކައިރީގައި، ކޮޓަރީގެ ކަނުގައި އަންހެން ކުއްޖަކު އެބަހުރި. އެކަމަކު އަހަރެން ބަލައިލީމާ އެކުއްޖާ ފާރުތެރެއަށް ވަދެ ގެއްލިއްޖެ.“

ހިތް ބިރުން ތެޅިގަތް ނަމަވެސް، ދަރިފުޅަށް އެކަން ނާންގަން އަހަރެން ހިތްވަރު ކުރީމެވެ. އެއީ ކަމެއް ނޫން ކަމަށް ހަދައި، އޭނާ ސްކޫލަށް ފޮނުވާލުމަށްފަހު، ގޭތެރޭގައި ގުރުއާން ޖަހައިގެން އޮއްވާ އަހަންނަށް ނިދިޖެހުނެވެ. ދުވަސްތައް ފާއިތުވަމުން ދިޔަވަރަކަށް އެކަމުގެ ހަނދާންތައް ކޮންމެވެސް ވަރަކަށް ފަނޑުވަމުން ދިޔަ އެވެ.ނަމަވެސް، ދެތިން ހަފްތާއެއް ފަހުން އެ ބިރުވެރިކަމާ އަނެއްކާވެސް ކުރިމަތިވި އެވެ. ދަރިފުޅު ޕާކަށް ކުޅެންގޮސްފައި ބޭރުން އައިސް ބުނީ މަގުމަތިން އެއްކަލަ ކުއްޖާ ފެނުނު ވާހަކަ އެވެ.

”އެކުއްޖާ ހުރީ މަގު މެދުގަ އެކުއްޖާގެ ގައިތެރެއިން ކާރުތައް ދިޔައަސް އެކުއްޖާއަކަށް ކަމެއް ނުވޭ، މަރެއްވެސް ނުވެ“ އޭނާ ބުންޏެވެ. ފިރިމީހާއާ މިވާހަކަ ހިއްސާކޮށްފައިވެސް، އަހަރެމެން މަސައްކަތް ކުރީ މާބޮޑު ކަމަކަށް ނުހަދާ އުޅެވޭތޯ އެވެ.
އެކަމަކު ކަންތައްތައް ދިޔައީ ގޯހުން ގޯހަށެވެ. ދަރިފުޅު އެކަނި ހުންނަން ބިރުގަންނަން ފެށި އެވެ. ކުއްލި ކުއްލިއަށް ސިއްސައިގެން ދިއުމާއި، ހާސްވުން އާދަޔަކަށް ވިއެވެ. އޭނާއަށް ފެންނަނީ ހަމައެކަނި އަންހެން ކުއްޖެއް ނޫނެވެ. ކަޅު ކުލައިގެ ތޮތްޕެއް އަޅައިގެން ހުންނަ، މުޅިން ކަޅު މީހަކުވެސް ފެންނަން ފެށީ އެވެ.

ދަރިފުޅު ބުނާ ގޮތުގައި އޭނާ ބަލައިލާ ކޮންމެ ފަހަރަކު އެ މީހާ ބިންގަނޑުގެ އަޑިއަށް ގޮސް ގެއްލެނީ އެވެ.

އެއްދުވަހަކު ގޭގައި އުޅޭ ކުއްޖަކާ އެކު އަހަރެމެން ސިޓިންގ ރޫމުގައި ތިއްބާ، ދަރިފުޅު ކުއްލިއަކަށް ސޯފާއިން ފުންމައިގެން ތެދުވިއެވެ. ބިރުން ގޮސް އޭނާ ބުންޏެވެ.

”އެއްކަލަ ބްލެކް ހެޓް އަޅައިގެން ހުރި މީހާ އެހެރީ ދޮރުމަތީގައި! އެކަމަކު މިހާރު ބިންމައްޗަށް އަޑިއަށް ގޮއްސް ގެއްލިއްޖެ“

ބައްޕަ ސުވާލު ކުރުމުން އޭނާ އިތުރު ތަފްސީލު ދިނެވެ. އޭނާއަށް ބައިވަރު ކުދިން ފެނެއެވެ. އޮރެންޖް ކުލައިގެ ހެދުމަކާއި ރީނދޫ ކުލައިގެ ހެދުމެއް އަި އެއްކޮށް ކަޅުކޮށް ތިބޭ ކުދިންނެވެ.

އެކުދިންގެ ސިފަ އިންސާނުންނާ ވައްތަރަސް، އެކުދިންގެ ލޯ ހުންނަނީ ވަރަށް ތަފާތުކޮށް، ”ގޫގްލީ އައިސް“ ގޮތަށްކަމަށް ދަރިފުޅު ކިޔައިދިނެވެ. ދަރިފުޅު އެކުދިން ހުންނަ ގޮތް ކުރަހައިދިނެވެ. އެކުދިންގެ ތެރެއިން އެއްކުއްޖަކު ދަބަހެއް ގެންގުޅޭކަމުގައިވެސް ބުންޏެވެ. އަދި އެ ދަބަސްވެސް ކުރަހައި ދެއްކި އެވެ.

މިކަމުގެ ސަބަބުން ދަރިފުޅުގެ ދިރިއުޅުމަށް ބޮޑެތި ބަދަލުތަކެއް އައެވެ. އެގޮތުން ފާހަގަވި އެއްކަމަކީ ދަރިފުޅު އާދަޔާ ހިލާފަށް ގިނައިން އެސްފިޔަޖަހަން ފެށުމެވެ. ވާހާކަ ދައްކާއިރުވެސް އުނދަގޫވާވަރަށް އެފިޔަ ޖަހަން ފެށި އެވެ.

މީގެ ކުރިން ޤަވައިދުން ސްކޫލްގެ ގުރުއާން މުގައްރަރު ދަސްކުރާ ދަރިފުޅަށް މިހާރު ގުރުއާން ފިލާވަޅުން ތަންކޮޅެއްވެސް ކިޔާލެވޭވަރެއް ނުވެ އެވެ. ޤުރުއާން ކިޔަވައިދޭން މިސް އައުމުން އަބަދު އޮންނަނީ ނިދިފައެވެ. ކިތަންމެ ވަރަކަށް ކޮށްޓާހެދިޔަސް އޭނާއަށް ހޭލައިގެން ޤުރުއާން ކިޔެވޭ ވަރެއް ނުވެ އެވެ.

އެންމެފަހުން އަހަރެންގެ ބޭބެއަކާ މިވާހަކަތައް ހިއްސާކޮށް ބޭބެ މެދުވެރިކޮށް ރުޤްޔާ ކުރާ މީހެއްގެ އެހީތެރިކަން ހޯދީމެވެ. އޭނާ ބުނި ގޮތުގައި ދަރިފުޅު އެކަނި އުޅޭތީ ޖިންނިއަކު އޭނާއާ ”ރައްޓެހިވާން“ އުޅުނީހެން ހީވާކަމަށެވެ. ނަމަވެސް އެކަން ކާމިޔާބު ނުވުމުން، ދަރިފުޅު ބިރުގެންނެވުމަށްޓަކައި ހަޑި ސިފަސިފަ ދައްކާ އުންދަގޫކުރަން ފެށީ އެވެ.

ރާޤީގެ އިރުޝާދުގެ މަތިން 40 ދުވަހު ރުޤްޔާކޮށް ކިޔަވާފައި ހުރި ފެން ދީ ހެދުމުން ﷲ ގެ ރަހުމަތްފުޅުން ދަރިފުޅު މުޅިން ރަނގަޅުވިއެވެ. އެ ބިރުވެރި ހިޔަނިތަކާއި، ނުފެންނަ މަޚްލޫޤުންގެ އުނދަގުލުން ދަރިފުޅު ސަލާމަތްވެ، ގޭތެރެއަށް އަލުން އަމާންކަން ލިބުނެވެ.